Huguvara mwajehova Karunga ‘goyinema noyiruwo’

“Age yige a pangere yinema noyiruwo; yige a tura ohompa koyipundi tava gusa ko hena.”—NDAN. 2:21.

NGAPI OMU NO LIMBURURA?

Ngapi omu unsitwe nesikiliromo lyomauporofete ayi likida asi Jehova kusikisa mo sitambo sendi posiruwo esi ga horowora?

Pokulikida rupandu asi Jehova yige Karunga ‘goyinema noyiruwo,’ yisinke ayi tu tumangeda tu rugane?

Yi kare asi yisinke vana kurugana vantu, morwasinke Jehova a dilire kurundurura siruwo sendi esi ga horowora sokusikisa mo sitambo sendi?

1, 2. Yisinke ayi likida asi Jehova ga diva nawa-nawa siruwo?

KOMEHO a unge vantu, Jehova Karunga kwa tulire po nkedi zokuvarura siruwo. Mezuva lyaune lyesito, Karunga kwa tente asi: “Ku kare mauzera keguru gokuhangura mutenya nomasiku. Ga kare yidiviso yomazuva nonomumvho noyiruwo.” (Gen. 1:14, 19, 26) Kuliza nompango zaJehova oyo yiyo ya horoke.

² Vadiviunsitwe simpe kapi ava vhuru kufaturura nawa-nawa siruwo. Encyclopedia zimwe kwa tanta asi: “Kwato muntu gokuvhura kufaturura nawa-nawa siruwo.” Nye, Jehova ga diva nawa-nawa siruwo. Age yige ‘ga sita eguru . . . yige hena ga foroma ta siti uzuni.’ Kutundilira ketameko Jehova ‘kwa horora eyi ngayi wiza; kwanare ga pumba eyi ngayi horoka.’ (Jes. 45:18; 46:10) Mokunkondopeka epuro lyetu mwendi nomoNonkango dendi, Bibeli, tu konakoneni omu unsitwe nesikiliromo lyomauporofete ayi likida asi Jehova kusikisa mo sitambo sendi posiruwo esi ga horowora.

UNSITWE KUNKONDOPEKA EPURO

3. Ngapi omu asi moneka siruwo moyininke eyi ga sita Jehova?

³ Jehova kwa sita nombungururu di gende mononzira dado nosiruwo. Ezuva nokwedi nonombungururu kuvatera vantu va dive yinema nosiruwo. Mokumona asi Jehova kwa sita nombungururu, “nonkondo dendi nonene unene” ntani ga fira kumutanga.—Resa Jesaya 40:26.

4. Mokumona asi yinamwenyo kukwama siruwo esi sa kara mwayo, ngapi omu ayi likida unongo waJehova?

⁴ Yinamwenyo kuyigendesa siruwo. Yimeno noyikorama kumoneka asi kukwama siruwo sa kara mwayo. Yidira yoyinzi ya diva siruwo esi ayi tameke kudiruka. (Jer. 8:7) Nose vantu kutugendesa siruwo, morwa marutu getu kututantera asi ngesi mutenya ndi masiku. Nsene tu za nondira kosirongo sapeke oku sa lisiga siruwo, marutu getu kukagusa mazuva gongandi ntani naga ka yika siruwo oso sosipe. Moyininke eyi ga sita Jehova, kwa kara mo yihonena yoyinzi eyi ayi likida asi age Karunga ‘goyinema noyiruwo’ ntani asi ga kara nononkondo dononene nounongo. (Resa Episarome 104:24.) Morwa unongo nononkondo dendi dononene, kuvhura tu kare nepuro asi age nga sikisa mo sitambo sendi.

ESIKILIROMO LYOMAUPOROFETE KUNKONDOPEKA EPURO

5. (a) Monkedi musinke natu diva eyi yina kundindira vantu komeho? (b) Morwasinke Jehova na vhulira kupumba yokomeho ntani nosiruwo?

⁵ Yininke eyi ga sita Jehova kuturonga yoyinzi kuhamena “nkareso zendi ezi azi dili kumoneka,” nye kapi ayi limburura mapuro gomulyo ngwendi lyeeli asi: Yisinke yina kundindira vantu komeho? (Rom. 1:20) Mokugwana elimbururo twa hepa kulironga eyi ga horora Karunga moBibeli. Apa atu zi konakona ose kugwana mauporofete aga ga sikilira mo kuliza nosiruwo. Jehova kuvhura kututantera eyi ngayi ka horoka morwa ga diva yokomeho. Ntani hena mauporofete gomoBibeli nkenye apa kusikilira mo kuliza nosiruwo morwa Jehova kuninka yininke yi horoke kuliza nositambo sendi nosiruwo esi ga horowora.

