Egaununo 34

Jesus ta horowora vapositoli vendi

APO kwa pitire po konyara mvhura noukahe kutundilira apa Johanesa Mukuhwi ga divisire Jesus asi Nzwigona zaKarunga ntani apa ga tamekere Jesus sirugana sendi. Siruwo oso, Andiliyasa naSimoni Peturusa naJohanesa ntani nampo naJakopo (mukurwaJohanesa), naFilipusa naNatanayera (ogu ngava tumbura hena asi Baratoromeusa) kwa kere varongwa vendi wokuhova. Konyima, vanzi va ya lipakerere kumwe nawo mokukwama Kristusa.

Apa Jesus kwa liwapaikire mokuhorowora vapositoli vendi. Awo kwa ya kere vakaume vendi wovanene ava ga ya pere edeuro lyokulikarera. Nye komeho zokuvahorowora, Jesus kwa zire kondundu ntani kwa kandererere kwaKarunga masiku mudima, kwa hundire unongo netungiko lyaKarunga. Apa lya sire, makura ta zigida varongwa vendi, ta horowora po 12. Ngava va tumbura asi vapositoli, ntani ngava va tumbura simpe asi varongwa vendi.

Ntazimwe ava ga horowere Jesus ava vana tumbura nare, awo yiwo va kere varongwa vendi wokuhova. Mateusa, ogu ga zigidire Jesus komberewa zendi zomutero, nage kwa mu horowere. Ano ava vatano vapeke ga horowere kuna kara Judasa (ogu ngava tumbura asi Tadeusa) naJudasa Isikalyoto naSimoni gomupampi naTomasa naJakopo zaArufeusa. Jakopo ogu, ngava mu tumbura hena asi Jakopogona, nampo morwa kwa kere mununu morutu ndi munona monomvhura kwaJakopo munwaSebede.

Varongwa ava 12 kwa kere naJesus siruwo sosire, ntani ga va divire nawa. Sinzi sawo kwa kere vezimo lyaJesus. Jakopo namumbyendi Johanesa awo kwa kere vamumbyagona vaJesus. Ntani nampo Arufeusa kwa kere mumbyaJosefa, guhyaJesus. Yipo nye munwaArufeusa mupositoli Jakopo, nage kwa kere mumbyagona gwaJesus.

Jesus kapi ga kere noudigu wokudiworoka madina govapositoli vendi. Nye ove kuvhura o ga diworoke ndi? Diworoka asi kwa kere oSimoni vavali, oJakopo vavali ntani oJudasa vavali, ano Simoni gumwe ga kere namumbyendi Andiliyasa ntani Jakopo gumwe nage ga kere namumbyendi Johanesa. Ezi kuna kara nkedi omu no vhura kudiworoka vapositoli ntantatu. Vakwawo vane kukwatera mo mufutisi gomutero (Mateusa), ano gumwe googu ga kere nesinganyeko (Tomasa), gumwe googu va zigidire medi lyositji (Natanayera) ntani nakaume kendi Filipusa.

Vapositoli murongo nagumwe kwa tundililire koGalireya, komukunda gwaJesus. Natanayera kwa tundililire koKana. OFilipusa naPeturusa naAndiliyasa kwa tundililire koBetesaida, Peturusa naAndiliyasa konyima kwa ya dirukililire koKaperenaumu, oko ga tungire Mateusa. Jakopo naJohanesa kwa kere vakwati wonomfi yipo va tungire pepi naKaperenaumu. Ayo kumoneka asi Judasa Isikalyoto, ogu ga ya horwere Jesus, yige mupositoli gelike ga tundililire koJudeya. Marukusa 3:13-19; Rukasa 6:12-16.

▪ Wolye vapositoli ava va kere vezimo lyaJesus?

▪ Wolye vapositoli vaJesus, ntani ngapi omu no vhura kudiworoka madina gawo?

▪ Konomukunda musinke va tundilililire vapositoli?