Egaununo 19

Jesus ta rongo mukadi goMusamaliya

MONZIRA zawo zokutunda koJudeya va ze koGalireya, oJesus novarongwa vendi kwa gendere zokupita momukunda gwaSamaliya. Awo kwa rorokere, makura poyiha yomutwekatji tava hingire pondjombo va pwizumuke pepi nositata saSikara. Ndjombo ezi kwa zi simine Jakopo nare-nare, azo simpe pozili neli ezuva pepi nositata sedina Nablus.

Apa ga pwizumukire Jesus pondjombo, varongwa vendi kwa zire kositata, va ka rande nondya. Apa ga wizire mukadi goMusamaliya a ya vhete mema, Jesus ta mu hundire asi: “Kwafeni nge ko mema ni nwe.”

Vajuda kapi ngava ligendere noVasamaliya morwa elitondororo lya kere po lyenene. Mukadi yipo ga tetukire, ta pura asi: “One amesi mu Vajuda, ame ni Musamaliya, ngapi omu muna kuhundira nge mema?”

Jesus ta limburura asi: ‘Nganosi kuna diva ogu ana kumutantera asi, “Kwafeni nge mema,” ngano none muna mu hundire, ano age ngano ana mu pe mema gomwenyo.’

Mukadi ta mu limburura asi: “Tate, one kutupu sipako sokuvhetesa, azo ndjombo hena nde. Kupi nomu ga gwana gene mema gomwenyo? Opo muna kara, one si mu vanene nye kupita zinyakurwetu Jakopo, ogu ga tu pa ezi ndjombo, omu nga nu mwene novana vendi noyimuna yendi?”

Jesus ta mu limburura asi: “Nkenye ogu a nu mema aga, kufa hena enota. Nye ogu gokunwa mema aga gokumupa ame, narumwe si hena kufa enota dogoro narunye. Yeeyi mema gokumupa ame, kukara mwendi runone romema gokuvhira mwenyo gwanarunye.”

Mukadi ta mu tantere asi: “Tate, kwafeni nge nye mema ogo no, ani dire hena kufa enota, ame ani dire hena kuyavheta.”

Jesus ta mu tantere asi: “Komu zi si mu ka zigide mugara gweni, mu wize oku.”

Mukadi ta limburura asi: “Ame kapi na paka mugara.”

Jesus ta mu tantere asi: “Hawe yimo, douhunga muna tanta asi, ‘Kapi na paka mugara.’ Yeeyi one vagara vatano mwa kere nawo, nye ogu muna kara nendi ntaantani, kapisi mugara gweni.”

Mukadi kwa tetukire ta mu tantere asi: “Tate, nina mu mono nye asi, one mu vaporofete.” Mukadi ta likida elituromo lyendi moyininke yopampepo, ta mu tantere asi Vasamaliya ngava “kanderere kondundu ezi [Gelisimu, ezi za kere pepi]; nye one [Vajuda] kutanta asi, moJerusarema yimo mevega lyokukanderera.”

Nye, Jesus kwa likidire asi evango lyoukareli kapi lya kara nomulyo. Ta uyunga asi: “Siruwo ngasi wiza, . . . apa ngava kanderere vakandereli wosili Tate moMpepo nomousili, yeeyi vakandereli vangoso yiwo va hara oTate. Karunga Mpepo, ano wokumukanderera ava kanderere moMpepo nomousili.”

Mukadi kwa tetukire unene, makura ta tanta asi: “Na yi diva asi, Mesiyasa ogu ava tumbura asi Kristusa, nga wiza. Apa nga wiza age nga ya tu dimbwira nayinye.”

Jesus ta mu tantere asi: “Ani nyame ogu nina kuuyunga neni.” Gazadara ko tupu! Mukadi kwa wizire a ya vhete mema poyiha yomutwekatji, nampo kwa hendukire kuligwanekera novakadi womomukunda gwawo ava va dilire kuhara mparukiso zendi, nye Jesus ga mu fumadekere monkedi zongwa. Jesus ta vyukilire kusansekera mukadi eyi ga dilire simpe kutantera nkenye ogu moyitarameho asi age yige Kristusa. Yitundwamo musinke ya kere?

