Gwanena mo mauwa pokulimburukwa koupangeli

MOKULIMBURUKWA Jehova Karunga ngoMupangeli gwanayinye, twa hepa kurugana mpango zendi. Ose twa dimburura asi Jesus yige mupangeli gonombungakriste nadinye, ntani kulimburukwa upangeli wendi momaruha nagenye. Kulimburukwa koupangeli monkedi zangesi, kuvatera navenye va gwanene mo mauwa.

² Egano lyokulimburukwa koupangeli kwa tamekere mosikunino saEdeni. Mpangera ezi kuzigwana mwaGenesis 1:28 ntani 2:16, 17. Yikorama nayinye ya hepere kulimburukwa kovantu, ano Adamu naEva va hepere kulimburukwa koupangeli waKarunga. Kulimburukwa koupangeli ngano ya twaredesere kombili nekepitisiro lyewa. Mpango zoupangeli konyima kwa ya zi tumbura mo-1 Vakolinte 11:3. Mupositoli Paurusa kwa tjenge asi: “Ame kuna mu harere mu kwate egano lyeyi asi, Kristusa yige mupangeli gwankenye mugara, mugara mupangeli gomukadi, ano Karunga yige mupangeli gwaKristusa.” Eyi kulikida asi Jehova yige mupangeli gwanayinye kutupu hena ogu ga mu pita moupangeli.

³ Sinzi sovantu naina, kapi va nongonona ndi va limburukwe kompango zoupangeli. Morwasinke? Morwa udigu kwa tamekere moEdeni apa vakurona vetu womuhowo Adamu naEva va nyokere po upangeli waKarunga yipo va lipangere vene. (Gen. 3:4, 5) Nye, kapi va gwene umanguruki wene-wene. Eyi ya va twaredesere va limburukwe Satana Muzonaguli. Kudira kulimburukwa kwaAdamu naEva kwa va gusire kwaKarunga. (Koros. 1:21) Yitundwamo, naina sinzi sovantu kuna kara mepangero lyoMuzonaguli.—1 Joh. 5:19.

⁴ Pokulironga usili womoNonkango daKarunga nokuyitura pasirugana, ngayi tu vatera tu nyokere po epukiso lyaSatana. NgoNombangi, ose kwa tambura Jehova ngoMupangeli gwetu morwa twa ligava kwendi. Ose kukwatesa ko hompa Ndafita ogu ga dimbwilire asi Jehova yige ‘mupangeli gomunene gwanayinye.’ (1 Hist. 29:11) Kuvhura tu tante asi: “Narumwesi mu divare asi HOMPA yige Karunga! Yige ga tu unga, ose vendi; ose vantu vendi nosiunda sendi.” (Epis. 100:3) Ose hena twa dimburura asi Jehova yige mupangeli gomunene ntani ga hepa ulimburukwi wetu, morwa yige musiti gwanayinye. (Ehor. 4:11) Ngovakareli wousili, ose kukwama Jesus Kristusa, ogu ga tura po sihonena sokulimburukwa Karunga.

⁵ Yisinke ga lirongerere ko Jesus pokulididimikira maudigu aga ga pitire? Vahebeli 5:8 kutanta asi: “Age mpili ngomu ga kere Muna, ga lirongere elimburuko morunyando.” Jesus kwa limburukwire Guhwe nampili ngomu ga pitire momaudigu gokulisiga-siga. Ntani kapi ga rugene yininke yanyamwendi. Age kapi nga uyunga yininke yamwene ndi a papare efumano lyamwene. (Joh. 5:19, 30; 6:38; 7:16-18) Apa nga zuvhisa, age kwa haferere kurugana mpango zoGuhwe, nampili ngomu ga ligwanekere nomahepeko. (Joh. 15:20) Jesus nkenye apa nga limburukwa kwaKarunga. Age “kwa linunupikire” dogoro “konomfa.” Yitundwamo youlimburukwi wendi koupangeli waJehova kwa reta mauwa gomanzi, eyi kwa retera vantu ezoworo lyanarunye nomu Karunga ga mu zerura ntani kuyererepeka Guhwe.—Fil. 2:5-11; Heb. 5:9.

KOUPANGELI WALYE NATU LIMBURUKWA?

