Esimwititi 100

Jesus mosikunino

KONYIMA zokutunda monzugo zekeguru, Jesus novapositoli vendi tava zi kosikunino saGesemani. Eli evango ava wiza yikando yoyinzi. Jesus makura ta va tantere va vangarare nokukanderera. Makura age ta zi hena kantando nokulinyongamena pevhu a kanderere.

Konyima Jesus ta wiza apa vana kara vapositoli vendi. Yinke ono kugazara vana kurugana? Awo kuna rara! Jesus ta va tantere asi va vangarare yikando yitatu, nye nkenye siruwo apa na ka tengura kuyavagwana vana rara. Apa ana ka tengura siruwo sokuhulilira, Jesus ta tanta asi: ‘Ngapi omu nomu rara posiruwo ngesi? Siruwo sina siki mo va gave nge momawoko gononkore dange.’

Poopo makura nzogera zombunga zonene tazi zuvhika. Tara! Vagara kuna kuwiza nonomfuro nonomuramu! Awo kuna simbi hena noramba di va minikire. Apa vana siki pepi, gumwe ta tundu mombunga nokuwiza dogoro kwaJesus. Ta mu ncumita, ngomu ono kuyimona apa. Mugara ogu kuna kara Judasa Isikalyoto! Morwasinke ana kuncumitira Jesus?

Jesus ta pura asi: ‘Judasa, ove kuna kugombekesa nge kencumito?’ Yimo, encumito kuna kara sidiviso. Alyo lyokudivisa vagara owo vana kara naJudasa asi ogu yige Jesus, mugara ogu vana hara. Nonkore daJesus makura tadi mu hedere di mu kwate. Nye Peturusa kapi ana kuvapulisira va tware Jesus pwa hana yita. Ta pweza mo rufuro oru ana pitura nokukamuna mugara ogo ana mu kara pepi. Rufuro taru sekuna mutwe gomugara nokuteta ko kutwi korulyo. Nye Jesus ta gumu etwi lyomugara nokuliverura.

Jesus ta tantere Peturusa asi: ‘Zweka rufuro roge mosiraro saro. Ove kuna kugazara asi ame kapi tani vhura kupura Tate a tumine nge mayovi govaengeli va ya parure nge?’ Yimo, kuvhura! Nye Jesus kapi ana kupura Karunga a mu tumine nampili muengeli gumwe, morwa ana diva asi siruwo sina siki yipo nonkore dendi di mu tware. Makura ta va ninki va mu tware. Tu tareni nye asi yinke yina kuhorokera Jesus ngesi.

Mateusa 26:36-56; Rukasa 22:39-53; Johanesa 18:1-12.