Dimburura situmbukira saKristusa mewapaiko lyaKarunga

“POMUHOWO Karunga kwa sitire eguru nevhu,” makura nayinye eyi ga rugene “ta yi mu zi komutjima.” (Gen. 1:1, 31) Jehova kwa sitire vantu nositambo asi va kare nomeho zongwa. Nampili ngoso, urwanesi ou wa horokere moEdeni kwa donganesere ruhafo rovantu. Nye sitambo saJehova kevhu nokovantu kapi sa runduruka. Karunga kwa tanta asi nga zowora womoruvharo rwaAdamu ava ava limburukwa. Yipo Karunga nga tengwidire po ukareli wousili, ntani nokuzonagura po Muzonaguli noyirugana yendi yoyidona. (Gen. 3:15) Komeho oko, yininke nayinye ngayi ‘ka mu za komutjima.’ Jehova nga ka sikisa mo eyi kupitira mwaMunwendi, Jesus Kristusa. (1 Joh. 3:8) Yipo nye, ya wapa kudimburura situmbukira saJesus mewapaiko lyaKarunga.—Yirug. 4:12; Fil. 2:9, 11.

YISINKE SITUMBUKIRA SAKRISTUSA?

² Nsene tu teda ko kositumbukira saKristusa mewapaiko lyaKarunga, ngatu dimburura asi amo kwa hamena mo maruha gomanzi. Jesus age Muzowoli govantu, Mupristeli goMunene, Mutwe ndi Mupangeli gombungakriste ntani age ngesi Hompa goUhompa waKarunga. Kuteda ko koyitumbukira oyo yoyinene kunkondopeka rupandu rwetu kewapaiko lyaKarunga ntani kunkondopeka eharo lyetu kwaJesus Kristusa. Bibeli za singonona yitumbukira yendi yimwe hena yapeke.

³ Apa ga kere pevhu Kristusa, ya lilikidire nawa-nawa asi kupitira mwaJesus vantu wovalimburukwi ngava likwatakana naKarunga. (Joh. 14:6) NgoMuzowoli govantu, Jesus kwa ligeve mwene a kare sizoweseso sovanzi. (Mat. 20:28) Jesus kapi ga kara tupu sihonena sosiwa, nye age kwa kara ruha romulyo mokusikisa mo sitambo saJehova kovantu. Kupitira mwendi mwelike vantu ava vhuru kutengwira kwaKarunga. (Yirug. 5:31; 2 Kol. 5:18, 19) Nomfa daJesus nevhumbuko lyendi kwa gava mpito kovantu wovalimburukwi ngava ka gwane mwenyo gwanarunye mepangero lyoUhompa waKarunga.

⁴ NgoMupristeli goMunene, Jesus kuvhura “kupakera mbili maupirankondo getu” nokugusa po nonzo dovasikuli vendi ava va ligava apa pevhu. Mupositoli Paurusa kwa tanta asi: “Ose kapi twa kara nomupristeli gomunene ogu a dili kupakera mbili maupirankondo getu, yeeyi nage kwa mu hetekere moomu ose, nye kapi ga paka nzo.” Paurusa kwa korangeda navenye ava va pura mwaJesus Kristusa va kwatese ko ewapaiko lyokukwatakanesa vantu naKarunga, pokutanta asi: “Tu zeni nye nonomutjima nadinye kosipundi souhompa saKarunga gonkenda, va ka tu fire nkenda, zi tu kwafe paapa tuna zi hepere.”—Heb. 4:14-16; 1 Joh. 2:2.

⁵ Jesus age hena Mutwe gombungakriste. Moomu ya kere kovasikuli vendi wokuhova, nose naina kapi tuna hepa mupitisili gomuntu. Jesus kugava mapukururo kupitira mompepo zokupongoka nomovasita wokuwapera, ava ngava ka yi zeresera kwendi ntani koGuhwe vemeguru monkedi omu ava pakere mbili siunda saKarunga. (Heb. 13:17; 1 Pet. 5:2, 3) Kombinga zouporofete wokuhamena Jesus, Jehova kwa tente asi: “Ame kwa mu tura po a kare mupangeli nomugendesi gonomuhoko, ngani likide nonkondo dange mwendi.” (Jes. 55:4) Jesus mwene ga sikisire mo uporofete ou apa ga tanterere varongwa vendi asi: ‘One walye hena ava mu tumbura asi “vapitisili,” yeeyi Mupitisili gweni gumwe tupu, Kristusa.’—Mat. 23:10.

