Egaununo 58

Nomboroto nohingo

MBUNGA zonene kwa zire kwaJesus koDekapolisi. Vanzi va tundire koure va wize komukunda ogu gwa kere vapagani wovanzi mokuyamupurakena ntani nokuyaverura vaveli vawo. Awo kwa pitwire yikumba yoyinene, eyi ngava ruganesa mokusimbira mo nondya nsene kuna kupita momavango govapagani.

Moruhura, Jesus kwa zigidire varongwa vendi ta va tantere asi: “Ame zina gwire nge nkenda kombunga ezi, morwa mazuva gatatu nye vana kara pwange, nye va hana yokulya. Ano nsene ni va ninka va ze ngorooro nonzara zawo komambo, tava fire sikatji, yeeyi vamwe kava tundire koure.”

Varongwa vendi tava mu pura asi: “Oku nayi tunda yokukutika ava, omu momburundu?”

Jesus ta va pura asi: “Nomboroto dingapi muna kara nado?”

Awo tava mu limburura asi: “Ntano-nambali, notumfi tungapi tupu.”

Jesus kwa tanterere vantu va hingire pevhu, makura ta gusa nomboroto nonomfi, ta pandura Karunga, ta di tetagura, makura ta di pe kovarongwa vendi. Ano awo tava di gavere kovantu, makura awo tava li, tava kuta. Konyima, apa va pongaikire yihupwa, awo kwa zwidire yikumba yitano nayivali, nampili ngomu vagara wokusika po-4 000 ntani novakadi novanona va lire ko!

Jesus kwa rekerere mbunga zi tengure, makura nage novarongwa vendi tava perama mowato va tavakane korwaUtokero wEkurudiva lyaGalireya. Oko tava ka gwana Vafalisayi vana lipakerere kumwe noVasadukayi, ano awo kwa hetekere kuhundira Jesus ava likide sidiviso seyi yeguru.

Jesus pokudimburura elituromo lyawo lyokumuheteka, ta va limburura asi: “One ngurova kutanta asi, ‘Mungura ngaku wapa, yeeyi kuna gehe keguru.’ Ano ngurangura tomu tanta asi, ‘Naku kara ekundungu, morwa kuninka asi keguru kuna kara oku ugeha oku usovagani.’ One kwa diva nawa-nawa kufwaturura yimoneka yeguru, nye yidiviso yomoruveze kapi mwa yi konekesa.”

Morweyi, Jesus kwa va tumbwire asi vantu wovadona wokudira kulimburukwa nokuvarondora, ngamoomu ga rondwere nare Vafalisayi, asi kwato sidiviso esi ngava va pa ntudi saJona. Jesus novarongwa vendi tava perama mowato va ze koBetesaida, sitata esi sa karerere korwaMuzogo-pumezuva kononkenkera dEkurudiva lyaGalireya. Konyima, awo tava ya nongonona asi vana divara kusimba nomboroto, nye zimwe tupu va kere nazo mowato.

Pokudiworoka nzogera zendi kumwe noVafalisayi ntani noVasadukayi ava ngava kwatesa ko Herodesa, Jesus ta rondora varongwa vendi asi: “Takameseni oku tomu nomene hingo zoVafalisayi nezi zaHerodesa.” Apa ga tumbwire Jesus hingo, varongwa kwa gazarere asi age kwa tembe eyi va divarere kupitura nomboroto, awo makura tava tameke kulitatana. Apa ga yi nongwenene Jesus, ta va pura asi: “Morwasinke muna kulinungagwira yokupira nomboroto?”

Karuwogona tupu, nampo ezuva limwe ndi gavali, ga pitire po kutunda apa ga rugene Jesus sitetu pokugava mboroto komayovi govantu. Awo ngano va divire nye asi age kapi ga kere nosinka kuhamena nomboroto dene-dene. Ta va diworokesa asi: “Nani kapi muna kudiworoka? Apa na tetagwilire nomboroto ntano vantu mayovi gatano, nani yikumba yingapi yoruhupwa ya zulire, oru mwa toragwire?”

Awo tava mu limburura asi: “Murongo nayivali.”

“Ano apa na tetagwilire nomboroto ntano-nambali vantu mayovi gane, yikumba yingapi ya zulire koruhupwa, eyi mwa toragwire?”

Awo tava limburura asi: “Yitano-nayivali.”

Jesus makura ta va pura asi: “Eyi muna dilire kuzuvha ko simpe yinke nye?” “Eyi muna dilire kuyikwata egano asi kapisi mboroto nina tamba pokumutantera asi, ‘Omu takamese hingo zoVafalisayi noVasadukayi’?”

Varongwa vendi tava yi kwata nye egano. Hingo kuhahesa nokuninkisa mboroto zi vhuke, nkango kwa zi ruganesere mokufanekesa ezonauko. Varongwa kwa yi kwete egano asi Jesus kwa ruganesere sifanekeso mokuvarondora mokutakamesa ‘erongo lyoVafalisayi noVasadukayi,’ alyo kwa kere erongo lyokuzonagwisa. Marukusa 8:1-21; Mateusa 15:32–16:12.

▪ Morwasinke va karerere vantu noyikumba yoyinene?

▪ Konyima zokusiga Dekapolisi, kupi ga zire Jesus nowato?

▪ Yisinke varongwa vaJesus va dilire kukwata egano apa ga uyungire kuhamena hingo?

▪ Yisinke ga tembe Jesus pokutanta asi “hingo zoVafalisayi noVasadukayi”?