Uumwe kuna kara sidimbwiliso soukareli wousili
“Ngani mu pongeka kumwe ngwendi nonzwi mosiunda.”—MIKA 2:12.
1. Ngapi omu yisitwa ayi horora unkurungu waKarunga?
MUEPISAROME kwa tente asi: “HOMPA, hawe, yininke eyi wa rugana yinzi! Ee, yireru omu wa yi rugana nounkurungu! Uzuni kwa zura yisitwa yoge.” (Epis. 104:24) Unkurungu waKarunga kuumonena omu aga paruka kumwe mamiliyona gokulisiga-siga goyitji noyimbumburu noyikorama ntani notunamwenyogona otu twa kara mevhu. Ntani hena morutu roge, mwa kara maruha gomanene naga gomanunu, nagenye kuruganena kumwe yipo o kare gwandjewa-ndjewa.
2. Morwasinke uumwe womombungakriste zomouye wokuhova wa karerere wopasitetu?
2 Jehova kwa ungire vantu va ruganene kumwe. Vantu kwa lisiga moyikara ntani nomoudivi. Ntani hena age kwa pere vantu wokuhova yikara yokufana ngwendi yendi eyi ya va vhulikisire va ruganene kumwe. (Gen. 1:27; 2:18) Nye ngesi vantu navenye vana linapa ko kwaKarunga ano kapi vana kuvhura kuruganena hena kumwe. (1 Joh. 5:19) Yipo nye, pokumona asi mombungakriste zomouye wokuhova kwa kere mo vantu wokonontundiliro dokulisiga-siga ngwendi vapika womoEfeso novakadi woVagereka womadina, novagara woVajuda wokulironga ntani nava ngava karere nare yikarunga yoyimpempa, eyi kulikida asi uumwe wawo kwa kere wopasitetu.—Yirug. 13:1; 17:4; 1 Tes. 1:9; 1 Tim. 6:1.
3. Ngapi omu Bibeli za faturura uumwe woVakriste ntani yisinke natu ka konakona mosirongwa esi?
3 Ukareli wousili kuvhulikisa vantu va ruganene mouumwe ngwendi maruha gomarutu getu. (Resa 1 Vakolinte 12:12, 13.) Yitwa yimwe natu ka konakona mosirongwa esi kuna kara: Ngapi omu ukareli wousili au reta vantu mouumwe? Morwasinke ya karera asi Jehova gelike gokuvhura kureta kumwe mamiliyona govantu wokonomuhoko nadinye? Yilimbikiso musinke eyi a tu vatere Jehova tu yi funde po yipo tu kare mouumwe? Kombinga zouumwe, ngapi omu Vakriste wousili va lisiga nava ava litumbura vene asi Vakriste?
Ngapi omu ukareli wousili au reta vantu mouumwe?
4. Ngapi omu ukareli wousili au reta vantu mouumwe?
4 Vantu ava va kara moukareli wousili awo va yi kwata egano ntani nokuyitambura asi morwa Jehova yige ga sita nayinye, age ga wapera kukara Mupangeli gwanayinye. (Ehor. 4:11) Nampili ngomu Vakriste wousili va kara mononkarapamwe ntani nomonomukaro dokulisiga-siga, awo navenye kulimburukwa noveta daKarunga ntani nokuparuka kuliza nonompango doBibeli. Vakareli navenye wousili kutumbura Jehova asi “Guhyetu.” (Jes. 64:8; Mat. 6:9) Yipo nye, awo vanavazinyetu wopampepo ntani kuvhura kuhafera uumwe ou ga singonona muepisarome asi: “Ee, yireru omu ya wapa ayo ya tovara yokukara vantu vaKarunga kumwe ngwendi vantu namumbyendi!”—Epis. 133:1.
5. Sikara musinke a si retesa po uumwe movakareli wousili?
5 Nampili ngomu Vakriste wousili va dira kusikilira mo, awo kukarera kumwe mouumwe morwa va lironga kulihara-hara. Jehova kuvaronga mokulihara-hara, ano kwato gumwe na vhura kuyirugana oyo. (Resa 1 Johanesa 4:7, 8.) Nonkango dendi kutanta asi: “Kareni nonkenda nombili nomalinunupiko nekuruko nezaverero. Omu lididimike-didimikire, tomu ligusa-gusire po, nsene muna lizono namukweni. Omu dongwenene po vakweneni moomu ga mu dongwenena po Hompa. Mwanayinye kareni neharo eli lya kwata nayinye kumwe, nomalikwata-kano gene-gene.” (Koros. 3:12-14) Eharo eli kuna kara sikara esi a si dimbwilisa Vakriste wousili. Yosili nove wa yi limonenena nyamoge asi uumwe kuna kara sidimbwiliso soukareli wousili.—Joh. 13:35.
