Egaununo 13
Ava va ya kere varongwa vaJesus
YILYE mukareli gomuwa po gwaKarunga ogu ga parukire pevhu?— Yimo, Jesus Kristusa. Omu ono kugazara, kuvhura tu kare ngwendi yige ndi?— Bibeli kutanta asi ga tu sigilire sihonena tu si kwame. Ntani age kuna kutuzigida tu kare varongwa vendi.
Ono yi diva asi yinke ayi tanta kukara murongwa gwaJesus?— Ayo kutanta yininke yoyinzi. Pomuhowo twa hepa kulirongera ko kwendi. Nye kapisi yiyo yelike natu rugana. Twa hepa hena kupura eyi a uyunga. Nsene tu yi pura, ngatu rugana eyi ana kututantera.
Vantu wovanzi kutanta asi awo va pura mwaJesus. Omu ono kugazara, navenye sili varongwa vendi ndi?— Hawe, sinzi sawo kapisi varongwa vendi. Awo kuvhura kuza kongereka. Nye sinzi sawo kapi va litulira po siruwo mokulironga eyi ga rongere Jesus. Vaava tupu ava kwama sihonena saJesus yiwo varongwa vendi.
Tu ze tu zogere kuhamena vamwe ava va kere varongwa vaJesus apa ga kere pevhu. Gumwe gokuhova ogu ga kere murongwa kuna kara Filipusa. Filipusa kwa zire ta ka gwana kaume kendi Natanayera (ogu ngava tumbura hena asi Baratoromeusa), ogu ono kumona ana hingire mositji. Apa Natanayera ga wizire kwaJesus, Jesus ta tanta asi: ‘Tara Muisraeli mwene-mwene ga hana umbudi.’ Makura Natanayera ta tetuka nokupura asi: “Kupi oku wa divira nge?”
Jesus ta tanta asi: “Age Filipusa simpe nokukuzigida si, ame nare nina ku mono, ove moukuzu.” Natanayera kwa tetukire asi Jesus ga divire nawa-nawa oku ga kere yipo Natanayera ga tente asi: “Ove MunwaKarunga, ove o hompa gwaIsraeli.”—Johanesa 1:49.
Vamwe kwa ya kere varongwa vaJesus komeho oFilipusa naNatanayera va ya kare varongwa vendi. Awo kuna kara oAndiliyasa namukurwendi Peturusa ntani hena Johanesa namukurwendi Jakopo. (Johanesa 1:35-51) Nye nampili ngoso, konyima, vagara ava vane kwa tengwire kosirugana sawo sokukwata nomfi. Ezuva limwe, apa Jesus ga gendere kononkenkera dEkurudiva lyaGalireya, ta mono Peturusa naAndiliyasa kuna kutega ekwe lyawo mekurudiva. Makura Jesus ta va zigida asi: “Kwameni nge.”
Haga za mokugenda, Jesus ta mono oJakopo naJohanesa. Awo vana kara mowato kumwe naguhyawo, tava wapaike makwe gawo. Makura Jesus ta va zigida va mu kwame nawo. Yinke ngano wa rugene apa Jesus ga ku zigidire? Ngano wa mu kweme poopo ndi?— Vagara ava va divire Jesus. Awo va yi divire asi Karunga ga mu tumine. Poopo ngoso tava sigi sirugana sawo sokukwata nomfi makura tava kwama Jesus.—Mateusa 4:18-22.
Apa vagara ava va ya kere vasikuli vaJesus, eyi kwa tente nye asi kutunda opo awo ngava rugana nkenye apa youhunga ndi?— Hawe. Diworoka asi vagara ava kwa litatanene asi yilye gomunene po pwawo. Nye awo va purakenene kwaJesus ntani va kere neharo lyokurundurura nkareso zawo. Nsene tu kara neharo lyokutura po marunduruko, nose kuvhura tu kare varongwa vaJesus.