⁶ Ngomu ga yi likida monkareso zokuhara kutuvatera, Jesus kuna kuzigida asi: “Wizeni kwange namuvenye, one ava wa rorora udigu, ni ya mu pwizumukise. Likambekeni ndjoko zange, mu lirongere nge po, yeeyi ame kwa gomoka, yiyo na linunupika momutjima, ngomu gwane rufuwo monomwenyo deni. Yeeyi ndjoko zange nderu, ano mudigo gwange kwa pepuka.” (Mat. 11:28-30) Mokugendesa yirugana yomombungakriste monkedi zongwa ntani ezi azi tu pwizumukisa, Jesus Kristusa ga yi likida asi age “musita gomuwa” mokuhonena oGuhwe vemeguru, Jehova Karunga.—Joh. 10:11; Jes. 40:11.

⁷ Mombilive zendi zokuhova koVakolinte, Paurusa kwa fatwilire sirugana simwe saJesus Kristusa mononkango edi asi: “Kristusa yige tupu kupangera dogoro noku nga tura nonkore nadinye konhi zonompadi dendi. Nsene asi yininke nayinye vana yi gava mepangero lyoMuna, makura Muna nage mwene ta ligava kogu ga mu pa nayinye. Karunga makura ta kara nye gelike mupangeli goyininke nayinye.” (1 Kol. 15:25, 28) Komeho zokuwiza Jesus pevhu, age kwa kere “ngonkurungu,” gomuhoverera koyisitwa nayinye yaKarunga. (Yis. 8:22-31) Apa Karunga ga tumine Jesus pevhu, age nga rugana nkenye apa mpango zendi. Age ga lididimikilire eheteko lyenene ntani ga fire noulimburukwi. (Joh. 4:34; 15:10) Morwa Munwendi kwa limburukwire dogoro konomfa, Karunga kwa mu vhumbwire ntani kwa mu pa nonkondo a kare Hompa goUhompa wemeguru. (Yirug. 2:32-36) Morwa oyo, Jesus Kristusa kwa kara nositumbukira sosinene kwaKarunga sokupitisira yisitwa yoyinzi yopampepo mokuyagusa po mapangero govantu apa pevhu ntani noudona naunye. (Yis. 2:21, 22; 2 Tes. 1:6-9; Ehor. 19:11-21; 20:1-3) Makura Uhompa waKarunga wemeguru yiwo ngau pangera evhu nalinye mepitisiro lyaKristusa.—Ehor. 11:15.

YISINKE AYI TANTA KUDIMBURURA SITUMBUKIRA SAJESUS?

⁸ Jesus Kristusa kwa sikilira mo, age sihonena setu sosiwa. Age kwa mu pa situmbukira sokutupakera mbili. Mokugwanena mo uwa meharo lyendi nemepakero mbili lyendi, twa hepa kulimburukwa Jehova nokukwama mbunga zendi.

⁹ Vasikuli vaJesus womosiruwo sendi va dimbwilire situmbukira saKristusa mewapaiko lyaKarunga. Awo kwa yi likidire eyi pokuruganena kumwe mepitisiro lyaKristusa, nokukwama mavyukiso gendi aga a gava kupitira mompepo zokupongoka. (Yirug. 15:12-21) Mupositoli Paurusa kwa tumbura uumwe wombunga zovagwavekwa apa ga tjenge asi: “Nye nyose tupu kuhamesa ukaro wetu kousili nekeharo, tu kure momalikwatakano gene-gene naKristusa. Age yige mutwe. Age yige a pangere maruha nagenye gorutu, ano rutu mudima kwa ru gwanekedesa kumwe nonongongo edi ga paka po Karunga. Age yige ga pa nkenye ruha sirugana saro, makura rutu taru kuru, taru litungu rwene meharo.”—Efe. 4:15, 16.

¹⁰ Apa nkenye ogu gomombunga a ruganene kumwe novakwawo mepitisiro lyaKristusa, mbungakriste kukura nokukara neharo “nomalikwata-kano gene-gene.”—Joh. 10:16; Koros. 3:14; 1 Kol. 12:14-26.

¹¹ Yihorokwa yomouzuni kulikida nawa-nawa asi momvhura 1914 yipo Jesus Kristusa va mu pere nonkondo doUhompa. Age ngesi kuna kupangera mokatji kononkore dendi. (Epis. 2:1-12; 110:1, 2) Yisinke yina kutanta eyi kwava vana kuparuka ngesi pevhu? Jesus ntaantani a ka sikise mo situmbukira sendi sokukara Hompa govahompa noMupangeli govapangeli apa nga ka pangura nonkore dendi. (Ehor. 11:15; 12:10; 19:16) Makura etumbwidiro lyaJehova lyokuhamena kuzowora vantu eli ga uyungire perwaneso lyokuhova lyovantu ngali ka sika mo apa Kristusa nga ka swera ava wokorulyo rwendi. (Mat. 25:34) Ee, omu tupu ayi hafesa pokudimburura situmbukira saKristusa mewapaiko lyaKarunga! Tu kareni mouumwe mokusikisa mo sirugana sokuzuvhisa uzuni mudima mepitisiro lyaKristusa pomazuva aga gopouhura.