6. Ngapi omu kuhuguvara moUhompa ayi tu vatere tu hafere uumwe?
6 Vakareli wousili awo kwa kara hena mouumwe morwa awo kwa huguvara tupu moUhompa waKarunga. Awo va diva asi Uhompa waKarunga ntaantani ngau ya guse po mapangero govantu ntani nokuretera vantu wovalimburukwi mbili zene-zene zanarunye. (Jes. 11:4-9; Ndan. 2:44) Vakriste kukwama epukururo eli ga tanterere Jesus vasikuli vendi asi: “Awo kapisi wouzuni, moomu na dira kukara ame gouzuni.” (Joh. 17:16) Vakriste wousili kapi ava lihameke mo moyita yomouzuni, ano morwa oyo awo kukara mouumwe nampili vantu moyita vana kara.
Ntundiliro zerongo lyopampepo
7, 8. Monkedi musinke erongo lyomoBibeli ali gwederere kouumwe wetu?
7 Vakriste womouye wokuhova kwa haferere uumwe morwa awo kwa gwene makorangedo kontundiliro zimwe tupu. Awo va yi nongwenene asi Jesus nga rongo nokugava mavyukiso mombungakriste kupitira mombungagendesi, omu mwa hamenene vapositoli novakurona womoJerusarema. Vagara ava womupampi ngava tokora kuliza noNonkango daKarunga ntani awo kwa kere novatareli ava ngava twara mapukururo gawo konombungakriste moyirongo yoyinzi. Kuhamena vatareli vamwe owo, Bibeli kwa tanta asi: “Va gendagura ngoso moyitata, tava gava nompangera edi va penge vapositoli novakurona moJerusarema, tava va tantere asi ava di sikise mo.”—Yirug. 15:6, 19-22; 16:4.
8 Mokulifana nanaina, Mbungagendesi omu mwa hamena Vakriste wovagwavekwa kugwederera kouumwe wonombungakriste uzuni mudima. Mbungagendesi kupwagesa yimbapiratjangwa momaraka gomanzi mokugava makorangedo gopampepo. Nondya edi dopampepo kutundilira moNonkango daKarunga. Yipo nye, erongo olyo kapisi kovantu ali tundu nye kwaJehova.—Jes. 54:13.
9. Ngapi omu sirugana esi ga tu pa Karunga a si tu vatere tu kare mouumwe?
9 Vatareli womombungakriste nawo kugwederera kouumwe pokupitisira moyirugana yokuzuvhisa. Malikwatakano gomanene aga ga kara pokatji kava ava ruganene kumwe moyirugana yaKarunga ga pama kupitakana aga ga kara pokatji kovantu womouzuni. Mbungakriste kapi va zi tulisire po mokuyapongasana tupu novakwetu, nye mokufumadeka Jehova nokusikisa mo sirugana sokuzuvhisa mbudi zongwa nesi sokutura po varongwa ntani nokutunga mbungakriste. (Rom. 1:11, 12; 1 Tes. 5:11; Heb. 10:24, 25) Yiyo ga tantererere mupositoli Paurusa Vakriste asi: “Tomu lizi mutjima gumwe, asi tomu rwire epuro lyokupura Mbudi zoNgwa nompepo zimwe tupu.”—Fil. 1:27.
10. Mononkedi musinke dimwe omu twa kara mouumwe ngovantu vaKarunga?
10 Ngovantu vaJehova, ose kwa kara mouumwe morwa twa tambura upangeli waJehova nokuhara vanavazinyetu nokukara nehuguvaro moUhompa waKarunga ntani nokufumadeka ava a ruganesa Karunga mokutupitisira. Morwa kudira kusikilira mo kwetu, Jehova kutuvatera tu rundurure nonkareso detu dimwe edi twa kara nado nadi vhura kudonganesa po uumwe wetu.—Rom. 12:2.
