Epongo lyokudira kudivara

“APA nali ka pwa epongo eli, nomu uyunga asi: ‘Eli kuna kara epongo lyewa unene eli ngatu dira kudivara!’” Nononkango odo, Stephen Lett, gumwe gomoMbungagendesi, kwa pindwire eharo mombunga zonene ezi za pongere. Awo kwa pongere pepongo lyoWatch Tower Bible and Tract Society of Pennsylvania, eli lya kere momazuva 2 gaSikukutu 2010, poSinyanga soSigongi soNombangi daJehova monkurusitata Jersey, New York, moAmerika. Yisinke yimwe eyi ya hamenene mo mepongo eli?

Siuyungwa sokuhova saMunazinyetu Lett kwa kere nzogera zekorangedo kuhamena etemba lyaJehova ngomu va yi singonona mobuke zaHesekiyeli. Etemba eli lyenene kufanekesa mbunga zaKarunga, ezi a gendesa mwene Jehova. Munazinyetu Lett kwa tente asi ruha rwemeguru, omu mwa hamena yisitwa yopampepo, kuna kugenderera ngwendi maruvadi. Ruha rwepevhu rombunga zaJehova naro kuna kugenderera. Munazinyetu Lett kwa tumbwire marunduruko gomanzi gokutetukisa moruha rwepevhu rombunga zaJehova monomvhura edi dantani.

Pasihonena, sinzi sonomberewa donomutayi kwa kudipakerera kumwe, eyi ngayi pulisira wovanzi ava va kere moBeteli va demenene kosirugana sokuzuvhisa moyirongo oyo. Munazinyetu Lett kwa korangedere vapurakeni va twikire kukanderera po Mbungagendesi, ngomu zina kukarera po mbunga zomukareli, kapisi zi twikire tupu kulimburukwa nye hena zi kare ngorooro nonondunge.—Mat. 24:45-47.

Marapoto nomapuragero gokukorangeda

Tab Honsberger, gumwe goKomitiye zomutayi moHaiti, kwa geve ediviso lyokutumangeda kuhamena ekankamo lyevhu eli lya horokere momazuva 12 gaMurongagona 2010, eli lya dipagere konyara vantu wokusika po-300- 000 mosirongo sina. Kwa uyungire hena asi vampitisili womaukerelikarunga kwa tanterere vantu asi Karunga kwa tengeka vahahungami yiyo ga popera vahungami. Nye mayovi govakorokotji kwa pwege mo modorongo apa ga gwire makuma kekankamo lyevhu. Vahaiti wovanzi wonomutjima donongwa kuna kugwana ehengagwido pokulironga usili eyi yiruwo yetu yina karere yomaudigu. Munazinyetu Honsberger kwa temwininine munazinyetugara gumwe gomulimburukwi gomoHaiti ogu ga zumbanesere mukadendi mosimpagwa pokutanta asi: “Neli ezuva mukadange simpe kuna kumulira nina kumulira. Kapi nina diva asi siruwo sokuhura kupi ngani mu lira, nye ame kuhafa morwa mbunga zaJehova kulikida nge eharo. Na kara nehuguvaro ntani nina tokomene mokuliligavera nava wopeke.”

Mark Sanderson, ogu ngesi ana kara moBeteli zaBrooklyn, kwa geve ediviso kuhamena sirongo saFilipi. Age kwa kere nare gumwe gomoKomitiye zomutayi moFilipi, ga hefe mokudivisa eligwederero lyosivaro sovazuvhisi woUhompa ntani nomu vana kuligwederera varongwa woBibeli kupitakana sivaro sovazuvhisi. Age kwa simwitilire kuhamena munazinyetu gedina Miguel ogu mutekurwendi va dipagere. Miguel kwa kondjere mokuninka mudipagi va mu pangure nokumutura modorongo. Konyima, apa va ka zuvhisilire modorongo Miguel kwa ka ligwene nomudipagi ogo. Nampili ngomu ga kere nowoma, Miguel kwa uyungisire mudipagi monkedi zonkenda nombili. Moruhura, Miguel ga ya lirongere nomugara ogo, ogu ga tambwire usili nokuyahara Jehova. Mudipagi ogo ngesi ga gwana ekuho. Age ngesi kaume gomunene gwaMiguel ntani Miguel kuna kukondja a vatere kaume kendi gomupe a pwage mo modorongo.a

Kwa kweme ko yilimonena eyi ga geve Mark Noumair, murongi moMberewa zoSure zoUkareli. Age kwa puragerere valikwali vatatu, Alex naSarah Reinmueller, David naKrista Schafer, ntani Robert naKetra Ciranko. Alex Reinmueller, muvateli gomoKomitiye zenduruko, kwa simwitilire omu ga tungire po eharo lyokuhara usili apa ga ruganene uzuvhisi wokukarerera moKanada age nomvhura dendi 15, nkenye apa nga rugana gelike. Apa va mu pulire asi wolye va mu kundama unene moBeteli, munazinyetu Reinmueller kwa tumbwire vagara vatatu wovalimburukwi pokulikida omu nkenye gumwe gwawo ga mu vaterere a kure pampepo. Mukadendi, Sarah, kwa simwitilire ukaume wendi namunazinyetukadi ogu ga lididimikilire nomvhura dononzi modorongo zomoTjina morwa epuro lyendi. Sarah kwa tente asi kwa lirongere mokuhuguvara mwaJehova kupitira mekanderero.

