Egaununo 25
Jesus ta fire nkenda munayingondwe
APA Jesus novarongwa vendi vane va ka dingwire yitata yaGalireya, nombudi dokuhamena yininke yokutetukisa eyi ga rugene kwa lihanene mombumbura nazinye. Nonkango dokuhamena yirugana yendi kwa ka sikire mositata omu mwa kere mugara goyingondwe. Uvera ou woudona kuzonagura maruha gamwe gorutu nsene una ya didi. Munayingondwe ogu kwa kere moukaro woudigu.
Apa ga sikire Jesus mositata, makura mugara goyingondwe ta mu hedere. Kuliza noVeta zaKarunga, munayingondwe ga hepere kuzigira mokurondora asi: “Na nyata, na nyata!” yipo vapeke va dire kumuhedera a va kagwise ko. Makura munayingondwe ta ligandere komeho zendi, ta hundire Jesus asi: “Hompa, nsene o yi panga, kuvhura kuverura nge.”
Eh, epuro musi ga kere nalyo mwaJesus! Nye uvera wendi wa zonagwire ukaro wendi. Yinke ga rugene Jesus? Ngano nyove, yinke no rugana? Nkenda tazi mu gwire, makura Jesus ta gonona kuwoko kwendi, ta mu gumu, ta ninki asi: “Nina yi panga, veruka!” Naruvali si nare ana veruka koyingondwe yendi.
Ono hara gumwe gonkenda ezi a kare ngohompa goge ndi? Monkedi omu ga tekwire Jesus munayingondwe kutupa ehuguvaro asi moUhompa wendi, ngau ka sika mo uporofete woBibeli ou asi: “Age kuretera nkenda varupiranonkondo novahepwe; age kuparura nomwenyo dava vana kara moruhepo.” Jesus nga ka sikisa mo eharo lyendi mokukavatera navenye ava vana kuhepa.
Nampili komeho zokukaverura munayingondwe, sirugana saJesus kwa retere ruhafo rorunene movantu. Mokusikisa mo uporofete waJesaya, Jesus ta pangere mugara ga verwire asi: “Tara, wa ha ka yi tantera muntu.” Makura ta mu tantere asi: “Nye zende o ka lilikide komupristeli, o ka gave nzambo zeveruko lyoge, ezi ga paka po Mosesa, ngazi kare umbangi wawo.”
Nye mugara ogu kwa hefe, kapi ga vhulire kulipungwire gelike sitetu esi. Age kwa zire tupu, ta tameke kuhanesa ezi mbudi napenye, tayi pindura elituromo movantu dogoro ya limbire Jesus kuza moyipafi moyitata. Yipo nye Jesus ta ka lipengeda momavega ga hana vantu, makura vantu tava tundu nakunye, va wize kwendi va ya mu purakene nokuyavaverura komauvera gawo. Rukasa 5:12-16; Marukusa 1:40-45; Mateusa 8:2-4; Levitikus 13:45; 14:10-13; Episarome 72:13; Jesaya 42:1, 2.
▪ Yitundwamo musinke ayi reta yingondwe, ntani erondoro musinke ga hepere kugava munayingondwe?
▪ Ngapi omu munayingondwe ga hundilire Jesus, ntani yinke natu vhura kulirongera ko kelimbururo lyaJesus?
▪ Ngapi omu mugara va verwire ga dilire kulimburukwa Jesus, ntani noyitundwamo musinke?