Mapuro gokutunda kovaresi

Nonkango daJesus domwaMateusa 19:10-12 ngoso kutanta asi ava ava tokora kukara vadike kwa gwana uhwi wokukara vadike monkedi zokulikarera ndi?

Konakona sihorokwa esi sa ninkisire Jesus a uyunge kuhamena udike. Apa Vafalisayi va wizire kwendi nokumupura kuhamena elizumbo, Jesus ga zeresere nawa-nawa nompango daJehova kononkwara. Nampili ngomu Veta za pulisilire mugara a tjangere mukadendi mbapira zomalizumbo nsene ana mu mono “yuma yoyidona,” petameko kapisi yimo ya kere ngoso. (Deut. 24:1, 2) Makura Jesus kwa tente asi: “Ogu a zumbu mukadendi, nye pwa hana konda zehondero, a ka kware nagepeke, nonkwara a teza.”—Mat. 19:3-9.

Apa va zuvhire eyi, varongwa tava mu tantere asi: ‘Nsenesi yimo va likara vantu namukadendi ngoso, yoyiwa po nani yokudira kukwara.’ Melimburururo, Jesus ta va tantere asi: “Eyi kapisi yokukwata egano nkenye ogu, vaava va yi pa ntani. Yeeyi poveli ava va dira kuwapera nonkwara kutunda momazimo gozinyawo; poveli hena ava va rugana va dire kuwapera nonkwara, poveli hena vamwe ava va dira kukwara morwaUntungi weguru. [Nkenye ogu na vhura kuyitambura, a yi tambure, NW].”—Mat. 19:10-12.

Poveli ava va dira kuwapera nonkwara kutunda momazimo gozinyawo ndi poveli hena ava va rugana va dire kuwapera nonkwara. Nampili ngoso, poveli hena vamwe ava va dira kukwara morwa yimo va hara vene. Awo kulikida elipangero nokukara vadike ‘morwa Untungi weguru.’ Ngwendi Jesus, awo kwa tokora kukara vadike yipo va lihameke mo unene mosirugana soUhompa. Awo kapi va tunda momazimo gozinyawo nouhwi wokukara vadike ndi va u gwane monkedi zokulikarera. Awo vene va yi tokora mokutambura uhwi wokukara vadike.

Pokukwatesa ko eyi ga uyungire Jesus, mupositoli Paurusa kwa fatwilire asi Vakriste navenye va kare asi vadike ndi va kwara kuvhura kukarera Karunga monaruwa, nye vadike ava va tokora ‘momwenyo gwawo’ asi kapi ngava kwara ‘va pitakana.’ Monkedi musinke? Valikwali va hepa kugaununa siruwo sawo nononkondo dawo va hafese valikwali vawo nokuvapakera mbili. Nye vadike kuvhura kuligava vene mosirugana saHompa va hana situmbukira oso. Awo kutara udike wawo asi uhwi wokutunda kwaKarunga.—1 Kol. 7:7, 32-38.

Yipo nye, Matjangwa kututantera asi Mukriste kapi a gwana uhwi wokukara mudike monkedi zokulikarera. Nye, ga hepa kuutunga po pokukara ngorooro ga hana kukwara yipo a tware komeho sirugana soUhompa ga hana yipigauka ndi madonganeso. Wovanzi naina kwa tokora monomutjima dawo mokukara vadike mokonda zoyo, ano wopeke va hepa kuvakorangeda va twikire noudike wawo.