Egaununo 70
Everuro lyomugara ogu va hampurukire age mutwiku
APA va hetekere Vajuda kutoona Jesus nomamanya, age kapi ga tundire mo moJerusarema. MEsabata, Jesus novarongwa vendi kwa gendere mositata makura tava mono mugara ogu va hampuruka age mutwiku. Varongwa vendi tava mu pura asi: “Murongi, yilye ga zona, gogu ndi vakurona vendi, va mu hampuruke age mutwiku?”
Ngwendi varongi vamwe, nampo varongwa vaJesus nawo kwa pulire asi muntu kuvhura kuzona momukoga gozina. Nye Jesus ta va limburura asi: “Kapisi yige ga zona, novakurona vendi nawo si, nye asi yirugana yaKarunga yi horokere mwendi.” Utwiku wendi kapisi yitundwamo yononzo edi ga rugene mugara ndi vakurona vendi. Nzo zomuntu gokuhova Adamu kwa ninkisa vantu navenye va dire kusikilira mo ntani morwa eyi kuvhura va va rete nourema, pasihonena utwiku. Utwiku womugara ogu kwa geve mpito kwaJesus mokulikida yirugana yaKarunga.
Jesus kwa didilikire ngenderera zokurugana yirugana eyi. Age ta uyunga asi: “Ose atu rugane yirugana yogu ga tuma nge, ago simpe mutenya. Masiku taga wiza, omu na dira kuvhura kurugana muntu. Siruwo esi nina kara mouzuni, nyame uzera wouzuni.” Apa ga kere Jesus muzuni, age kwa kere ntundiliro zouzera mouzuni. Nye, konyima zosiruwo, nomfa dendi kwa mu tulire momundema omu ga dilire kurugana ko yuma.
Ano apa ga mene kudiuyunga, makura ta fizire mazeze pevhu, ta rungu etata lyomazeze. Makura ta kwita etata pomeho gomutwiku, ta mu tantere asi: “Zende o ka likuhwe mediva lyaSiroya.” Mugara ta limburukwa. Apa ga yi rugene makura ta mono. Omu tupu ga hefe apa ga ka tengwire age kuna kumona romuhowo meparu lyendi!
Vamaparambo nava ngava mu mono nare tava tetuka. Makura tava pura asi: “Kapisi yige nga hingire oku ta hehera ogu?” Vamwe tava tanta asi: “Yige.” Vamwe hena asi: “Hawe, kwa mu fana tupu.” Age mwene ta tanta asi: “Nyame.”
Vantu kwa here kudiva asi: “Ngapi omu gana mahuka meho goge?”
“Mugara gwina ava tumbura asi Jesus, yige ana rungu etata, yiyo ana li kwita pomeho gange, age yiyo ana tantere nge asi, ‘Zende kediva lyaSiroya, o ka likuhwe.’ Ame yiyo nina zi ko ni ka likuhwe, makura yiyo nina kumona.”
Tava mu pura asi: “Oku ana kara hena kupi?”
Age ta limburura asi: “Walye.”
Awo makura tava twara mugara ogu ga kere nare mutwiku koVafalisayi, vampitisili womaukarelikarunga. Vafalisayi nawo tava mu pura hena omu ga mahukire. Age ta va limburura asi: “Etata ana kwita momeho gange, makura nina ka likuhwa, yiyo na kumona.”
Vafalisayi ngano va hafesere ko mugara ogu va verwire. Nye awo kwa swawire Jesus. Awo tava uyunga asi: “Mugara ogo kapi ga tunda kwaKarunga.” Morwasinke va uyungilire ngoso? “Yeeyi kapi a pongora Esabata.” Nye Vafalisayi vamwe kwa lipulire asi: “Ngapi nye na vhura kurugana muntu gomunzoni yidiviso yokuhura apa?” Awo makura tava litatagana.
Awo kwa pururwire hena mugara asi: “Ove ngapi omu ono kumugazarera, morwa ana mahura meho goge?”
Age ta limburura asi: “Age muporofete.”
Vafalisayi va nyokere kuyipura eyi. Awo kwa yi pulire asi nampo pwa kere malizuvho gomokahore-hore pokatji kaJesus nogu mugara mokukumbagera vantu. Mokuhagekesa po nompata, tava zigida vakurona wogu mugara va ya va puragere. Johanesa 8:59; 9:1-18.
▪ Yinke ya retesere po utwiku womugara ntani yinke ya dilire kuuretesa po?
▪ Masiku musinke ga tembe Jesus omu na dira kuvhura kurugana muntu?
▪ Apa va mu verwire mugara, yinke va uyungire ava va mu divire?
▪ Ngapi omu Vafalisayi va litataganene kuhamena mugara ogu va verwire?