Egaununo 8

Karunga kwa pitakana nkenye ogu

NOVE no yi kwatesa ko asi kweli gumwe ogu ga kara nononkondo ndi ga tu pitakana natuvenye. Yilye ogu ono kugazara ga tu pitakana natuvenye?— Jehova Karunga. Ngapi kuhamena Munwendi, Murongi goMunene? Nage ga tu pitakana ndi?— Nhi, nage hena ga tu pitakana.

Jesus kwa parukire kumwe naKarunga meguru. Age kwa kere muengeli. Karunga ga sitire ko hena vaengeli vapeke ndi?— Yimo, ga sitire mamiliyona gomanzi govaengeli. Vaengeli ava nawo kwa kara nononkondo kutupitakana ose.—Vahebeli 1:7; Ndaninyera 7:10.

Kuvhura o diworoke edina lyomuengeli ogu ga uyungire naMariya ndi?— Yige Ngabiliyera. Age kwa tanterere Mariya asi mukeke gwendi nga kara MunwaKarunga. Karunga kwa rundwilire eparu lyaMunwendi gopampepo momukoga gwaMariya yipo Jesus va vhure kumuhampuruka ngomukeke pevhu.—Rukasa 1:26, 27.

Nove wa si pura sitetu oso ndi? Nove wa yi pura asi Jesus ga parukire kumwe naKarunga meguru ndi?— Jesus ga tente asi age kwa parukire meguru. Ngapi omu ga divire Jesus kuhamena yininke oyo? Apa ga kere mumati, Mariya nampo ga mu tanterere eyi ga uyungire Ngabiliyera. Josefa nage nampo ga tanterere Jesus asi Karunga yiwo oGuhwe vene-vene.

Apa va mu kuhwire Jesus, Karunga ga uyungire kutundilira meguru asi: “Ogu yige Munwange.” (Mateusa 3:17) Ntani masiku gena komeho zonomfa dendi, Jesus kwa kanderere asi: “Tate, yererepeka nge pwamoge neyererepeko eli na kere nalyo poge, awo uzuni simpe patupu.” (Johanesa 17:5) Yimo, Jesus kwa hundilire mokutengura a ka paruke hena naKarunga meguru. Ngapi omu ga vhulire kukaparuka meguru?— Ntudi Jehova Karunga ga hepere kumuninka hena a kare muntu gopampepo ndi muengeli.

Na hara ngesi kukupura epuro lyomulyo. Vaengeli navenye vawa ndi? Ngapi omu ono kugazara?— Nare vaengeli navenye kwa kere wovawa. Morwa Jehova yige ga va sitire, ntani nayinye eyi a rugana yiwa. Nye gumwe govaengeli ta ya kara gomudona. Ngapi omu ya horokere eyi?

Mokugwana elimbururo, twa hepa kutarurura kosiruwo apa Karunga ga ungire mugara nomukadi gokuhova, Adamu naEva. Vantu vamwe kuuyunga asi esimwititi lina kwa li totere po tupu. Nye Murongi goMunene ga yi divire asi eyi kwa kere usili.

Apa Karunga ga ungire Adamu naEva, age kwa va tulire mosikunino sosiwa esi ngava tumbura asi Edeni. Aso kwa kere paradisa. Awo ngano va vhulire kureta vana wovanzi, nokutunga moParadisa narunye. Nye pwa kere sirongwa somulyo esi va hepere kulironga. Sirongwa oso twa si zogera nare. Tu ze tu tare nsene kuvhura tu si diworoke.

Jehova kwa tanterere oAdamu naEva asi awo kuvhura kulya koyiyimwa nayinye yokoyitji eyi va here yomosikunino. Nye pwa kere sitji simwe esi ngano va dilire kulya. Karunga ga va tanterere eyi ngano ngayi horoka nsene va lya kositji oso. Age kwa tente asi: ‘Ngo mu fa.’ (Genesis 2:17; 3:3) Sirongwa musinke va hepere kulironga oAdamu naEva?—

Aso kwa kere sirongwa soulimburukwi. Yimo, eparu kwa korera mokulimburukwa kwaJehova Karunga! Ayo kapi ya gwanene po kwaAdamu naEva mokutanta tupu asi awo ngano ngava mu limburukwa. Awo va hepere kulikida ulimburukwi kupitira moyininke eyi va rugene. Ngano va limburukwire kwaKarunga, awo ngano va yi likidire asi awo va mu hara ntani kwa mu harerere a kare Mupangeli gwawo. Makura awo ngano va parukire narunye moParadisa. Nye ngano va lire kositji sina, yinke ngano ya likidire?—

Ayo ngano ya likidire asi awo sili kapi va kere norupandu kweyi ga va pere Karunga. Ngano nove yipo wa kere, ngano wa limburukwire kwaKarunga ndi?— Pomuhowo, oAdamu naEva kwa limburukwire. Nye gumwe ogu ga va pitakana kwa kumbagerere Eva. Age kwa zedere Eva a dire kulimburukwa kwaJehova. Yilye mwene ogo?—

Bibeli kutanta asi ezoka kwa uyungire naEva. Nye wa yi diva asi ezoka kapi ta li vhuru kuuyunga pwalyene. Nye ngapi omu lya vhulire kuuyunga?— Muengeli yige ga yi ninkisire yi moneke ngwendi ezoka lina kuuyunga. Muengeli yige ga uyungire kapisi ezoka. Age kwa tamekere kugazara yininke yoyidona. Age kwa here oAdamu naEva va mu karere. Age kwa va harerere va rugane yininke eyi ga uyungire. Age kwa here kugusa evango lyaKarunga.

