Tunga po nkareso zelinunupiko

1, 2. Evyukiso musinke ga pere Jesus vapositoli vendi, ntani morwasinke?

MOMVHURA 32, apa ga kere Jesus momukunda gwaGalireya kwa horokere po maudigu. Vapositoli vendi kwa litatanene asi yilye gomunene po pokatji kawo. Mutjangi gEvangeli Rukasa kwa tjenge asi: “Varongwa ga va gwene malipuragero gokuninka asi yilye munene po pwawo. Jesus ga divire eyi va gazarere monomutjima dawo. Makura ta gusa munona, ta mu sikameke koruveki rwendi, ta va tantere asi: ‘Ogu a tambwire munona gwangesi medina lyange, nyame a tambura. Ano ogu a tambura nge, kutambura hena ogu ga tuma nge. Yeeyi mununu po pwanamuvenye, yige nga kara munene.’” (Ruk. 9:46-48) Nelididimiko, Jesus ga vaterere vapositoli vendi va dimburure hepero zelinunupiko.

² Evyukiso lyaJesus lyokukara mununu po lya lizire nompo zoVajuda womosiruwo sendi ndi? Hawe, kwa lilimbire nonkareso zawo. Mokuuyunga kuhamena nkareso zomosiruwo sina, buke Theological Dictionary of the New Testament kwa faturura asi: “Mwankenye eyi ngava rugana, ngava lipura asi yilye gomunene po ntani nkenye ogu ngava mu pe mfumwa kuliza nosirugana sendi.” Jesus kwa vyukisire vapositoli vendi yipo nkareso zawo zi lisige novantu vangoso.

3. (a) Nkango “mununu po” kosinke za tamba, ntani morwasinke ya karera udigu kulikida elinunupiko? (b) Kutunga po elinunupiko, mapuro musinke aku retesa po?

³ Nkango zoRugereka va toroka asi “mununu po” kutamba komuntu ogu ga linunupika ntani gokugomoka ndi kwato unankondo. Jesus kwa ruganesere munona mokuronga vapositoli vendi asi va hepa kulinunupika. Vakriste wousili naina va hepa kulirongera ko kweyi ga rongere Jesus vapositoli vendi. Momaukaro gamwe kuvhura kutudigopera kulikida elinunupiko. Kudira kusikilira mo kwetu kutuninkisa tu linenepeke nokupapara efumano. Ntani hena, uzuni ou waSatana kuvhura u tu pukise tu kare nonkareso zelinenepeko nezi zourwanesi ntani zokupangera vakwetu. Yisinke nayi vhura kutuvatera tu tunge po nkareso zelinunupiko? Ngapi omu ‘mununu po mwanatuvenye, na kara munene’? Momaruha musinke geparu twa hepa kulikida nkareso zelinunupiko?

“EE, UGAWO WAKARUNGA KOUNZI! UKONENTU WENDI NEDIWO LYENDI UNZIGONA!”

4, 5. Yisinke nayi tu tumangeda tu tunge po elinunupiko? Gava sihonena.

⁴ Nkedi zimwe zokutunga po elinunupiko kuna kara pokudiworoka asi Jehova munene unene kutupitakana. “Nagumwe si a kwata egano yigazo yendi.” (Jes. 40:28) Mupositoli Paurusa kwa tjenge kuhamena unene waJehova asi: “Ee, ugawo waKarunga kounzi! Ukonentu wendi nediwo lyendi unzigona! Yilye ogu gokuvhura kusingonona nompangera dendi? Di kare nonzira dendi yilye ogu gokudikwata egano?” (Rom. 11:33) Vantu kwa lironga yininke yoyinzi kutundilira apa ga tjenge Paurusa nonkango odo nomvhura 2 000 da ka pita. Nye yi kare asi ediwo lyokuhura kupi twa kara nalyo, twa hepa kulinunupika pokudimburura asi yinzi simpe twa hepa kudiva kuhamena Jehova noyirugana nononzira dendi.