6. Yisinke ayi likida asi Jehova ana tu harere tu kwate egano esikiliromo lyomauporofete gomoBibeli?

⁶ Nampili ngomu Jehova a dili kutara siruwo monkedi omu atu si tara, apa a tu tantere yininke eyi ngayi ka horoka posiruwo songandi, age kuruganesa nonkango edi natu vhura kukwata egano. (Resa Episarome 90:4.) Pasihonena, apa buke zEhororo za tumbura ‘vaengeli vane ava va liwapaikire vili nezuva nokwedi nomvhura,’ age kwa ruganesere yininke eyi natu vhura kukwata egano. (Ehor. 9:14, 15) Apa atu kwata egano mauporofete aga ga sikilira mo kuliza nosiruwo esi ga tente Karunga ‘goyinema noyiruwo’ ayo kunkondopeka epuro mwendi ntani nomoNonkango dendi. Tu konakoneni yihonena yongandi.

7. Ngapi omu uporofete waJeremiya kuhamena Jerusarema naJuda au likida asi Jehova kusikisa mo sitambo sendi posiruwo esi ga horowora?

⁷ Pomuhowo, tu konakoneni eyi ya horokere monomvhura 800 da ka pita. ‘Momumvho gwaune ogu ga kere Jehoyakimu zaJosiya mouhompa, yimo ga gwene mbudi zokutunda kwaHOMPA kuhamena kovantu navenye vaJuda.’ (Jer. 25:1) Jehova kwa tente asi Vababironiya ngava zonagura Jerusarema nokutwara Vajuda koBabironi. Oko ‘nga ka va ruganesa hompa gwaBabironiya nomvhura nomurongo ntano-nambali.’ Momvhura 607 komeho zokuwiza Kristusa, yipo va zonagwire Jerusarema vakwayita woVababironiya nokutwara Vajuda koBabironi. Nye yisinke ya horokere kehagero lyonomvhura 70? Jeremiya kwa pumbire asi: “HOMPA ta tanta asi: ‘Nomvhura nomurongo ntano nambali nsene dina pu, ngani mu diworoka, makura ngani sikise mo etumbwidiro lyange lyokumutengwida kweni.’” (Jer. 25:11, 12; 29:10) Uporofete ou kwa ya sikilire mo kuliza nosiruwo esi ga tente Jehova morwa momvhura 537 komeho zokuwiza Kristusa, Vamede noVaperesiya yipo va mangwilire Vajuda kounkwate waBabironi.

8, 9. Ngapi omu uporofete waNdaniyera wa likida asi Jehova yige Karunga ‘goyinema noyiruwo’?

⁸ Nomvhura mbali komeho zokutunda Vajuda moBabironi, Ndaniyera ga tjenge uporofete hena. Karunga kwa tente asi Mesiyasa nga moneka momvhura 483 konyima za pa va geve mpangera asi va tungurure Jerusarema. Hompa goVamede noVaperesiya yige ga geve mpangera ozo momvhura 455 komeho zokuwiza Kristusa. Konyima zonomvhura 483, kutanta asi momvhura 29, yipo Jesus goMunazareta va mu gwavekere nompepo zokupongoka pekuho lyendi makura ta kara Mesiyasa.a—Neh. 2:1, 5-8; Ndan. 9:24, 25; Ruk. 3:1, 2, 21, 22.

⁹ Gazara eyi za pumbire Bibeli kuhamena Uhompa waKarunga. Uporofete woBibeli kwa likidire asi Uhompa woUmesiyasa kwa u tulisire po meguru mo-1914. Bibeli kwa geve “sidiviso” sekaropo lyaJesus nokupumba maudigu gomanene pevhu posiruwo sina morwa Satana kwa mu zuguminine pevhu. (Mat. 24:3-14; Ehor. 12:9, 12) Mauporofete gomoBibeli kutuvatera tu dive asi ‘siruwo sovapagani’ sa hege mo-1914, ano Kristusa yipo ga tamekere kupangera meguru.—Ruk. 21:24; Ndan. 4:10-17.b

10. Yihorokwa musinke ngayi ka horoka posiruwo esi ga horowora Jehova?

¹⁰ Ntaantani tupu “udigu wounene” ou ga pumbire Jesus ngau sike mo. Konyima zoyo, Jesus nga ka pangera nomumvho eyovi. Yousili yihorokwa nayinye oyo ngayi horoka posiruwo esi ga horowora. Apa ga kere Jesus pevhu, age Jehova nare ga horowora “ezuva nosiruwo” apa ngayi horoka oyo.—Mat. 24:21; Mar. 13:32; Ehor. 20:6.

