Yilye Joba?

Joba kwa tungire mosirongo saUsa, ntani nga karere Jehova. Age kwa kere ngawo zonene ntani nepata lyenene. Joba kwa kere muntu gombili, nga vatere vahepwe novakadi wokufisa vagara vawo ntani nononsigwe. Nampili ngomu Joba nga rugana yoyiwa, eyi kapi yina kutanta asi kapi ga ligwanekerere nomaudigu.

Satana Muzonaguli nga tarere Joba, nye Joba kapi ga yi divire. Jehova ta pura Satana asi: ‘Kapi ono mono ko mukareli gwange Joba ndi? Pevhu kwato ogu ga mu fana. Age kulimburukwa nge ntani kurugana yoyiwa.’ Satana ta limburura asi: ‘Yimo, Joba kukulimburukwa. Ove kumupopera nokumutungika. Yiyo wa mu pa sirongo noyimuna yoyinzi. Nye nsene o yi mu gusa, nga hageka kukukarera.’ Jehova ta tanta asi: ‘Joba gogo, mu heteka, nye kapisi o mu dipage.’ Morwasinke Jehova ga pulisilire Satana a heteke Joba? Morwa ga yi divire asi Joba mulimburukwi.

Satana kwa hetekere Joba noyimpagwa yokulisiga-siga. Sokuhova, age kwa tumine Vasabeya va ka vake nongombe noyindongi yaJoba. Sauvali, mundiro kwa dipagere nonzwi dendi. Sautatu, mbunga zoVakalidiya, kwa veke nongameru dendi. Vakareli ava va lisire yimuna oyo nawo kwa va dipagere. Taku kwama mbudi zondona unene. Nzugo kwa gwililire vana vaJoba makura navenye tava fu. Joba kwa guvire unene, nye kapi ga hagekere kukarera Jehova.

Satana kwa here Joba a hepe unene, yiyo ga mu zugumine masina morutu rwendi narunye. Joba kwa zuvhire kukora kokunene. Age kapi ga divire konda zeyi ya horokerere nayinye oyo. Nampili ngoso, age simpe ga karerere Jehova. Karunga ga mwene nayinye oyo, ntani ga haferere Joba.

Moruhura, Satana kwa tumine vagara vatatu va ka heteke Joba. Awo kwa mu tanterere asi: ‘Walye kwa zona yiyo wa heteka kuhoreka nonzo doge. Karunga kuna kukutengeka.’ Joba ta tanta asi: ‘Kwato eyi na zona.’ Nye Joba ta lipura asi walye Karunga ana kumuretera maudigu ntani nokumuhepeka.

Mugara gedina Elihu kwa mwenene a purakene eyi va uyungire vagara vatatu naJoba. Makura yipo ga tente asi: ‘Namuvenye eyi muna uyunga epuko. Jehova ga tu pitakana mounongo. Age narumwe si kurugana udona. Age kumona nayinye ntani kuvatera vantu komaudigu gawo.’

Makura Jehova ta uyungisa Joba. Ta mu pura asi: ‘Nove yipo wa kere apa na sitire eguru nevhu ndi? Morwasinke ono kuuyungira asi ame kuna kukuhepeka? Ove kuna kuuyunga tupu, nye kapi ono diva eyi gana kuhorokera maudigu.’ Joba ga tambwire epuko lyendi nokutanta asi: ‘Ame na lipuka. Ame kwa ku zuvha tupu, nye ntaantani nina kudiva. Ove kwato eyi ayi ku vhuru. Gusira nge po kweyi nina uyunga.’

Maheteko apa ga pwire, Jehova ta verura Joba nokumupa ungawo wounzi. Joba kwa parukire siruwo sosire. Age kwa mu tungikire morwa kwa limburukwire Jehova nampili momaudigu. Kuvhura o kare ngwendi Joba nokukarera Jehova nampili momaudigu ndi?