⁵ Pokudimburura asi kapi tatu vhuru kukwata egano nonzira daKarunga kwa vatera Leoa a litare mwene asi mununu po. Ngomudinkatugara, Leo kwa here unene unsitwe. Morwa kuhara kukwata egano unsitwe, age kwa lirongere sirongwa oso mosure. Nye kapi ga sikisire mo eharo lyendi. Age kwa tanta asi: “Melirongo lyange na ya dimbwilire asi magano govadiviunsitwe kapi aga vhuru kuvatera vantu va kwate egano unsitwe. Makura yipo na rundurukilire kokulirongera noveta.” Mwa za siruwo, Leo ga ya kere muhahende ano konyima mupanguli. Konyima zosiruwo, nage namukadendi kwa ya lirongere Bibeli noNombangi daJehova nokutambura usili nokuyakara vakareli vaKarunga wokuligava. Yisinke ya vaterere Leo a litare mwene asi mununu po? Age kwa limbwilire asi: “Kwa ya yi dimburura asi nampili tu lironge yoyinzi kuhamena Jehova nounsitwe, simpe yinzi twa hepa kudiva.”

6, 7. (a) Sihonena musinke selinunupiko ga gava Jehova? (b) Ngapi omu elinunupiko lyaKarunga nali “zerura” muntu?

⁶ Nkedi zauvali ezi nazi tu vatera tu linunupike kuna kara asi Jehova mwene kulikida elinunupiko. Gazara kweyi: “Ose varugani kumwe naKarunga.” (1 Kol. 3:9) Gazadara ko tupu! Jehova, Karunga ga nenepa unene, kutulikida efumadeko pokutupa situmbukira sokuruganesa Nonkango dendi, Bibeli, tu sikise mo sirugana setu sokuzuvhisa. Nampili ngomu Jehova a kulisa mbuto ezi atu tapeke nokutekera, age kwa tu pa situmbukira sosinene sokurugana kumwe nendi. (1 Kol. 3:6, 7) Monkedi zangesi, Karunga kwa tu tulira po sihonena sosiwa selinunupiko! Sihonena saJehova selinunupiko sa hepa kutukorangeda natuvenye tu kare vanunu po.

⁷ Sihonena saKarunga selinunupiko kwa kundamene unene Ndafita. Age kwa dimbire kwaJehova asi: “Ove HOMPA kupopera nge to parura nge; epakerombili [ndi elinunupiko, NW] lyoge lya zerura nge.” (2 Sam. 22:36) Ndafita ga yi dimbwilire asi age ga vhulire kurugana yininke yoyinene moIsraeli morwa Jehova ga mu likidire elinunupiko pokumupurakena nokumuvatera. (Epis. 113:5-7) Ya lifana nose. Nkenye yikara ndi nonkondo ndi yitumbukira eyi twa kara nayo, kwa tunda kwaJehova. (1 Kol. 4:7) Nkedi zimwe omu muntu gomununu po nava mu “zerura” kuna kara pokumutara Jehova asi age mulyo. (Ruk. 9:48) Tanko tu konakone eyi ya karera ngoso.

‘MUNUNU PO PWANAMUVENYE, YIGE MUNENE’

8. Ngapi omu elinunupiko ali kundama nkareso zetu kombunga zaJehova?

⁸ Elinunupiko mulyo mokukara yina tu gwanene po mombunga zaKarunga nokukwatesa ko ewapaiko lyombungakriste. Pasihonena, tarurura Petra, mudinkantukadi ogu va rerera mepata lyoNombangi. Morwa kuhara kurugana yininke monkedi zamwene, Petra kwa ligusire ko kombungakriste. Konyima zonomvhura dongandi, age ga ya tamekere kutengura hena kombungakriste. Age ngesi ana hafa mokukara mombunga zaJehova ntani kuna kukwatesa ko ewapaiko lyombungakriste. Ngapi omu nkareso zendi za litjindjire? Age kwa tjanga asi: “Mokulizuvha asi name ruha rombunga zaJehova na hepere kukwata egano nokutunga po yikara eyi yivali yomulyo, elinunupiko nougomoki.”

