Lirongera ko kononkango daKarunga

Yilye Jesus Kristusa?

Sirongwa esi tasi ka tumbura mapuro gamwe aga nampo wa lipura nokukakulikida asi kupi oku no vhura kuresa moBibeli zoge o gwane malimbururo. Nombangi daJehova nava ka yi hafera pokukazogera kumwe nove malimbururo ogo.

1. Yilye Jesus Kristusa?

Mokulisiga novantu, Jesus kwa parukire meguru ngosisitwa sopampepo komeho va ya mu hampuruke pevhu. (Johanesa 8:23) Yige muhoverera koyisitwa yaKarunga, ntani nage kwa vaterere mokusita yininke nayinye yapeke. Age yige gelike ga sitire Jehova pwagelike ano kumutumbura asi MunwaKarunga “a huru.” Jesus kwa kere Muuyungilipo gwaKarunga, yiyo ava mu tumbwire asi “Nkango.”—Johanesa 1:1-3, 14; resa Yisewe 8:22, 23, 30; Vakorosi 1:15, 16.

2. Morwasinke ga wizililire Jesus pevhu?

Karunga kwa tumine Munwendi pevhu pokurundwilira eparu lyendi momukoga gomukadona goMujuda gedina Mariya. Yipo nye, Jesus kapi ga kere noguhwe wopanyama. (Rukasa 1:30-35) Jesus kwa wizire pevhu (1) mokuyaronga usili kuhamena Karunga (2) mokuyatulisa po sihonena omu natu rugana mpango zaKarunga (3) mokuyagava mwenyo gwendi gokusikilira mo gu kare “sizoweseso.”—Resa Mateusa 20:28; Johanesa 18:37.

3. Morwasinke twa hepera sizoweseso?

Sizoweseso kuna kara mfeto zokufuta mokuzowora muntu monomango. Nye nomfa noukurupe kapi ya kere sitambo saKarunga kovantu. Ngapi omu tuna yi diva oyo? Karunga kwa tanterere, mugara gokuhova Adamu asi nsene a rugana eyi za tumbura Bibeli asi nzo, age nga fa. Ngano Adamu kapi ga zonene, kapi ngano ga fire. Nampili ngomu Adamu ga ya fire konyima zonomvhura dononzi, age ga tamekere kufa kutunda kezuva eli ga dilire kulimburukwa kwaKarunga. (Genesis 2:16, 17; 5:5) Adamu ga reterere ruvharo rwendi narunye nzo nonomfa. Yipo nye nomfa “da lihanena” movantu navenye kupitira mwaAdamu. Yiyo nye twa hepera sizoweseso.—Resa Varoma 5:12; 6:23.

4. Morwasinke ga filililire Jesus?

Yilye ga vhulire kufuta sizoweseso mokutuzowora mo monomfa? Nsene muntu ana fu age kufuta mfeto zononzo dendi. Kwato muntu gokudira kusikilira mo na vhura kufutira po vakwawo nonzo dawo.—Resa Episarome 49:7-9.

Ngomu ga dilire Jesus kupinga nzo koguhwe wopanyama, age ga fire nye kapisi morwa nonzo damwene nye morwa nonzo dava wopeke. Karunga kwa tumine Munwendi a ya tu fire eyi kulikida eharo lyendi lyenene kovantu. Jesus hena kwa tu likidire eharo pokulimburukwa koGuhwe ntani mokugava eparu lyendi morwa nonzo detu.—Resa Johanesa 3:16; Varoma 5:18, 19.

5. Yisinke ana kurugana ngesi Jesus?

Pokuverura vaveli nokupindura vantu koufe nokupopera vantu moyiponga, Jesus kwa likidire eyi nga ka ruganena komeho vantu navenye wovalimburukwi. (Rukasa 18:35-42; Johanesa 5:28, 29) Konyima zapa ga fire Jesus, Karunga kwa mu tengwidire keparu ngosisitwa sopampepo. (1 Peturusa 3:18) Makura Jesus kwa ndindilire korulyo rwaKarunga dogoro noku Jehova ga mu pere nonkondo dokupangera ngaHompa evhu nalinye. (Vahebeli 10:12, 13) Ano ngesi Jesus kuna kupangera ngaHompa meguru, ano vasikuli vendi vepevhu kuna kudivisa mbudi zongwa uzuni mudima.—Resa Ndaniyera 7:13, 14; Mateusa 24:14.

Ntaantani tupu Jesus nga ka ruganese nonkondo dendi ngaHompa mokugusa po ruhepo narunye ntani nava ava ru retesa po. Mamiliyona govantu ava vana kutura epuro mwaJesus ntani nokumulimburukwa ngava ka hafera eparu moparadisa pevhu.—Resa Episarome 37:9-11.

Komauzera gomanzi, tara egaununo 4 mobuke ezi Yinke azi rongo Bibeli sili?, va nduruka Nombangi daJehova.

[Efano lyepepenuno 11]

Mamiliyona govantu ava vana kutura epuro mwaJesus ntani nokumulimburukwa ngava ka hafera eparu moparadisa pevhu