Egaununo 5
Siruwoke ntani kupi va hampurukilire Jesus?
MUPANGELI gwaRoma, hompa Augusitusi, ga penge mpangera asi navenye va hepa kutengura kositata sehampuruko lyawo va ka litjangese. Josefa nage ta zi kositata sawo somvharerwa Beterehema.
Sinzi sovantu kwa zire koBeterehema va ka litjangese, ano evango eli va gwene oJosefa naMariya kwa kere tupu hambo. Jesus kwa mu hampurukilire moomo, mevango omu ngava tura yindongili noyimuna yapeke. Mariya ta mu dingire pomakehe, makura ta mu rangeke mekungu lyokulira yimuna.
Karunga ga yi gendesere yipo hompa Augusitusi a tulise po veta zendi zokukalitjangesa. Eyi ya ninkisire Jesus va mu hampurukire moBeterehema, sitata esi ga pumbire Matjangwa nare asi yilyo ngano ngali kara evango ngava hampurukira mupangeli getumbwidiro.
Ago kwa kere masiku gomulyo! Uyerere waJehova kwa paiminine pombunga zovasita ava va kere mezana. Ano muengeli gwaJehova kwa va tanterere asi: “Mwa ha tjira! Yeeyi tareni, ame kuna mu retere Mbudi zoNgwa ezi ngazi reta ruhafo rorunene kovantu navenye. Gaaga masiku ngesi aga vana mu hampurukire Muzowoli, yige Kristusa, Hompa, mositata saNdafita. Yidiviso yokumudimbwilisa yeyi: nomu ka gwana Munona vana dingire momakehe, age kuna mu rangeke mekungu lyokulira yimuna.” Haruka ko, vaengeli wovanzi tava ya moneka nokudimba asi: “Efumano kwaKarunga meguru-guru! Mpora pevhu kovantu ava ga hara!”
Apa va tunda po vaengeli, vasita makura tava litantere-tantere asi: “Tu zeni koBeterehema, tu ka tareni eyi yina horoka ko, eyi ana tu dimbwire Hompa.” Tava genderere kuza ko ntani nokukagwana Jesus kooku ga tente muengeli asi yiko nava ka mu gwana. Apa vasita va tente eyi ga va tanterere muengeli, navenye ava va yi zuvhire kwa komokere. Mariya kwa pungwire nayinye eyi va tente nokuyiteda momutjima.
Sinzi sovantu naina kwa pura asi Jesus kwa mu hampurukire momazuva 25 gaSindimba. Nye Sindimba kuna kara siruwo sokufu somvhura ntani soutenda mosirongo sawo saBeterehema. Vasita ngano kapi va kere mezana masiku kumwe nononzwi dawo posiruwo sina. Ntani hena hompa gwaRoma ngano kapi ga pulire vantu owo nare va here kumurwanesa va gende momufu gwangoso va ka litjangese. Jesus kwa mu hampurukire koyiha yaSitarara ndi yaSikukutu. Rukasa 2:1-20; Mika 5:2.
▪ Morwasinke va zililire oJosefa naMariya koBeterehema?
▪ Sininke musinke sokutetukisa sa horokere masiku aga va hampurukire Jesus?
▪ Ngapi omu twa yi diva asi Jesus kapisi momazuva 25 gaSindimba va mu hampuruka?