Funda po elinenepeko nomfudu
11. Morwasinke elinenepeko ali gawinine vantu, ntani ngapi omu Jehova a tu vatere tu li funde po?
11 Elinenepeko kugaununa vantu. Muntu gokulinenepeka age kulitara mwene asi mulyo ntani age kugwanena mo mauwa gamwene pokulikanganga. Nye eyi narunye kudonganesa po uumwe morwa ava vana kuzuvha elikangango lyendi kuvhura va kare nomfudu. Murongwa Jakopo kuna kuvyukilira kututantera asi: “Malitumbadeko nagenye ogo kwa puka.” (Jak. 4:16) Ayo kapi ya wapa mokutekura vakweni asi awo kwato mulyo. Yosili, Jehova kutupa sihonena selinunupiko monkedi omu a tu tekura ose vantu wokudira kusikilira mo. Ndafita kwa tjenge asi: ‘HOMPA [elinunupiko, NW] lyoge lya zerura nge.’ (2 Sam. 22:36) Nonkango daKarunga kutuvatera tu funde po elinenepeko pokuturonga tu kare nomagazaro gomawa. Paurusa kwa pulire asi: “Yilye ogu a ku zerura! Yinke eyi wa kara nayo eyi ga dira kukupa Karunga? Ano nsene asi kwa yi ku pa, kuyitangarera yinke, ayo ya hana asi yamwaamoge?”—1 Kol. 4:7.
12, 13. (a) Morwasinke ya karera ureru mokukara nomfudu? (b) Nsene tu tara vakwetu ngwendi moomu ava tara Jehova, yisinke nayi horoka?
12 Mfudu kuna kara hena silimbikiso souumwe. Morwa kudira kusikilira mo kwetu natuvenye kwa kara “nonkareso zomfudu,” ano nampili Vakriste va kara siruwo sosire mousili poyiruwo yimwe kufira mfudu maukaro noyiweka noyitumbukira ndi udivi ou va kara nawo vakwawo. (Jak. 4:5, NW) Pasihonena, munazinyetugara ogu ga kara novana kuvhura a fire mfudu yitumbukira yopampepo eyi ga kara nayo muzuvhisi goUhompa gosiruwo nasinye, nye age ga hana kuyinongonona asi muzuvhisi ogo pamwe nage kuna kufira mfudu mugara ogu ga kara novana. Ngapi omu natu nyokera po mfudu zangoso zi dire kudonganesa po uumwe wetu?
13 Mokutuvatera tu nyokere po mfudu, tu diworokeni asi Bibeli kuhetakanesa Vakriste wovagwavekwa komaruha gorutu. (Resa 1 Vakolinte 12:14-18.) Pasihonena, nampili ngomu eho lyoge yilyo ali moneka po kupitakana mutjima goge, nayinye kwa kara nomulyo. Mokulifana, navenye womombungakriste mulyo kwaJehova nampili ngomu yiruwo yimwe vamwe kuvhura kukara noyitumbukira kupitakana vakwawo. Yipo nye, twa hepa kutara vanavazinyetu ngamoomu ava tara Jehova. Mevango lyokufira mfudu vakwetu, twa hepa kuvapakera mbili ntani nokulikida elituromo mwawo. Pokuyirugana ngoso, ose ngatu likida malisigo pokatji koVakriste wousili ntani nonongereka edi adi litumbura asi Vakriste.
Ava ava litumbura asi Vakriste awo kwa ligaunuka
14, 15. Ngapi omu Vakriste wovarwanesi va ya ligaunuka?
14 Uumwe ou va kara nawo Vakriste wousili kwa lisiga nonyengo ezi za kara monongereka dava ava litumbura asi Vakriste. Mouye waune, Vakriste wovarwanesi kwa lihene unene dogoro mupangeli goVaroma gomupagani ta kara mugendesi gwawo makura tava ligwederere. Sinzi somauhompa aga ngaga kwama ukareli woVaroma kwa ya ligusire ko nokutota po maukarelikarunga gosirongo ndi gomuhoko gwawo.
15 Sinzi somauhompa ogo ngaga lirwisa gene nagene nomvhura nonomvhura. Mouye 17 nou 18, vantu womoBritania nomoFransa ntani nomoAmerika kwa ligeve unene kosirongo sawo, yipo nye lya kere elitondororo lyonomuhoko ngwendi ukarelikarunga wawo. Mouye 19 nou 20 elitondororo lyonomuhoko kwa kere momagano govantu wovanzi. Moruhura, nongereka dava ava litumbura asi Vakriste kwa ya ligawinine motumbunga, sinzi twato kwa pulisilire elitondororo lyonomuhoko. Vanangereka kuza koyita mokurwanesa vanangereka vakwawo womomuhoko gwapeke. Yipo nye, naina ava ava litumbura asi Vakriste kwa ligaunuka, vamwe kukwatesa ko unene ukarelikarunga ano vapeke kukwatesa ko elitondororo lyonomuhoko.