9. Nkareso musinke a likida muntu gelinunupiko konondya dopampepo edi atu gwana, ntani yitundwamo musinke a gwana?

⁹ Muntu gelinunupiko kulikida rupandu komawapaiko gaJehova, kukwatera mo nondya dopampepo. Muntu gwangoso kukara mulirongi gomuwa goBibeli nokukara neharo lyokuresa Ruhungu naAwake! Ngwendi sinzi sovakareli vaJehova wovalimburukwi, age kulitura mo mokuresa nkenye simbapiratjangwa sosipe komeho a si pungure moupungwiro wendi. Apa atu likida elinunupiko pokuresa nokulironga yimbapiratjangwa yetu yoBibeli, ose kutura po ezokomeho lyopampepo, ntani Jehova kumurerupira a tu ruganese unene mosirugana sendi.—Heb. 5:13, 14.

10. Ngapi omu natu likida nkareso zelinunupiko mombungakriste?

¹⁰ Pwa kara nkedi zimwe hena omu mununu po na kara “munene.” Jehova kuruganesa mpepo zendi zokupongoka mokuhorowora vagara wokuwapera va kare vakuronambunga mwankenye mbungakriste. Vagara owo kugendesa mapongo noyirugana yokuzuvhisa nokukorangeda mbungakriste. Apa atu likida elinunupiko mokuruganena kumwe nawo, ose kuvatera mbungakriste nazinye zi kare noruhafo nombili nouumwe. (Resa Vahebeli 13:7, 17.) Nsene ove mukuronambunga ndi mukwafimbunga, ove kulikida elinunupiko pokugava rupandu kwaJehova kositumbukira esi ga ku pa ndi?

11, 12. Nkareso musinke nazi tu ninkisa tu womulyo po mombunga zaJehova, ntani morwasinke ya karera ngoso?

¹¹ Mununu po kuyakara “munene” ndi gomulyo po mombunga zaJehova morwa nkareso zendi zelinunupiko kumuninkisa a kare mukareli gomuwa gwaKarunga. Jesus ga hepere kudiworokesa varongwa vendi va kare vanunu po morwa vamwe vawo kwa va kundamene nkareso zokulinenepeka zomosiruwo sina. Rukasa 9:46 kwa tanta asi: “Varongwa ga va gwene malipuragero gokuninka asi yilye munene po pwawo.” Kuvhura nose tu tameke kugazara asi ose twa pitakana vanavazinyetu ndi vantu wopeke ndi? Twa hepa kulisiga novantu womouzuni ava ava linenepeke nokuligazara tupu pwavene. Nsene tu linunupika nokutura Jehova muhowo, ayo ngayi korangeda vanavazinyetu.

¹² Nsene tu kwata egano evyukiso lyaJesus lyokukara mununu po, ngayi tu tumangeda tu likide elinunupiko momaruha nagenye geparu. Ngesi tatu ka konakona maruha gatatu.

KONDJERA KUKARA GOMUNUNU PO

13, 14. Ngapi omu mugara ndi mukadi na kara nelinunupiko, ntani ngapi eyi nayi kundama nonkwara dawo?

¹³ Mononkwara. Vantu wovanzi naina kuligazara tupu pwavene asi awo mulyo kupitakana vakwaawo. Mununu po kulikida nkareso ezi ga korangedere Paurusa Vakriste womoRoma. Age kwa tjenge asi: “Atu kondjereni eyi ayi reta mbili neyi ayi tu koraike-koraike.” (Rom. 14:19) Mununu po kukondjera kutulisa po mbili nanavenye nye unene po nomulikwali gwendi.

