Yisinke sirugana sovakwafimbunga?

Bibeli kwa faturura nombunga mbali doVakriste wovagara ava ava pakere mbili mbungakriste, ‘vapitisili novakwafi wonombungakriste.’ (Vafilipi 1:1) Mwankenye mbungakriste mwa kara vakuronambunga novakwafimbunga. Yisinke ava tu ruganene vakwafimbunga?

Awo kuvatera vakuronambunga. Vakwafimbunga va kara nelikwatakano lyenene naJehova, awo kurugana unene ntani kwa va huguvara. Awo kurugana yirugana yomulyo eyi va tumbura moparagarafu zokukwama ko. Eyi kupa mpito vakuronambunga va demenene kosirugana sokuronga nokukorangeda nokudingura wombungakriste.

Awo kugava evatero lyomulyo. Vakwafimbunga vamwe kuvapa situmbukira sokutambura navenye ava ava wiza komapongo. Vamwe kurugana komambako nokokugavera yimbapiratjangwa nokuvarura yimaliwa ntani kugava nomukunda dokuzuvhisira. Awo hena kuvatera mokuzeresa nokuwapaika Sinyanga soUhompa. Vakuronambunga kuvhura kupura vakwafimbunga va vatere vakurupe. Vakwafimbunga awo kutambura nkenye situmbukira ava va pe, twa hepa kuvafumadeka.—1 Timoteusa 3:13.

Awo kutura po sihonena sosiwa ngovagara woVakriste. Vakwafimbunga kuvahorowora morwa yikara yawo yoSikriste. Apa ava gava yiuyungwa momapongo, awo kunkondopeka epuro lyetu. Epitisiro lyawo moyirugana yokuzuvhisa kututumangeda nose tu kare noupampi. Eruganeno lyawo kumwe novakuronambunga kureta ruhafo nouumwe mombungakriste. (Vaefeso 4:16) Mwa za siruwo, vakwafimbunga nawo kuvhura kuyakara vakuronambunga.

• Yikara musinke va kara nayo vakwafimbunga?

• Ngapi omu vakwafimbunga ava vatere mbungakriste?