Jesus nga zigida vantu navenye mokukara varongwa vendi. Sikando simwe, mugara gongawo gomupangeli kwa wizire kwaJesus nokuyamupura omu na vhura kugwana mwenyo gwanarunye. Apa mupangeli gongawo ga tente asi age kwa gusa kusikisa mo yipango yaKarunga kutunda kounona wendi, Jesus ta mu zigida asi: ‘Wiza o ya kwame nge.’ Ono diva asi yinke ya horokere?—
Apa ga yi zuvhire asi kukara murongwa gwaJesus ayo mulyo unene kupitakana kukara ngawo, makura mugara ta guvarara unene. Age kapi ga ya kere murongwa gwaJesus morwa ga here yimaliwa yendi unene kupitakana omu ga here Karunga.—Rukasa 18:18-25.
Konyima zapa Jesus ga zuvhisire konyara mvhura zimwe noukahe, age ga horowere varongwa vendi 12 va kare vapositoli. Vapositoli kuna kara vagara ava ga tumine mokukarugana sirugana sokulikarera. Wa diva madina gawo ndi?— Tu ze tu hetekere ko kulironga madina gawo. Tara kefano lyawo, ntani heteka kutumbagura madina gawo. Hetekera ko kutumbura madina gawo momutwe.
Moruhura, gumwe govapositoli ta ya kara gomudona. Age kwa kere Judasa Isikalyoto. Konyima, tava ya horowora ko murongwa gwapeke a kare mupositoli. Wa diva edina lyendi ndi?— Matiyasa. Konyima oPaurusa naBaranabasa nawo tava ya kara vapositoli, nye kapisi wombunga zovapositoli 12.—Yirugana 1:23-26; 14:14.
Ngamoomu twa yi lirongere mEgaununo 1 lyobuke ezi, Jesus kwa likidire elituromo movanonagona. Morwasinke?— Morwa ga yi divire asi nawo kuvhura kukara varongwa vendi. Vanona pamwe kuvhura kuuyunga yininke eyi nayi vhura kuninkisa vakondi va purakene ntani nokuhara kulironga ko yoyinzi kuhamena Murongi goMunene.
Vakadi wovanzi nawo kwa ya kere varongwa vaJesus. Vamwe ngava gendi nendi apa nga zi a ka zuvhisire koyitata yapeke. Mariya Mangadarena naJohana ntani naSusana nawo ngava zi nendi. Nampo va mu vaterere mokumuterekera nondya nokumukuhwira yidwara yendi.—Rukasa 8:1-3.
Ono hara kukara murongwa gwaJesus ndi?— Diworoka asi kapi ya gwanena po tupu mokuuyunga asi ove o murongwa. Nye twa hepa kukara ngwendi gumwe govarongwa vendi nkenye oku tuna kara, kapisi paapa tupu atu zi komapongo goSikriste. Kuvhura o gazare ko mavango gamwe oku ya kara nomulyo kwetu mokukara ngwendi murongwa gwaJesus ndi?—
Yimo, twa hepa kuyirugana oyo kembo. Evango limwe kuna kara kosure. Eyi name nove natu dira kudivara kuna kara asi mokukara murongwa gousili gwaJesus, twa hepa kukara ngwendi moomu ga kere age nkenye ezuva, yi kare asi kupi tuna kara.
Tu rese kumwe eyi azi tanta Bibeli kuhamena varongwa vaJesus mwaMateusa 28:19, 20; Rukasa 6:13-16; Johanesa 8:31, 32; ntani 1 Peturusa 2:21.
[Efano pepenuno 72]
Yilye ogu mugara, ntani ngapi omu ga ya kere murongwa gwaJesus?
[Efano pepenuno 73]
Wolye ga zigidire Jesus mokuyakara varongwa vendi?
[Mafano pepenuno 75]
Peturusa
Andiliyasa
Jakopo (mukurwa Johanesa)
Johanesa
Filipusa
Natanayera
Mateusa
Tomasa
Jakopo (munwaArufeusa)
Simoni
Judasa (ogu ngava tumbura asi Tadeusa)
Judasa Isikalyoto
[Mafano pepenuno 76]
Wolye ava vakadi ngava vatere Jesus apa nga zi a ka zuvhise?
[Efano pepenuno 76]
Kupi oku kwa kara nomulyo kwetu mokukara ngwendi murongwa gwaJesus?