Yisinke ayi horoka mo momapongo getu?

Posiruwo sovapositoli, momapongo gawo ngava dimbi nokukanderera nokuresa nokuzogera kuhamena Matjangwa. (1 Vakolinte 14:26) Nose yiyo atu rugana momapongo getu.

Marongo gamo gokutunda moBibeli ntani kutuvatera meparu. Mosikondovike, nkenye mbungakriste kuponga va purakene Siuyungwa soBibeli sonominute 30 esi asi demenene omu aga kundama Matjangwa eparu lyetu ntani siruwo esi tuna kuparuka ngesi. Natuvenye kutukorangeda tu kwame moNobibeli detu. Konyima zosiuyungwa kukwama ko Elirongo “lyoRuhungu” eli ava rugana vili zimwe, ano navenye womombunga kuvhura kugava malimbururo kosirongwa esi vana kuzogera moRuhungu rwelirongo. Nzogera ezi kutuvatera tu sikise mo mavyukiso gomoBibeli meparu lyetu. Nombungakriste dokupitakana po-100 000 mouzuni mudima kulironga Ruhungu rokulifana.

Kutuvatera tu wapukurure nkedi zetu zokuronga. Ose kukara hena nepongo mosivike kongurova omu amu hamene maruha gatatu gosiparatjangwa Eparu lyetu noyirugana yokuzuvhisa ano magano kutunda moMbapira zetu zekEpongo atu gwana nkenye kwedi. Ruha rokuhova kuna kara Ugawo womoNonkango daKarunga, ruha oru kutuvatera tu kwate egano ereso lyoBibeli eli atu resa komeho zosiruwo. Ruha rwauvali, Litura mo mokuzuvhisa kuhamena mo malikido omu natu zogera novantu kuhamena Bibeli. Munasipundi kugava mapukururo aga naga tu vatera tu wapukurure nkedi zetu zokuresa nokuuyunga. (1 Timoteusa 4:13) Ruha rwautatu, Kuparuka ngoMukriste, kuhamena mo magano omu natu tura pasirugana nompango doBibeli meparu lyetu. Ruha oru kukwatera mo nzogera zomapuro nomalimbururo aga naga tu vatera tu kwate nawa egano Bibeli.

Apa ngo za komapongo getu, ngali ka ku tetura erongo lyoBibeli eli ngo ka zuvha.​—Jesaya 54:13.

• Yisinke ngo ka zuvha mo momapongo goNombangi daJehova?

• Epongo musinke ono hara kukaponga?