Egaununo 47

Ruguwo taru lisinti ekuruhafo

APA Jairusa ga mwene mukadi goruhonde vana mu verura, ehuguvaro lyendi tali nkondopara moyitetu yononkondo yaJesus. Komeho zoyo, Jesus kwa mu hundilire Jairusa a ze nokukavatera munwendi ogu ga here gomukadona gonomvhura 12, ogu ga kererere mokufa. Eyi ga tjilire unene Jairusa tayi horoka. Haga za Jesus mokuuyunga nomukadi, vantu vamwe kwa wizire tava wowotere Jairusa asi: “Munoge ana fu, wa ha hepekesa murongi mawoko-woko.”

Azo kwa kere mbudi zondona! Mugara ogu ga kere nekuto lyenene momukunda, tagu mu pwaga pokuzuvha asi munwendi ana fu. Nampili ngoso, Jesus ta yi zuvhu. Makura ta tara Jairusa, ta uyunga nehengagwido asi: “Gwa ha ku pwaga! Pura tupu.”

Jesus ta zi kumwe nendi kembo lyendi. Eyi va wiza ngoso membo, tava ya gwana vantu kuna kukwenauka, tava lili. Mbunga zovantu kwa pongere awo kuna kara mononkali. Apa Jesus ga hwilira mo tupu, ta va pura asi: “Eyi muna kuzogomokera oku tomu lili yinke? Munona kapi ana dogoroka, kuna rara tupu.”

Apa va yi zuvhire eyi vantu, awo makura tava mu zoro sirungu, yeeyi va divire asi mukadona ana fu. Nye, Jesus ta tanta asi kuna rara. Pokuruganesa nonkondo edi ga mu pere Karunga, age ga likidire asi vantu kuvhura kuvapindura koufe ngwendi moomu tupu ava vhuru kuvapindura monompofu dononene.

Jesus makura ta pwagesa navenye, ntudi vantu vatano oPeturusa naJakopo naJohanesa ntani novakurona vanakufa. Makura ta hwilire kumwe nawo omu ga kere munona. Age makura ta gusa kuwoko komunona oku ta mu tantere asi: “Talita kumi,” kuninka asi: “Mukadona, ame tani ku tantere asi, pinduka!” Naruvali si mukadona nare ana pinduka, kuna kugendagura! Apa va yi mwene vakurona vendi, tayi va retere ekuruhafo.

Konyima zokuvatantera va mu pe munona nondya, Jesus ta pangere Jairusa namukadendi asi nokuyisansekera si muntu eyi yina horoka po. Nye nampili ngoso, mukukumo gweyi tagu lihanene mosirongo mudima. Eli kwa kere evhumbuko lyauvali ga rugene Jesus. Mateusa 9:18-26; Marukusa 5:35-43; Rukasa 8:41-56.

▪ Mbudi musinke za ya gwene Jairusa, ntani ngapi omu ga mu korangedere Jesus?

▪ Apa va ka sikire membo lyaJairusa, ukaro musinke va ka gwene mo?

▪ Morwasinke ga uyungilire Jesus asi munona ogu ga fire kwa rere tupu?

▪ Wolye va kere vatano naJesus ava va mwene evhumbuko olyo?