Vasamaliya wovanzi kwa pulire

Varongwa apa va ka tengwire koSikara kumwe nonondya, kwa ya gwene Jesus pondjombo zaJakopo apa va mu sigire, age kuna kuuyunga nomukadi goMusamaliya. Apa va ya sikire varongwa, mukadi makura ta sigi kavaza kendi a ze kositata.

Mukadi kwa litulire mo unene moyininke eyi ga mu tanterere Jesus, makura ta ka tantera vagara mositata asi: “Wizeni mu ka tare mugara, ogu ana tantere nge nayinye eyi na rugana.” Mokupindura eharo lyawo, ta pura asi: “Kapi na kara yige Kristusa nampo?” Mukadi ya mu tompokere, morwa vantu kwa zire va ka limonene ko vene.

Posiruwo oso varongwa vaJesus kwa mu tumangedere asi a lye nondya edi va ka retere kositata. Nye Jesus ta va tantere asi: “Ame kuna kara nonondya edi mwa dira kudiva.”

Varongwa tava lipura-pura asi: “Mpange pweli ogu ana mu retere nondya?” Jesus ta va tantere asi: “Nondya dange dedi dokurugana mpango zogu ga tuma nge nedi dokusikisa mo sirugana sendi. ‘One amesi kuna kutanta asi, “Simpe nomwedi ne ko, ntani ngapa kara etezo.”’” Nampili ngoso, Jesus kwa uyungire kuhamena etezo lyopampepo, ta va tantere asi: “Kankukeni, mu tare mapya omu gana fire etezo. Mutezi kuna kutambura mfuto, makura ta pongaike nombuto komwenyo gwanarunye, asi mukuni nomutezi va hafe kumwe.”

Nampo Jesus ga mwene nare yitundwamo yoyinene mokuzogera kwendi kumwe nomukadi goMusamaliya, wovanzi va pulire Jesus morwa umbangi ou ga geve mukadi. Mukadi kwa geve umbangi kovantu womomukunda gwawo pokuuyunga asi: “Age kuna tantere nge nayinye eyi na rugana.” Yipo nye, apa vantu womoSikara va wizire kwaJesus kondjombo, tava mu hundire asi a kare tanko pwawo nokuvatantera ko yoyinzi. Jesus kwa tambwire ezigido olyo makura ta kara nawo mazuva gavali.

Vasamaliya va purakenene kwaJesus, ano vanzi va pulire. Awo makura tava tantere mukadi asi: “Kapisi morwanonkango doge hena tuna pulire, yeeyi nyose vene tuna lizuvhire ko yiyo tuna diva asi, nani yige sili Muzowoli gouzuni.” Yosili, mukadi goMusamaliya kwa gava sihonena sosiwa omu natu vhura kugava umbangi kuhamena Kristusa pokupindura eharo yipo vapurakeni va hare kudiva ko yoyinzi!

Nampo kwa kere Mangundu ndi Sindimba, morwa Jesus ga uyungire asi kwa hupire makwedi gane komeho zetezo, ano etezo lyoyilya mosirongo saPalestina kuhoroka moNisani, kwedi koVajuda oku kwa liza naNsinano ndi Kudumogona. Eyi kulikida asi konyima zoPaska zomomvhura 30 S.N., Jesus novarongwa vendi kwa kere moJudeya makwedi gatano-nagatatu mokuronga nokukuhwa. Makura tava tundu mo va ze koGalireya komukunda gwawo. Yinke ya va ndindilire? Johanesa 4:3-43.

▪ Morwasinke ya mu tetukisire mukadi goMusamaliya apa ga uyungire Jesus nendi?

▪ Yinke ga rongere Jesus mukadi kuhamena mema gomwenyo ntani evega lyoukareli?

▪ Ngapi omu ga lihorwere Jesus komukadi asi yige yilye, ntani morwasinke siuyungwa sendi sa kererere sokutetukisa?

▪ Umbangi musinke ga geve mukadi goMusamaliya ntani yitundwamo musinke ya kere?

▪ Ngapi omu da likwatakana nondya daJesus kumwe netezo?

▪ Ngapi omu natu vhura kudiva asi siruwo sokuhura kupi ga ka zuvhisilire Jesus moJudeya konyima zoPaska zomomvhura 30 S.N.?