Kapi vana kara hena noutjirwe kuhamena uhura
KOYIHA yomvhura 1970, Gary naKaren kwa gazarere asi uhura wouzuni pepi una kara. Yipo va dirukire mo mositata ntani nokutokora kukaliruganena yininke yavene. Awo kwa here kuparuka.
Mokugwana udivi ou va hepere, awo kwa rende nobuke nokuza konosikora ntani nokupura vantu wovanzi. Awo kwa tapekere sikunino soyikwahidi ntani noyitji yomanyango yokusika po-50. Ntani awo kwa pungwire nombuto noyiruganeso. Awo kwa lirongere kukuna nombuto ntani nokupungura nondya. Kaume kawo kwa va rongere omu ava dipaga yikorama nokuteta nyama zayo ntani nomu nava zi zeresa. Karen kwa lirongere mokudimburura yimeno ntani nonondandani mowiza yipo va vhure kuyilya nsene kapi vana kara nonondya. Gary kwa lirongere mokurugana maholi gokutunda kepungu, nokurugana esuga lyoyipirangi ntani nokudika nzugo zamwene zoyitji.
Karen kwa tente asi: “Morwa ukarodona wouzuni posiruwo sina, ame kwa lizuvhire asi uhura pepi una kara.” Gary kwa fatwilire asi: “Ngwendi vadinkantu vapeke, ame kwa hamenenene konombunga edi da hetekerere ko kuhagekesa po malitondororo gonomuhoko noyita yaVietnamu ntani nepiyagano. Nye konyima naya yi fire unye. Ayo kwa monekerere nge asi nsene yininke yi twikira ngorooro vantu ngava lizonagura po tupu vene.”
Gary kwa tente asi: “Esiku limwe, ame kwa kere nosiruwo sosinzi, yipo na gusire Bibeli nokuresa mo kutundilira mwaMateusa dogoro kEhororo. Masiku gane aga ga kweme ko, ame kwa zi resere hena. Ano kongurangura mezuva lyautano, tani tantere Karen asi: ‘Ose kuna kuparuka pomazuva gopouhura. Karunga ntaantani nga zerese evhu eli. Twa hepa kugwana owo ngava paruka.’ ” Gary ntani naKaren kwa tamekere kuza komaukarelikarunga gokulisiga-siga, mokupapara vantu owo va here kuliwapaikira uhura.
Ezuva limwe, gumwe goNombangi daJehova kwa wizire pembo lyawo makura tava tameke kulironga Bibeli. Karen ta diworoka asi: “Ame kwa yi haferere morwa Matjangwa kwa ga fatwilire nge nawa. Usili wokuhamena uhura yiwo na paparere ano nau gwene. Na kere nehuguvaro lyokupama kuhamena meho. Ano hena na tamekere kutunga po elikwatakano naGuhyetu gemeguru, Musiti, Karunga goyininke nayinye.”
Gary kwa tente asi: “Eparu lyange kwa ya kere nositambo sene-sene. Apa tupu na tamekere kulironga Bibeli, kapi na vhulire kuhageka. Na resere uporofete woBibeli, nokukonakona maumbangi aga ga ya sikilira mo, ntani nokukara nepuro asi Karunga ntantaani nga rugane ko yuma. Ame kwa gazarere asi: ‘Vantu va hepa kuliwapaikira ngesi, kapisi kosimpagwa, nye keparu eli ga tu harera Karunga.’ ” Gary ntani naKaren kwa tere meho nehuguvaro lyewa. Mevango lyokukara nosinka kuhamena uhura wouzuni, awo kwa kere nehuguvaro asi Karunga nga ya gusa po maruhepo aga gana kurorora vantu ntani nokutengwidira evhu li kare hena paradisa.
Ngesi nomvhura 25 da ka pita, yisinke vana kurugana oGary naKaren? Karen kwa tanta asi: “Ame kuna kutwikira kutunga po eharo lyokuhara Jehova Karunga nokumuhuguvara ntani nokuvatera vapeke nawo va rugane yokulifana. Name naGary kulivatera ngomu tuna kupameka epata lyetu tu karere Karunga mouumwe. Ose kuruganena kumwe ntani nokukondjera kurerupika eparu lyetu yipo tu vhure kuvatera vakwetu ntani nokupakera sinka yihepwa yawo.”
Gary kwa tanta asi: “Ame kukanderera nkenye apa asi Uhompa waKarunga u wize yipo u retere rufuwo komamiliyona govantu. Nkenye apa ani lihameke moyirugana yokuzuvhisa mbudi zongwa zoUhompa waKarunga, ame kukanderera asi ni tantere ko nampili muntu gumwe ehuguvaro eli lya kara moBibeli. Nomvhura 25 da ka pita, Jehova kwa limburura ekanderero olyo. Name naKaren twa yi pura asi Jehova ntaantani nga ka rete marunduruko gomanene pevhu, nye kapi hena tuna kara noutjirwe kuhamena uhura.”—Mateusa 6:9, 10; 2 Peturusa 3:11, 12.
[Efano lyepepenuno 9]
Ngesi oGary naKaren kuna kuhafera kuvatera vapeke va gwane ehuguvaro eli lya kara moBibeli