Mapuro Gokutunda Kovaresi
Ngapi omu nomfa dovahungami adi “koro HOMPA”?
▪ Muepisarome kwa dimba asi: “Ee, yireru omu ayi koro HOMPA, nsene muntu gwendi gumwe ana fu!” (Epis. 116:15) Eparu lyankenye mukareli gwaJehova kwa kara nomulyo unene kwendi. Nye, nonkango edi va tjanga mEpisarome 116 kapi da tamba tupu konomfa domuntu gumwe.
Pokugava siuyungwa sonomfa doMukriste, ayo kapi ya wapa kuruganesa Episarome 116:15 ponomfa, nampili ngomu ana fu age simpe ha ga karera mukareli gwaJehova gokulimburukwa. Morwasinke? Morwa nonkango demuepisarome kapi da kara nontanto zimwe tupu. Ado kutanta asi Karunga kapi a pulisire vakareli vendi wovahungami va fe ngombunga morwa age kuvatara asi mulyo kwendi.—Tara Episarome 72:14; 116:8.
Episarome 116:15 kutuhuguvaresa asi Jehova kapi nga pulisira vantu vendi wovahungami ngombunga va va zonagwililire po apa pevhu. Mehistoli lyoNombangi daJehova kulikida asi va lididimikira nare maheteko nomahepeko, eyi kugava umbangi asi Karunga kapi nga sigilira vakareli vendi va va zonagwilire po.
Morwa Jehova Munankondo nadinye ntani kusikisa mo sitambo sendi, age kapi nga pulisira vantu vendi ngombunga va va zonagwilire po. Nsene Karunga a yi pulisira oyo yi horoke, ayo ngano ngayi moneka ngwendi asi nonkore dendi nonkondo unene kumupitakana. Sitambo saJehova sokuninka asi vantu wovahungami va kare apa pevhu ngano kapi ngasi sika mo. (Jes. 45:18; 55:10, 11) Kukarera Jehova ngano ngaku haga nsene vantu vendi navenye ava ava karere montembeli zendi zopampepo apa pevhu va va zonagura po. Ngano kapi ngapa kara vantu ava ngava tunga ‘pevhu lyepe,’ kutanta asi nkarapamwe zovantu wovahungami apa pevhu konhi ‘zeguru lyepe.’ (Ehor. 21:1) Ntani hena, Epangero lyoNomumvho Eyovi lyaKristusa ngano kapi ngali kara po morwa pwato vapangerwa.—Ehor. 20:4, 5.
Nsene a pulisira nonkore dendi di hanagure po vantu vendi navenye apa pevhu, edina lyaKarunga ngali swauka asi age kapisi Munankondo nadinye. Nsene yi horoka oyo, ngano upangeli waJehova ngau swauka. Morwa efumano lyamwene nedina lyendi lyokupongoka, Jehova kapi nga pulisira vakareli vendi wovahungami ngombunga va va zonagwilire po. Mokumona asi Karunga kwa ‘hungama,’ age nga popera vantu vendi ava ava mu karere noulimburukwi. (Deut. 32:4; Gen. 18:25) Ntani hena, kupulisira vakareli vendi ngombunga va va zonagure po ayo ngayi lilimba noNonkango dendi edi asi: “Age kapi nga mu zumba, morwa age kwa tokora kumuninka mu kare mbunga zendi.” (1 Sam. 12:22) Yosili, “HOMPA kapi nga zumba vantu vendi, age kapi nga siga ava va mu hamena.”—Epis. 94:14.
Ayo kuhengagwida pokudiva asi vantu vaJehova kapi ngava va zonagwililira po apa pevhu. Mwanayinye, tu likideni ulimburukwi wetu kwaKarunga pokuhuguvara metumbwidiro lyendi eli asi: “Nosirwiso si simwe esi ngasi ku rwadeka, ove hena ngo limburura navenye ava ava ku rundire. Vakareli vange ngani va gamena tani va pe efundo.”—Jes. 54:17.
[Nonkango pepenuno 22]
Karunga kapi nga sigilira vantu vendi va va zonagwilire po