David Schafer, muvateli gomoKomitiye zerongo, kwa pandadekere ozina morwa epuro lyawo lyokupama ntani nokusimwitira vanavazinyetu ava ngava rugana ngovateti woyitji ntani va mu vaterere a rugane uzuvhisi wokuvatera ngomudinkantu. Mukadendi Krista kwa uyungire neharo omu Vabeteli va mu kundamene ava va likidire asi kuvhura ‘kuvahuguvara mweyi yoyinunu’ ngomu ga yi uyungire Jesus.—Ruk. 16:10.

Robert Ciranko, muvateli goKomitiye zokutjanga, kwa simwitilire kuhamena vazinyakuru vendi wovagwavekwa vane, ava va tundire mosirongo saHungary. Apa ga kere mumati, age kwa mu tetukisire apa nga kara poyigongi yoyinene koyiha yo-1950, ntani ga dimbwilire asi mbunga zaJehova nene unene kupitakana mbungakriste zawo. Mukadendi Ketra, kwa simwitilire omu ga lirongere ulimburukwi apa ga kere muzuvhisi gokukarerera mombungakriste omu mwa kere varwanesi usili nomaudigu gamwe hena. Age kwa lididimikilire ano moruhura va ya mu tumine ngomuzuvhisi gokulikarera kombungakriste ezi za mu tumangedere unene morwa uumwe wazo.

Manfred Tonak kwa geve ediviso lyomosirongo saEtiyopiya. Sirongo esi kwa si tumbura moBibeli, ano ngesi kwa si tungika novazuvhisi wombudi zongwa wokupitakana po-9 000. Sinzi sawo kwa tunga pepi nonkurusitata, Addis Ababa. Nomukunda dokoure kuna hepa vazuvhisi woUhompa. Morwa hepero ozo, Nombangi domoEtiyopiya edi da tunga moyirongo yapeke kwa di zigidire di ka dingure yipo di ka zuvhisire komaruha gamwe gomosirongo sawo. Morwa wovanzi va wizire, ayo kwa korangedere Nombangi domoEtiyopiya ano va gwene ava va likidire elituromo.

Melikwamo kwa hamenene mo siuyungwa somaruha kuhamena Nombangi daJehova moRusia nekondjero lyawo lyopaveta. Aulis Bergdahl gomoKomitiye zomutayi moRusia kwa geve ehistoli lyehepeko lyoNombangi moRusia, unene po moMoscow. Philip Brumley goMberewa zeyi yopaveta momutayi gwaAmerika kwa simwitilire kuhamena marunduruko gokutetukisa momakwedi aga gantani apa Mpanguro zaEuropa zoUntu woMuntu za purakenene komasivano ntane aga va rundilire Nombangi. Mpanguro kapi za gwene usima komasivano ogo ntane, ano moyihorokwa yimwe mpanguro kwa litulire mo mokufaturura mauzera eyi masivano ogo ga karerere gepuko. Munazinyetu Brumley kwa uyungire nehuguvaro omu etokoro ngazi tura po Mpanguro ngali kundama yirongo yapeke.

Konyima zombudi ezi zokuhafesa, munazinyetu Lett kwa divisire asi Mpanguro zaEuropa zoUntu woMuntu kwa tambura mokupangura udigu wokufuta mutero omu mwa hamena epangero lyaFransa noNombangi daJehova. Mpanguro ezi zonene kutambura tupu masivano gomasesu. Mpanguro zaEuropa zoUntu woMuntu kwa konakonene masivano 39 omu mwa hamena Nombangi daJehova, ntani azo kwa pangwire nawa kuliza nomasivano 37. Munazinyetu Lett kwa korangedere vantu vaKarunga va ture momakanderero gawo udigu owo.

Ediviso lyokuhulilira kwa li geve Richard Morlan, murongi goSure zoVakuronambunga. Age kwa uyungire nomukumo kuhamena sure norupandu oru va likida vakuronambunga ava va kere mosure ozo.

