Omu no ronga vanona kuhamena Karunga —Nondongeseso musinke donongwa po?

“Nye narumwe si asi o divare nompangera edi nina kukupa naina. O di ronge vana woge. To di va sansekere nsene membo ono kara ndi morugendo ndi kuna pwizumuka ndi to rugana.”—DEUTERONOMIUM 6:6, 7.

VAKURONA poyiruwo yimwe kulizuvha asi yina va vhukire yokudeura vana vawo. Apa ava papara mapukururo, awo kuvapiyaganesa magano gokulisiga-siga aga ava zuvhu nokuresa. Vanekoro novakaume nawo va hara kugava magano gawo. Nobuke noyifo nomalikwamo gokointerneta kugava magano gomanzi kovakurona.

Bibeli kapi tupu azi gava kovakurona mapukururo gokuhuguvara kweyi nava ronga vana vawo nye hena mavyukiso goparugano omu nava vhura kuvaronga. Ngwendi moomu zina yi uyunga zina velise zomoBibeli, vakurona va hepa kupapara nonkedi nkenye ezuva mokuzogera novana vawo kuhamena Karunga. Pana kara magano gane gokutunda moBibeli aga ga vatera mayovi govakurona mokuronga vana vawo kuhamena Karunga.

1. Varonga kuhamena usintwe. Mupositoli Paurusa kwa tjenge asi: “Nkareso zendi ezi azi dili kumoneka, nononkondo dendi danarunye noukarunga wendi, ha wa twa uzuni kuyimonena moyirugana yendi.” (Varoma 1:20) Vakurona kuvhura va vatere vana vawo mokutura po elikwatakano naKarunga pokuvalikida yisitwa yaKarunga nokuvavatera va kwate egano eyi ayi horora kuhamena yikara yaKarunga.

Jesus kwa ruganesere ndongeseso ozo apa ga rongere varongwa vendi. Pasihonena age kwa tente asi: “Komu tara si yidira: ayo kapi ayi kunu, kapi ayi zangura, hena kapi ayi pongaikire moyihete, nye Guhyeni gemeguru ta yi rere. Nani one kapi mwa yi pitakana mefumano?” (Mateusa 6:26) Apa Jesus kwa nkondopekere sikara saJehova seharo nonkenda. Nye kwa rugene ko hena yoyinzi. Age kwa vaterere varongwa vendi va gazadare ko omu Karunga a likida yikara oyo kovana vendi.

Hompa Saromo gonondunge kwa uyungire kuhamena unongo wokulikarera ou ga pa Karunga kouhwa ntani age kwa ruganesere uhwa owo mokuronga sirongwa somulyo. Age kwa tjenge asi: “Ove mudwa, zende kouhwa o ka tare nonzira dawo o ka gwane ko nondunge. Mpili kapi wa paka mupangi ndi foromani ndi mupangeli, nye awo nondya kudipungura pokurombo, ano pokuteza tau lipongaikire yokulya.” (Yisewe 6:6-8) Azo kuna kara nkedi zongwa mokuronga mulyo gokulitulira po yitambo yomulyo ntani nokuruganesa nonkondo edi ga tu pa Karunga mokuyisikisa mo!

Vakurona kuvhura va honene ndongeseso zongwa zaJesus nezi zaSaromo pokurugana eyi: (1) Va pure vana vawo yimeno noyikorama eyi va hara. (2) Va lironge yoyinzi kuhamena yimeno noyikorama oyo. (3) Va lirongere ko kuhamena Karunga koyisitwa oyo.

2. Honena nkareso zaJesus kowo nga rongo. Kovantu navenye va paruka pevhu, Jesus yige ga uyunga po yomulyo po. Age nga pura mapuro. Age kwa here kudiva magano nomalizuvho gowo nga rongo. (Mateusa 17:24, 25; Marukusa 8:27-29) Mokulifana, vakurona va kara noyirongwa yoyinzi yomulyo yokuronga vana vawo. Mokuvatompoka, va hepa kuhonena Jesus nokukorangeda vana vawo va pwagese magano gawo.

Ngapi nsene vanona va likida nkareso zondona ndi awo kapi ava kwata usimbu yininke? Konakoneni omu Jesus ga rongere vapositoli vendi. Poyiruwo yimwe ngava lipatana ntani kapi ngava kwata usimbu mulyo gokulinunupika. Nye, Jesus ga lididimikilire nokurugurura kuvaronga hepero zelinunupiko. (Marukusa 9:33, 34; Rukasa 9:46-48; 22:24, 25) Vakurona ava ava honene Jesus ngava pukurura vana vawo nelididimikiro, ano nsene hepero ngava rugurura sirongwa oso dogoro munona a kwate egano mulyo gwaso.

3. Ronga kupitira mosihonena. Vakurona va hepa kupurakena komapukururo aga Paurusa ga geve koVakriste womoRoma. Age kwa va tjangerere asi: “Ngapi nye o rongo vantu, wa hana kulironga nyamoge? Ove kuudisira vantu asi, walye omu vaka, nye ove nyamoge kuvaka.”—Varoma 2:21.

Epukururo olyo mulyo morwa vanona kutambura usimbu eyi ava rugana vakurona vawo kupitakana eyi ava uyunga. Vakurona ava ava sikisa mo eyi ava uyunga, vana vawo ngava va purakena.

4. Va ronga awo simpe vanona. Timoteusa ogu nga gendi namupositoli Paurusa mosirugana soutumwa kwa mu pandadekere womomukunda gwawo. (Yirugana 16:1, 2) Konda zimwe kuna kara asi ‘kutunda unona’ age kwa mu rongere “matjangwa gokupongoka.” Ozina nozinakuru vaTimoteusa kapi tupu ngava mu resere Matjangwa nye hena kwa mu vaterere mokuteda ko komausili ga kere mo.—2 Timoteusa 1:5; 3:14, 15.

Oku no gwana evatero

Nombangi daJehova kwa kara noyimbapiratjangwa eyi va wapaikira mokuvatera vakurona mokuronga vana vawo usili kuhamena Karunga. Yimbapiratjangwa yimwe kwa yi tjanga mokuvatera vanonagona. Yapeke kuvatera vakurona novadinkantu va vhure kuuyunga kumwe nemanguruko.a

Komeho vakurona va ka ronge vana vawo kuhamena Karunga, va hepa kudiva malimbururo komapuro gamwe goudigu aga vanona nava vhura kupura. Pasihonena, ngapi omu nomu limburura mapuro aga: Morwasinke ga pulisira Karunga ruhepo? Yisinke sitambo saKarunga kevhu? Kupi va kara vafe? Nombangi daJehova nava ka yi hafera mokukakuvatera o ka dive malimbururo nomapuro gamwe yipo nove nepata lyoge ngomu vhure kuhedera Karunga pepi.—Jakopo 4:8.

[Nondanda dokonhi]