Morwasinke atu dwarere nawa komapongo getu?

Ono nongonona mafano gana kara mosifo esi omu adi dwara nawa Nombangi daJehova komapongo gawo ndi? Morwasinke atu dwarere nawa?

Kulikida efumadeko kwaKarunga gwetu. Karunga kutara eyi ya kara momutjima. (1 Samwere 16:7) Nye apa atu pongo tu mu karere, sitambo setu kuna kara sokumufumadeka ntani sokufumadeka vapuli vakwetetu. Nsene va tu zigida tu ka moneke kwahompa ndi kwapresidente ose ngatu dwara nawa mokulikida efumadeko kwendi. Mokulifana, monkedi omu atu dwara apa atu zi komapongo kulikida efumadeko lyetu kwaJehova Karunga “hompa gonomuhoko nadinye,” ntani kevango eli atu mu karere.—Jeremiya 10:7.

Kulikida efumadeko kweyi atu lirongo. Bibeli kukorangeda Vakriste va dware “yidwara yoyiwa yokuliza nonkareso zongwa,” mokulikida ‘etjiroKarunga.’ (1 Timoteusa 2:9, 10) Kudwara “yoyiwa” kutanta asi kunyokera po ndwareso zokulimonekesa ndi yidwara yokupata korutu ndi yokumonekesa rutu. Ntani kukara “nonkareso zongwa” ngayi tu vatera tu dire kudwara kulindjambaika. Kapi pwa kara veta kuhamena eyi natu dwara nye twa hepa kudwara yokuwapera. Ndwareso zetu kufumadekesa “erongo lyaKarunga, Muzowoli gwetu.” (Titusa 2:10; 1 Peturusa 2:12) Pokudwara nawa komapongo getu ngayi ninkisa vantu va fumadeke ukareli waJehova.

Nampili kapi wa kara noyidwara yoyiwa, simpe kuvhura o wize komapongo koSinyanga soUhompa. Kapisi hepero tu dware yikoverero yondiro nye yomulyo po ya hepa kukara yina zere.

• Morwasinke natu dwarera nawa komapongo?

• Nompango musinke nadi tu vatera tu dware nawa?