Egaununo 46
Mukadi ta gumu kosikoverero saJesus
MBUDI zaJesus zokukatunda koDekapolisi kwa ka sikire koKaperenaumu, ano emukurumbunga kwa pongere konontere dekurudiva mokumutambura. Awo va zuvhire asi ga ka mwenekedere ekundungu nokuverura mugara gompepo zondona. Apa ga zaukire awo kwa mu ndindilire, tava ya mu kundurukida.
Gumwe gowo va mu ndindilire kwa kere mwenyasinagoge, edina lyendi Jairusa. Makura ta ya gwire konompadi daJesus oku ta mu kanderere unene asi: “Munwange gomukadi pomutjima vana tara. Wiza o ka mu kambeke kuwoko, makura ta veruka age a paruke.” Jairusa ga mu here unene, morwa ga kere simpe musesugona gonomvhura 12 ngempogwe lyendi.
Makura Jesus ta vareke kugenda va ze kembo lyaJairusa, ano mbunga zonene tazi mu kwama. Vantu kwa kere noruhafo ngomu va ndindilire mokumona sitetu simwe hena. Nye mukadi gumwe ogu ga kere mombunga kwa gazarere tupu kuhamena udigu wamwene wounene.
Mukadi ogu kwa hepere kouvera woruhonde nomvhura 12. Ga hetekere mauhaku gokulisiga-siga oku lya pwililire emona lyendi. Nye kapi ga gwene ekwafo, ngwendi ehamba kwa lisangumwine.
Kuvhura o yi kwate egano asi uvera wendi kapi tupu wa mu pilisire nonkondo, nye hena kwa mu reterere nomuga neswau. Uvera wangoso kapi ava u uyunga moyitarameho. Kugwederera ko, moVeta zaMosesa kupita honde kwa ninkisire mukadi a nyate ano nkenye ogu ana kumuguma ndi yikoverero yendi ga hepa kulikuhwa nokukara ana nyata dogoro kongurova.
Mukadi kwa zuvhire yitetu yaJesus, makura ta mu papara. Mokudiva kunyata kwendi, ta pene mombunga va hana kumumona, ta liuyungire momutjima asi: “Sinene tupu ni guma nampili kosikoverero sendi, nyame kuveruka.” Apa ga yi rugene naruvali si ntundiliro zohonde zendi nare zina siti.
“Ogu ana gumu nge koyikoverero, yilye?” Eh, omu tupu da mu tukukisire mukadi nonkango odo daJesus! Ngapi omu ga yi divire asi kuna mu gumu? Peturusa ta tantere Jesus asi: ‘Mbunga ezi zina kuumbilikida ngesi zina kupaterekeda, nye yiyo no tanta asi, “Ogu ana gumu nge yilye?”’
Pokupapara mukadi Jesus ta limburura asi: “Pweli ogu ana gumu nge, yeeyi nina lizuvhu asi nonkondo dina tundu mo mwange.” Yimo, kapisi egumo tupu, morwa everuko eli lya tundire mo yilyo lya gusire nonkondo daJesus.
Mukadi eyi ga zuvha asi, ana nongonokwa, makura ta ligandere komeho zaJesus, age ta kankama. Komeho zovantu ta tanta usili naunye kuhamena uvera wendi ntani nomu ana veruka.
Morwa elitongonono lyomukadi, Jesus ta mu hengagwida nonkenda asi: “Munwange, epuro lyoge lina ku parura, zende nombili, ove hena o veruke koudigu woge.” Ayo kuhafesa pokudiva asi ogu ga horowora Karunga mokukapangera evhu kuna kara muntu geharo gonkenda, ogu a pakere vantu mbili ntani ga kara nononkondo dokuvavatera! Mateusa 9:18-22; Marukusa 5:21-34; Rukasa 8:40-48; Levitikus 15:25-27.
▪ Yilye ga kere Jairusa, ntani morwasinke ga zililire kwaJesus?
▪ Udigu musinke ga kere nawo mukadi gumwe, ntani morwasinke ya karerere udigu pokuza kwaJesus kevatero?
▪ Ngapi omu va mu verwire mukadi, ntani ngapi omu ga mu hengagwidire Jesus?