Mapuro gokutunda kovaresi

Kuvhura kuvarura mauporofete goUmesiyasa gomoMatjangwa goRuhebeli ndi?

Kukonakona nawa Matjangwa goRuhebeli kutuninkisa tu dimburure mauporofete gomanzi aga ga sikilira mo mwaJesus Kristusa. Ago kwa pumba mauzera gontundiliro zaMesiyasa nosiruwo esi ga ya monekere noyirugana yendi nomu va ya mu tekwire ntani nositumbukira sendi mewapaiko lyaJehova Karunga. Nsene tu ga tura kumwe ago taga tu vatere tu dimburure Jesus ngaMesiyasa. Nampili ngoso, twa hepa kutakamesa nsene kuna kuhetekera ko kuvarura mauporofete goUmesiyasa gomoMatjangwa goRuhebeli.

Vamwe kwa kara mepiyagano mokudimburura mauporofete goUmesiyasa. Mobuke The life and Times of Jesus the Messiah, Alfred Edersheim kwa tanta asi matjango goRuarabiya ganare kwa hangwire matjango 456 koMatjangwa goRuhebeli ngomauporofete goUmesiyasa, nampili ngomu sinzi sago ga dira kutumbura kuvyukilira Mesiyasa. Pokukonakona matjango ogo 456 kwa retesa po masinganyeko nsene asi gamwe sili kuna kara mauporofete gokuhamena Jesus Kristusa. Pasihonena, Edersheim kwa uyungire asi Vajuda kwa tere Genesis 8:11 ngouporofete woUmesiyasa. Awo kwa pulire asi “sihako sositarara soukuzu, esi za retere nkutji, kwa si gusire koNdundu zaMesiyasa.” Age kwa tumbura hena Exodus 12:42. Mokufaturura omu Vajuda va kwete egano epuko etjangwa eli, age kwa tjenge asi: “Ngamoomu Mosesa ga tundire momburundu, naMesiyasa nage yimo nga tunda moRoma.” Valirongi wovanzi kapi va yi kwatesa ko asi matjangwa aga gavali nefatururo eli lyepuko kwa tamba kwaJesus Kristusa.

Nampili tu demenene tupu komauporofete ogo ga ya sikilire mo mwaJesus Kristusa, simpe kapi tatu vhuru kutumbura nawa-nawa sivaro sago. Pasihonena, tu tareni Jesaya egaununo 53, omu mwa kara mauporofete gokulisiga-siga gokuhamena Mesiyasa. Jesaya 53:2-7 kwa pumbire asi: “Kapi ga peke mutaro. . . . Vantu ngava mu swaura, tava mu zumbu, . . . age ta litwike mauvera getu, . . . mayipiko getu ga mu wurwisa, . . . age kapi ga zahwire kana kendi, moomu azi kara nzwi vana kutwara kosidipagero.” Kuvhura tu tante asi egaununo eli lyaJesaya 53 nalinye kuna kara uporofete umwe tupu woUmesiyasa ndi asi nkenye sikara saMesiyasa va tumbura kusitara asi uporofete wa likarera pwawelike?

Konakona hena Jesaya 11:1 ezi za tanta asi: “Malikwamo gouhompa waNdafita kwa lifana nositji esi va teta; nye nomutayi donompe tadi pwaga mosisindi.” Movelise 10, uporofete ou kwa moneka hena, nononkango dokulifana. Kuvhura tu tante asi novelise edi mbali kuna kara mauporofete gavali ndi umwe va rugurura? Matokoro gokuliza negaununo lyaJesaya 53 neli 11 kukundama sivaro somauporofete goUmesiyasa.

Yipo nye, ya wapa kwetu mokudira kuvyukilira kutumbura sivaro nasinye somauporofete goUmesiyasa gomoMatjangwa goRuhebeli. Mbunga zaJehova za nduruka yimbapiratjangwa eyi ayi likida malikwamo gomauporofete gomanzi gokuhamena Jesus nesikiliromo lyago.a Malikwamo ogo kuvhura kutuvatera nokutukorangeda melirongo lyanyamwetu neli lyepata ntani nomoyirugana yetu yokuzuvhisa. Ntani hena, mauporofete gomanzi goUmesiyasa, ga kare asi gangapi, kutupa umbangi wokupama asi Jesus yige Kristusa, ndi Mesiyasa.

[Nondanda dokonhi]