Yiuyungwa yimwe yava womoMbungagendesi

Guy Pierce gomoMbungagendesi kwa geve siuyungwa sokuguma komutjima esi sa demenenene ketjangwa lyomvhura 2011 asi: “Gwana epopero medina lyaJehova.” (Sef. 3:12, NW) Nampili ngomu sina kara siruwo soruhafo kovantu vaJehova, aso hena kuna kara siruwo soudigu. Ezuva lyaJehova lyenene pepi lina kara; nye vantu kuna kutwikira kupapara epopero momaukarelikarunga goyimpempa nomonombunga doupolitika nomoungawo nayimwe hena ngoso. Mokugwana epopero lyene-lyene, twa hepa kukuga edina lyaJehova, omu mwa hamena kulidiva nokulifumadeka nokuhuguvara Karunga gedina olyo nokumuhara nomutjima nagunye.

David Splane gomoMbungagendesi kwa kweme ko nokugava siuyungwa somukumo sosiparatjangwa asi: “Wa za mepwizumuko lyaKarunga ndi?” Age kwa yi didilikire asi kuza mepwizumuko lyaKarunga kapi ayi tanta asi kudira kurugana, morwa Jehova naMunwendi “kurugana narunye” mokusikisa mo sitambo sendi kevhu. (Joh. 5:17) Ngapi omu natu za mepwizumuko lyaKarunga? Kuhageka kurugana nonzo noyirugana yokulihungameka nyamwetu nayo kwa kara ruha rwelimbururo. Twa hepa kulikida epuro nokudiworoka sitambo saKarunga, nokutura po nkenye elizambero mokusikwatesa ko. Poyiruwo yimwe, kuvhura kukara nomaudigu gokulikarera, nye twa hepa kutambura epukururo nokuruganena kumwe negendeso lyombunga zaJehova. Munazinyetu Splane kwa hundilire vapurakeni va rugane paapa va hulira mokuza mepwizumuko lyaKarunga.

Siuyungwa sokuhulilira ga geve Anthony Morris gomoMbungagendesi kwa kere nosiparatjangwa asi: “Yisinke tuna kundindira?” Monkedi zeharo, munazinyetu Morris kwa diworokesere vapurakeni kuhamena mauporofete aga ngaga sika mo komeho, ayo yihorokwa eyi vana kundindira valimburukwi navenye nononkondo. Eyi kwa kwatera mo apa ngava tanta asi: “Nayinye mompora, kutupu upyakadi,” nezonauko lyomaukarelikarunga goyimpempa. (1 Tes. 5:2, 3; Ehor. 17:15-17) Munazinyetu Morris kwa rondwere mokudira kuuyunga asi: “Ezi za hepa kukara Harumagedoni,” mokumona yihorokwa eyi ya dira kulikwatakana nomauporofete gangoso. Age kwa pandadekere nkareso zoruhafo zelididimiko ezi va faturura mwaMika 7:7. Ntani kwa korangedere hena navenye va likwatakane kumwe noMbungagendesi ngovakwayita vana kuza koyita. Age kwa tente asi: ‘Kwateni nomutjima, namuvenye ava mwa huguvara HOMPA.’—Epis. 31:24.

Mokuhulisa, pwa kere yimwe yokuhafesa, momadiviso gokulikarera. Geoffrey Jackson gomoMbungagendesi kwa divisire mawapaiko gediviso lyoRuhungu moRuingilisa roureru, morwa vantu ava va dira kudiva kuresa nawa Ruingilisa. Ano Stephen Lett kwa divisire asi Mbungagendesi ngazi wapaika edinguro lyokukagava ekorangedo kovatareli wonomukunda novakadi vawo moAmerika. Ediviso lya kweme ko kwa divisire asi Sikora zedeuro vapitisili wombunga ngava zi tumbura asi Sikora zoBibeli zovagara wovadike. Ntani ga divisire hena sure zompe ava tumbura asi Sikora zoBibeli zovalikwali. Sikora ezi ngazi gava edeuro lyokulikerera kovalikwali yipo va va ruganese unene mombunga zaJehova. Munazinyetu Lett kwa divisire hena asi Sikora zoVatareli wokudingura novakadi vawo ntani Sikora zovanamberewa womutayi novakadi vawo ngava di tura di kare nombunga mbali nkenye mvhura moPatterson, kumwe nomawapaiko kowo va ka kere kosure ozo sikando sokuhova va ka kare po hena sikando sauvali.

Ehuliso lyokutumangeda lyelikwamo kwa ligeve John E. Barr gonomvhura 97, gomoMbungagendesi, ogu ga geve ekanderero lyokukorangeda.b Kehagero lyepongo, nkenye ogu kwa lizuvhire asi alyo kuna kara ezuva eli ngava dira kudivara.

[Nondanda dokonhi]

[Nonkango depepenuno 19]

Mapuragero kwa ga haferere vakalimo navenye

[Nonkango depepenuno 20]

Jehova kwa tungika sirugana sokuzuvhisa moEtiyopiya