Adamu naEva kapi va limburukwire Karunga

Ezuva limwe apa Eva ga kere gelike, ezoka tali mu uyungisa. Tali mu pura asi: ‘Enye sili Karunga ga mu tantera asi walye omu li enyango lyokoyitji nayinye yomosikunino ndi?’ Eva ta limburura asi: ‘Ose kuvhura kulya enyango lyokoyitji nayinye ntudi lyokositji sopokatji. Nsene tu lya ko, ngatu fa.’ Ezoka tali limburura asi: ‘Kapi ngomu fa. Nye ngomu fana Karunga.’ Oyo kwa kere usili ndi? Hawe, ayo yimpempa. Nye Eva ga yi pulire. Ta tarurura enyango olyo, makura ta tameke kulidowokera. Ta gusa ko ta li, makura ta pe ko Adamu. Adamu ga yi divire asi nsene va dira kulimburukwa Karunga ngava fa, nye ga lire enyango.

Kongurova ozo, Jehova ta ya uyunga naAdamu naEva. Age ta va pura eyi vana dilire kumulimburukwa. Eva kwa pere usima ezoka, ano Adamu kwa pere usima Eva. Morwa Adamu naEva kapi va limburukwire, Jehova yipo ga va tjidire mo mosikunino. Age kwa tulire vaengeli negonga lyomundiro kosikunino yipo Adamu naEva va dire kutengwira mo.

Jehova kwa tanterere ogu ga kumbagerere Eva asi ta mu tengeke. Ogu ga uyungire naEva kapisi ezoka. Jehova kapi ga sitire mazoka asi ga uyunge. Muengeli gomudona ga ninkisire ezoka li uyunge. Age kwa yi ruganene a pukise Eva. Muengeli ogo edina lyendi Satana Muzonaguli. Komeho, Jehova nga ka zonagura po Satana yipo nga dire kukapukisa hena vantu.