Yipo nye muengeli gomudona kwa tulire magano gepuko monondunge daEva. Kupitira mezoka, age kwa tanterere Eva asi: ‘Karunga kapi ga mu tantera usili. Kapi ngo mu fa nsene mu lya kositji. Ngomu kara nonondunge ngwendi Karunga.’ Ove ngano wa pulire eyi lya uyungire ezwi lina ndi?—

Eva ta tameke kuhara yininke eyi ga dilire kumupa Karunga. Age kwa lire siyimwa sokositji esi vava silikire. Makura ta pe ko Adamu. Ano Adamu kapi ga pulire eyi lya tente ezoka. Nye eharo lyendi lyokukara naEva kwa kere nononkondo kupitakana eharo lyendi lyokuhara Karunga. Makura nage ta li kositji.—Genesis 3:1-6; 1 Timoteusa 2:14.

Yisinke ya kere yitundwamo?— Adamu naEva kapi va kere hena wokusikilira mo, awo kwa kurupire ntani tava fu. Morwa awo kapi va sikilire mo, vana vawo navenye nawo tava kara wokudira kusikilira mo ntani moruhura tava ya kurupa nokufa. Karunga kapi ga kumbagerere! Eparu sili kwa korera mokumulimburukwa. (Varoma 5:12) Bibeli kututantera asi muengeli ogu ga kumbagerere Eva kumutumbura asi Satana Muzonaguli, ntani vaengeli vapeke ava va ya kere wovadona kuvatumbura asi nompepo donondona.—Jakopo 2:19; Ehororo 12:9.

Ono yi kwate nye egano eyi muengeli gomuwa ogu ga sitire Karunga ga ya karerere gomudona ndi?— Morwa age kwa tamekere kugazara yininke yoyidona. Muzonaguli kwa here kukara gomuhowo. Age ga yi divire asi Karunga kwa tanterere oAdamu naEva va rete vana ntani Muzonaguli kwa here hena ngano navenye va mu karere. Age kuna hara kuninkisa nkenye ogu mokudira kulimburukwa kwaJehova. Age kuhetekera ko kutura magano gomadona monondunge detu.—Jakopo 1:13-15.

Muzonaguli kuuyunga asi kwato ogu sili ga hara Jehova. Age kuuyunga asi nove name kapi twa hara Karunga ntani asi kapi sili tuna hara kurugana eyi a tanta Karunga. Ntani hena asi ose kulimburukwa tupu kwaJehova nsene yininke yina tu wapere. Muzonaguli mouhunga ga kara ndi? Yimo sili twa kara ngoso ndi?

Murongi goMunene kwa tente asi Muzonaguli munayimpempa! Jesus ga yi likidire nawa-nawa asi age ga here Jehova pokumulimburukwa. Ntani Jesus kapi ga limburukwire tupu Karunga apa ya mu waperere yininke. Age ga limburukwire kwaKarunga nkenye apa, nampili ngomu vapeke va yi mu digopekeserere. Age ga limburukwire Jehova dogoro konomfa dendi. Eyi yiyo ga mu pindwilire Karunga koufe nokumuninka a paruke narunye.

Omu ono kugazara, yilye nkore zetu zonene?— Yimo, age kuna kara Satana Muzonaguli. Kuvhura kumumona ndi?— Hawe! Nye twa yi diva asi age yipo ga kara ntani ga kara nononkondo kutupitakana natuvenye. Nye yilye ga pitakana Muzonaguli?— Jehova Karunga. Twa yi diva asi Karunga kuvhura kutupopera.

Resa kuhamena ogu twa hepa kukarera: Deuteronomium 30:19, 20; Josuwa 24:14, 15; Yisewe 27:11; ntani Mateusa 4:10.

[Efano pepenuno 47]

Yisinke nampo oMariya naJosefa va tanterere Jesus?

[Efano pepenuno 48, 49]

Ngapi ngano omu oAdamu naEva va vhulire kuparuka narunye moParadisa?

[Efano pepenuno 50]

Yilye ga ninkisire ezoka li uyunge naEva?

[Mafano pepenuno 50]

Yisinke ya horokerere oAdamu naEva konyima zapa va dilire kulimburukwa kwaKarunga?