‘RUGANESA NAWA NKENYE KARUWO ONO GWANA’

11. Pokudiva asi ose kuna kuparuka pehagero lyouzuni, yisinke twa hepa kurugana?

¹¹ Pokudiva asi Kristusa Hompa ntani kuna kuparuka “pehagero lyouzuni,” yisinke twa hepa kurugana? (Ndan. 12:4) Vantu wovanzi kuna kudimburura asi nkareso zouzuni kuna kudonapa unene, nye kapi va yi kwata egano asi ukaro ou yiwo za pumba Bibeli kuhamena mazuva gopouhura. Vamwe kugazara asi uzuni ou ngau zonauka po, ano vapeke kwa pura asi vantu ngava reta ‘mpora.’ (1 Tes. 5:3) Nye ose ngapi? Nsene tuna yi dimburura asi kuna kuparuka pomazuva gopouhura gouzuni waSatana, ngano tu hetekere ko kuruganesa karuwo aka kana hupu ko tu karere Karunga ‘goyinema noyiruwo’ nokuvatera wopeke va mu dive. (2 Tim. 3:1) Twa hepa kutura po matokoro gomawa omu natu ruganesa siruwo setu.—Resa Vaefeso 5:15-17.

12. Yisinke natu lirongera ko kononkango daJesus kuhamena mazuva gaNowa?

¹² ‘Kuruganesa nawa karuwo’ kapisi ureru mouzuni ou una zura madonganeso. Jesus kwa rondwere asi: “Moomu tupu ya kere momazuva gaNowa, newizo lyaMunwaMuntu yimo ngali kara.” Ngapi omu ga kere mazuva gaNowa? Karunga kwa pumbire uhura wouzuni wawo pokutanta asi vadinikarunga ngava va zonagura po mekuruhanzo. Nowa “ogu nga udisa uhungami,” kwa udisilire vantu womosiruwo sendi mbudi zaKarunga. (Mat. 24:37; 2 Pet. 2:5) Nye awo ‘ngava li tava nu nokulikwara-kwara, . . . va hana kuyikwata egano dogoro noku rwa va gwanenene mo rukuruhanzo.’ Yipo Jesus ga rondwere varongwa vendi asi: “Yipo nye nomu liwapaikilira none, yeeyi MunwaMuntu nga wiza movili zohararasi.” (Mat. 24:38, 39, 44) Twa hepa kukara ngwendi Nowa, kapisi ngwendi vantu womosiruwo sendi. Yisinke nayi tu vatera tu liwapaikire?

13, 14. Ngomu tuna kundindira ewizo lyaMunwaMuntu, yisinke twa hepa kudiworoka kuhamena Jehova?

¹³ Nampili ngomu twa dira kudiva siruwo esi nga wiza MunwaMuntu, twa hepa kudiworoka asi Jehova nkenye apa kusikisa mo sitambo sendi posiruwo esi ga horowora. Yi kare asi yisinke yina kuhoroka mouzuni ndi eyi vana kuliwapaikira vantu kurugana, Jehova ga tokora siruwo esi ngayi horoka ntani noyitundwamo yayo. (Resa Ndaniyera 2:21.) Yisewe 21:1 kututantera asi: “Yigazo yaHompa kwa kara mepangero lyaHOMPA moomu a pangere kupupa komema. Age kuyitwaredera nkenye oku ana hara.”

¹⁴ Jehova kugendesa yihorokwa yipo a sikise mo sitambo sendi posiruwo esi ga horowora. Marunduruko gomanzi aga gana kuhoroka mouzuni kuna kusikisa mo mauporofete, unene po aga gokuhamena kuzuvhisa mbudi zongwa zoUhompa waKarunga. Gazadara ko malitjindjo moyirongo eyi ya silikire yirugana yetu yokuzuvhisa. Hararasi mwa kere marunduruko gomanene momapangero gawo aga va dilire kundindira. Ngoyitundwamo, mbudi zongwa ngesi kuna kuzizuvhisira moyirongo oyo. Tu diviliseni asi tu ruganese nawa nkenye karuwo mokukarera Karunga ‘goyinema noyiruwo’ noulimburukwi.