¹⁴ Tu konakoneni ruha royilihafeso. Yilihafeso eyi va hara valikwali kuvhura yi lisige. Mugara nampo posiruwo sendi sepwizumuko kwa hara kukara pembo nokuresa nobuke. Ano mukadi nampo kwa hara kupwaga nokukadingura vakaume. Ayo ngayi rerupira mukadi mokulikida efumadeko nsene yendi a kara nonkareso zelinunupiko nokudira kugazara tupu eyi ga hara mwene nye eyi ga hara mukadendi. Ano mugara nga hara mukadendi unene nsene mukadendi a dira kukondjera eyi ga hara nye hena a gazare ko eyi ga hara yendi. Nonkwara dawo ngadi nkondopara nsene navenye va linunupika.—Resa Vafilipi 2:1-4.

15, 16. Yisinke ga korangederere Ndafita Vaisraeli vakwawo mEpisarome 131, ntani ngapi eyi nayi kundama nkareso zetu mombungakriste?

¹⁵ Mombungakriste. Mouzuni, wovanzi kugazara tupu kugwana usimbu eyi va hara. Awo kapi va kara nelididimikiro ntani kapi va hara kundindira. Nsene tu kara nonkareso zelinunupiko, ngayi tu vatera tu ndindire ndi tu huguvare mwaJehova. (Resa Episarome 131:1-3.) Nsene tu linunupika tu ndindire ndi tu huguvare mwaJehova, nga tu tungika nokutuhengagwida nokugwana ruhafo. Eyi yiyo Ndafita ga korangederere Vaisraeli vakwawo va huguvare mwaKarunga!

¹⁶ Nsene o linunupika o huguvare ndi o ndindire mwaJehova, nove ngo gwana ehengagwido. (Epis. 42:5) Nampo ono “tokomene sirugana sombeyo” sokuhara “kukara mupitisili gombungakriste.” (1 Tim. 3:1-7) Nevatero lyompepo zokupongoka, wa hepa kurugana unene o tunge po yikara eyi ya hepa po mokukara mukuronambunga. Nye ngapi nsene tayi gusa siruwo sosire komeho va ku horowore o kare mukuronambunga? Muntu gelinunupiko nga ndindira nelididimikiro mokugwana yitumbukira, ntani nga twikira kukarera Jehova noruhafo mwankenye situmbukira.

17, 18. (a) Uwa musinke wokuhundira egusiropo ntani nokugusira po wopeke? (b) Evyukiso musinke lya kara moYisewe 6:1-5?

¹⁷ Melikwatakano lyetu nava wopeke. Sinzi sovantu kuvadigopera kuhundira egusiropo. Nye vakareli vaKarunga kulikida nkareso zelinunupiko pokutambura mapuko gawo nokuhundira egusiropo. Awo nawo kugusira po vakwaawo ava ava va zonene. Elinenepeko kuretesa po eligaunuko nonomutangu, nye kuligusira po kureta mbili mombungakriste.

¹⁸ Yiruwo yimwe twa hepa ‘kulikwambera’ ndi kulinunupika pokuhundira egusiropo komuntu nsene kapi tuna sikisa mo eyi katu lizuvhire nage. Moukaro wangesi, twa hepa kugazara mapuko ganyamwetu nokugatambura, nampili eyi yina horoka kapisi nayinye epuko lyetu.—Resa Yisewe 6:1-5.

19. Morwasinke natu karera norupandu kekorangedo lyomoMatjangwa lyokukara nonkareso zelinunupiko?

¹⁹ Ee, rupandu musi tuna kara naro asi Matjangwa kutukorangeda tu tunge po nkareso zelinunupiko! Poyiruwo yimwe udigu kulinunupika, nye nsene tu gazara unene waJehova nokudiworoka asi Jehova mwene kulikida elinunupiko, ayo ngayi tu tumangeda tu likide sikara oso sosiwa. Pokurugana ngoso, Jehova nga tu tara asi ose mulyo. Natuvenye ngano tu kondjere kukara nonkareso zelinunupiko.