⁶ Nsene tu limburukwa Karunga pokurugana mpango zendi, ngayi tu vatera tu sesupike yinka nehandu eli ava likida vantu ava va nyoka kutambura upangeli waJehova. Nkore zetu Satana, nkenye apa age kupapara ogu na lipapagwira. Nsene tu rwanesa muzonaguli nokulinunupika kosipara saJehova ntani nokulimburukwa koupangeli wendi, age ngatu popera.—Mat. 6:10, 13; 1 Pet. 5:6-9.

⁷ Mombungakriste, ose kwa nongonona upangeli waKristusa ntani noupangeli ou va pa “mukareli gokulimburukwa gonondunge.” Eyi kukundama omu atu litekura novanavazinyetu. Kulimburukwa upangeli womombungakriste ngayi tu tumangeda tu limburukwe koNonkango daKarunga momaruha nagenye goukareli wetu. Eyi kwa kwatera mo kuzuvhisa nokuza komapongo nokugava malimbururo komapongo ntani nelikwatakano lyetu novakuronambunga nomu atu ruganene kumwe nombunga zaJehova.—Mat. 24:45-47; 28:19, 20; Heb. 10:24, 25; 13:7, 17.

⁸ Ulimburukwi wetu koupangeli waKarunga kuretesa po mbili negameno ntani neruganeno kumwe lyewa mombungakriste. Yikara yaJehova kuyimonena movakareli vendi. (1 Kol. 14:33, 40) Eyi ya tu horokera mombunga zaJehova ya tu vatera tu pwagese malizuvho ngwendi gahompa Ndafita. Apa Ndafita ga mwene malisigo pokatji kovakareli vaJehova novadinikarunga, age kwa zigilire noruhafo asi: “Gerago muhoko ogu gwa kara ngesi; gerago muhoko ogu gwa kara naKarunga HOMPA!”—Epis. 144:15.

⁹ Mononkwara ntani mepata, ‘mugara yige mupangeli gomukadi.’ Kristusa yige mupangeli gwankenye mugara, ano Karunga yige mupangeli gwaKristusa. (1 Kol. 11:3) Vakadi va hepa kufumadeka vagara vawo, ano vanona va fumadeke vakurona vawo. (Efe. 5:22-24; 6:1) Nsene tu kwama mpango ezi zoupangeli, ayo ngayi retesa po mbili mepata.

¹⁰ Mugara ga hepa kuruganesa upangeli wendi monkedi zeharo ngwendi Kristusa. (Efe. 5:25-29) Apa mugara a dili kuruganesa upangeli wendi momudona, mukadendi novana vendi kuvarerupira kumulimburukwa. Situmbukira somukadi kuna kara asi age mukwafi gwamugara gwendi. (Gen. 2:18) Pokulimburukwa nokufumadeka mugara gwendi, age nga hafesa mugara gwendi nokuyererepeka Karunga. (1 Pet. 3:1-4) Apa valikwali ava kwama nompango domoBibeli kuhamena upangeli, awo kutulira po vana vawo sihonena sosiwa mokulimburukwa koupangeli waKarunga.

¹¹ Mokulimbukwa Karunga ngayi kundama omu atu tara ‘epangero eli ali tu pangere,’ kutanta asi “vapangeli ava va kara po, Karunga ga va tura po.” (Rom. 13:1-7) Ngovanamvharerwa, ose Vakriste kufuta mutero pokupa ‘vapangeli eyi ya va hamena, ano Karunga nage yeeyi ya mu hamena.’ (Mat. 22:21) Ntani hena, apa atu zuvhisire monomukunda ose kukwama noveta dosirongo kuhamena kugusa mauzera gomuntu. Pokulimburukwa kovapangeli mwankenye eyi ayi dili kulirwanesa noveta zaJehova, ayo kutuvatera tu liture mo unene mosirugana setu sokuzuvhisa.—Mar. 13:10; Yirug. 5:29.

¹² Kulimburukwa koupangeli kukundama maruha nagenye meparu. Nepuro, ose kuna kundindira apa vantu navenye ngava limburukwa koupangeli waJehova Karunga. (1 Kol. 15:27, 28) Ava ava dimburura upangeli waJehova nokutwikira kumulimburukwa, ngava hafera mauwa ganarunye.