Ngapi vakuronambunga ava ruganene mbungakriste?

Vampitisili wombunga zetu kapi ava va futu. Ngwendi moomu va yi rugene mombungakriste zokuhova, vakuronambunga kwa va tura va kare “vasita wombungakriste zaKarunga.” (Yirugana 20:28) Awo kwa kara nelikwatakano lyenene naJehova nokupitisira mbungakriste ‘neharo, kapisi komusininiko. Kapisi morwamfuto za nyata, nye neharo lyewa.’ (1 Peturusa 5:1-3) Yisinke ava tu ruganene vakuronambunga?

Awo kututakamesa nokutupopera. Vakuronambunga kugava mavyukiso gomoBibeli nokuvatera mbungakriste zi kare pepi naJehova. Morwa Karunga yige ga va pa situmbukira somulyo, vakuronambunga kapi ava pangere vantu, nye awo kuretera uwa noruhafo mbungakriste. (2 Vakolinte 1:24) Ngwendi moomu musita a takamesa nkenye nzwi zendi, vakuronambunga kuhetekera ko kudiva nkenye ogu ga kara mombungakriste.—Yisewe 27:23.

Awo kuturonga omu natu rugana mpango zaKarunga. Nkenye sivike, vakuronambunga kupitisira momapongo gomombungakriste va koreke epuro lyetu. (Yirugana 15:32) Awo kupitisira hena moyirugana yokuzuvhisa, kurugana kumwe nose va tu deure momaruha gokulisiga-siga goyirugana yokuzuvhisa.

Awo kutupa makorangedo pwanyoselike. Mokutuvatera tu ture po elikwatakano lyanyamwetu naJehova, vakuronambunga kutudingura momambo getu ndi kutuuyungisa koSinyanga soUhompa va tu vatere nokutukorangeda kupitira moMatjangwa.—Jakopo 5:14, 15.

Kugusa ko yirugana yomombungakriste, sinzi sovakuronambunga va hepa hena siruwo nononkondo mokupakera mbili yirugana yavene nomapata gawo. Twa hepa kuvafumadeka morwa awo kuturuganena unene.—1 Vatesaronika 5:12, 13.

• Yisinke ava rugana vakuronambunga mombungakriste?

• Ngapi vakuronambunga ava likida elituromo mwankenye gumwe gwetu?