16. Nompata musinke da gaununa owo ava litumbura asi Vakriste?
16 Mouye 20, nombunga dononzi dava ava litumbura asi Vakriste kwa hetekerere ko kulipakakerera kumwe asi va kara mouumwe. Nye konyima zonomvhura dononzi dokuhetekera ko, nongereka dononsesu tupu da ya lipakererere kumwe nye nampili ngoso vahameni mo vamo simpe kwa ligaunuka morwa nompata kuhamena elisinto nokuligusa ezimo nokulirara-rara mugara nomugara ndi mukadi nomukadi ntani novakadi wokupitisira moukarelikarunga. Nye moyirongo yimwe yava ava litumbura asi Vakriste, vampitisili wonongereka kuhetekera ko kureta kumwe vantu womonombunga dokulisiga-siga pokunyokera po marongo aga ga va gawinine nare. Nye pokurugana ngoso, awo kuninkisa vantu va dire kukara nepuro ntani ayo kapi ayi reta po uumwe.
Ukareli wousili kugusa po malitondororo
17. Yinke va pumbire kuhamena ukareli wousili omu ngau reta vantu mouumwe “momazuva ogo gana kuwiza”?
17 Nampili ngomu vantu naina vana ligaunuka kupitakana pwanare, vakareli wousili simpe kuna kuvadimbwilisa kouumwe. Muporofete gwaKarunga Mika kwa pumbire asi: “Ngani mu pongeka kumwe ngwendi nonzwi mosiunda.” (Mika 2:12) Mika kwa pumbire hena elisigo lyenene pokatji koukareli wousili nomaukarelikarunga gapeke, ga kare asi goyikarunga yoyimpempa ndi kukarera sirongo ngakarunga gwawo. Age kwa tjenge asi: “Momazuva ogo gana kuwiza ndundu apa za kere ntembeli ngazi kara zonde unene kupitakana nadinye, tazi litumbu mo monondundugona nadinye. Nomuhoko dononzi ngadi dukira kwazo. Nkenye muhoko kutongamena tagu limburukwa karunga gwago, nye ose ngatu tongamena, tatu limburukwa HOMPA Karunga gwetu.”—Mika 4:1, 5.
18. Marunduruko musinke wa tu vatera ukareli wousili tu ture po?
18 Mika ga sigwenene hena omu ukareli wousili ngau reta mouumwe ava va kare nare nonkore. “Ano vantu vado ngava tanta asi: ‘Tu rondeni kondundu zaHOMPA, kontembeli zaKarunga gwaIsraeli. Yeeyi age nga tu ronga eyi ana tu harere asi tu yi rugane; ngatu genda mononzira edi ga horowora.’ . . . Nomfuro dawo ngava di hambura yipururu ano magonga gawo matemo. Nomuhoko narumwe si hena kuza koyita, narumwe si hena kuliwapaikira yita.” (Mika 4:2, 3) Owo ava zumbu ukareli woyikarunga ndi wonomuhoko va tambure ukareli waJehova, awo kuhafera uumwe. Karunga kuvaronga monkedi zeharo.
19. Yisinke una kulikida uumwe womamiliyona govantu moukareli wousili?
19 Uumwe wanaina woVakriste wousili womouzuni mudima kwa likarera ntani awo kulikida asi Jehova kuna kutwikira kugendesa vantu vendi kupitira mompepo zendi. Vantu wovanzi wokonomuhoko nadinye kuna kara mouumwe kupitakana pwanare. Eli kuna kara esikiliromo lyenene lyeyi va tumbura mEhororo 7:9, 14 ntani alyo kulikida asi vaengeli vaKarunga ntaantani tupu ngava pwagese “nompepo” edi ngadi hanagura po uzuni ou woudona. (Resa Ehororo 7:1-4, 9, 10, 14.) Ee, mfumwa musi zokukara mouumwe novanavazinyetu uzuni mudima! Ngapi omu nkenye gumwe gwetu na gwederera ko kouumwe owo? Oyo ngatu ka yi konakona mosirongwa sokukwama ko.
Ngapi omu no vhura kulimburura?
• Ngapi omu ukareli wousili au reta vantu mouumwe?
• Ngapi omu natu nyokera po mfudu zi dire kudonganesa po uumwe wetu?
• Morwasinke elitondororo lyonomuhoko lya dira kugaununa Vakriste wousili?
[Efano lyepepenuno 16]
Vakriste womouye wokuhova kwa tundililire konontundiliro dokulisiga-siga
[Mafano gepepenuno 18]
Ngapi omu kuvatera petungo lyoSinyanga soUhompa ayi gwederere kouumwe?