JEHOVA NGA RUGANA KO YUMA POSIRUWO ESI GA HOROWORA

15. Ngapi omu natu likida epuro apa ava tura po marunduruko mombunga zaKarunga?

¹⁵ Pokutwikira kuudisa momazuva aga gopouhura, twa hepa kukara nepuro asi Jehova nga sikisa mo sitambo sendi posiruwo esi ga horowora. Morwa nkareso zouzuni kuna kurunduruka, poyiruwo yimwe nose twa hepa kutura po marunduruko monkedi omu atu zuvhisa. Mbunga zaJehova poyiruwo noyiruwo kutura po marunduruko gokutuvatera tu udise mbudi zongwa yipo yi tu tompoke nawa. Ose kulikida epuro mwaKarunga ‘goyinema noyiruwo’ pokukwama marunduruko ogo nokulimburukwa kwaMunwendi, “mupangeli” gombungakriste.—Efe. 5:23.

16. Morwasinke natu karera nehuguvaro asi Jehova nga tu vatera posiruwo souhunga?

¹⁶ Jehova kuna tu harere tu kanderere kwendi nehuguvaro asi age nga tu ‘kwafa paapa tuna mu hepere.’ (Heb. 4:16) Eyi kulikida eharo lyenene lyaJehova kwetu nomu a tu pakere mbili. (Mat. 6:8; 10:29-31) Ose kulikida epuro mwaJehova Karunga apa atu kanderere nkenye apa a tu vatere nokurugana kuliza nomakanderero getu ntani nomavyukiso gendi. Ntani hena twa hepa kudiworoka pokukanderera po vapuli vakwetetu.

17, 18. (a) Yisinke na ka rugana ko ntaantani Jehova kononkore dendi? (b) Siponga musinke twa hepa kunyokera po?

¹⁷ Ngesi kapisi siruwo sokuzumbanesa epuro, nye siruwo sokukoreka epuro. (Rom. 4:20) Satana nava va kara mepangero lyendi kuna kuhetekera ko kuhagekesa sirugana esi ga tu pa Jesus. (Mat. 28:19, 20) Nampili ngomu Muzonaguli a tu homokere, ose twa diva asi Jehova age ‘Karunga goMunamwenyo, Muzowoli gwanavenye, nye unene gwava va pura.’ Age “ga diva omu a yoworora vatjilikarunga momaheteko gawo.”—1 Tim. 4:10; 2 Pet. 2:9.

¹⁸ Ntaantani tupu Jehova nga rete uhura kouzuni ou woudona. Nampili ngomu va dira kutupa mauzera nagenye nosiruwo esi ngayi horoka oyo, nye twa yi diva asi Kristusa nga ya zonagura po nonkore daKarunga nokuhungameka upangeli waJehova posiruwo esi ga horowora. Yipo nye ya karera siponga kudivara ntanto ‘zosiruwo ndi zomazuva’ aga tuna kuparuka ngesi. Twa hepa kutakamesa asi kapisi tu tameke kugazara asi “nayinye ha ya kerera moomu ya kere pesito lyouzuni.”—1 Tes. 5:1; 2 Pet. 3:3, 4.

KARA NONKARESO ‘ZOKUNDINDIRA’

19, 20. Morwasinke natu karera nonkareso zokundindira Jehova?

¹⁹ Jehova apa ga ungire vantu kwa va harerere va paruke narunye yipo va twikire kulironga kumuhamena noyininke nayinye yoyiwa eyi ga sita. Muudisi 3:11 kutanta asi Jehova “kwa paka po siruwo sosiwa sankenye eyi. Age kwa tu pa eharo lyokudiva yokomeho, nye narumwe si kapi ga tu pa egwaneko lyesikiliromo lyekwategano lyeyi a rugana.”

²⁰ Ee, ruhafo musi rokudiva asi Jehova kapi nga rundurura sitambo sendi kovantu! (Mara. 3:6) Jehova kapi ga runduruka, age ‘HOMPA gwanarunye.’ (1 Tim. 1:17) Yipo nye natu karera nonkareso ‘zokundindira Karunga ogu nga tu parura.’ (Mika 7:7) Yosili, “koreni, mu kwate nomutjima, namuvenye ava mwa huguvara HOMPA.”—Epis. 31:24.

[Nonkango dokonhi]

[Efano pepenuno 19]

Ndaniyera kwa kere nepuro mesikiliromo lyouporofete ou ga mu pere Karunga

[Efano pepenuno 21]

Ove kuruganesa nawa siruwo yipo o rugane mpango zaJehova ndi?