Egaununo 14

Varongwa vaJesus wokuhova

KONYIMA zomazuva 40 momburundu, Jesus ga tengwire kwaJohanesa ogu ga mu kuhwire. Apa Johanesa ga mwene Jesus ta wiza kwendi, ta mu like nokutantera ava va kere po asi: “Tareni, Nzwigona zaKarunga ezi azi gusa po nonzo douzuni. Yige googo kani tantere asi, ‘Monyima zange tamu wiza mugara, ogu ga pita nge mekuto, yeeyi yige ga hova kukara po, ame simpe patupu.’” Nampili ngomu ga kere Johanesa mukurwaJesus gokomazimo, age ga divire asi Jesus yige ga hovere kukara po ngomuntu gopampepo meguru age Johanesa simpe patupu.

Nye, apa ga wizire Jesus va ya mu kuhwe, Johanesa kapi ga divilisire nawa-nawa asi Jesus yige nga kara Mesiyasa. Johanesa ga tente usili asi: “Name kapi na mu divire, nye ame kwa wizira ni ya kuhwe nomema asi, nkumwe a divikwire po koVaisraeli.”

Johanesa ga twikilire mokufatwilira vapurakeni vendi eyi ya horokere apa ga kuhwire Jesus pokuuyunga asi: “Nina mono Mpepo azo kuna kuhumburuka meguru ngwendi nkutji, makura tazi ya mu tembere. Name kapi na mu divire. Nye ogu ga tuma nge, ni ya kuhwe nomema, yige ga tanterere nge asi, ‘Ogu ngo mona, Mpepo azo kuna kumutembera zi kare pwendi, yige googo a kuhwisa koMpepo zoKupongoka.’ Ame na yi mona, makura yiyo na gava undipo wokuninka asi, age yige MunwaKarunga.”

Ezuva lyokukwama ko Johanesa kwa sikeme novarongwa vendi vavali. Apa ga hederere Jesus pepi, Johanesa ta tanta hena asi: “Tareni, Nzwigona zaKarunga ozo!” Varongwa owo vavali vaJohanesa Mukuhwi makura tava kwama Jesus. Gumwe gwawo kuna kara Andiliyasa, ano mukwawo kwa kere Johanesa ogu ga tjanga yininke eyi. Johanesa ogu nage kwa kere mumbyagona gwaJesus, age munwaSarome mumbyaMariya.

Apa ga setukire Jesus ta mono Andiliyasa naJohanesa kuna kumukwama, makura ta va pura asi: “Yinke muna kupapara?”

Awo tava mu pura asi: “Rabi [kutanta asi Murongi], oku wa kara kupi?”

Jesus ta limburura asi: “Wizeni, mu ya tare.”

Kwa kere poyiha yovili zaune kositenguko, ano oAndiliyasa naJohanesa makura tava zuhwara naJesus ezuva olyo. Konyima zoyo Andiliyasa kwa hefe unene, ta genderere mokukazigida mukurwendi, ogu ava tumbura asi Peturusa. Ta mu tantere asi: “Ose tuna gwana Mesiyasa.” Makura ta twara Peturusa kwaJesus. Nampo posiruwo sooso, Johanesa ga zire a ka simbe mumbyendi Jakopo a mu rete kwaJesus; nye nombudi edi Johanesa kapi ga di tura mo mEvangeli lyendi.

Ezuva lyokukwama ko, Jesus ta gwana Filipusa, ogu ga tundire moBetesaida, mositata soAndiliyasa naPeturusa. Age ta mu tantere asi: “Kwama nge.”

Makura Filipusa ta gwana Natanayera, ogu ava tumbura hena asi Baratoromeusa, ta mu tantere asi: “Ose tuna mono ogu ga tjanga Mosesa moVeta, nogu va tjanga vaporofete nawo. Edina lyendi yige Jesus gomoNasareta, munwaJosefa.” Natanayera kwa singanyekere. Makura ta mu pura asi: “MoNasareta nani kuvhura kutunda mo yoyiwa?”

Filipusa ta mu limburura asi: “Wiza o ya tare!” Apa va wizire, Jesus ta uyunga kuhamena Natanayera asi: “Muisraeli mwene-mwene ga hana umbudi.”

Natanayera ta mu pura asi: “Kupi oku wa divira nge?”

Jesus ta limburura asi: “Age Filipusa simpe nokukuzigida si, ame nare nina ku mono, ove moukuzu.”

Natanayera kwa tetukire. Makura ta limburura asi: “Murongi, ove MunwaKarunga, ove o hompa gwaIsraeli.”

Jesus ta tanta asi: “Amesi ove kuna kupulira, yeeyi na tanta asi, ame kuna ku mono moukuzu. Nye eyi ngo mona komeho yinene, ya pita eyi.” Makura ta va tantere asi: “Yosili na kumutantera: ngomu mona eguru kuna zeguruka, ano vaengeli vaKarunga awo kuna kuninka, va ronda va humburukira MunwaMuntu.”

Konyima tupu zeyi, Jesus kumwe novarongwa vendi wovape tava tundu mo momuramba gwaJorodana makura tava zi koGalireya. Johanesa 1:29-51.

▪ Wolye va kere varongwa vaJesus wokuhova?

▪ Ngapi omu Peturusa ntani naJakopo va va twere kwaJesus?

▪ Yinke ya mu ninkisire Natanayera a pure asi Jesus yige MunwaKarunga?