Egaununo 56
Yinke ayi nyateke muntu?
MARWANESO aga ga ligwanekerere nago Jesus kwa ligwederere unene. Varongwa vendi wovanzi kwa mu tjwayukire, hena Vajuda womoJudeya kwa mu paparere va mu dipage ngwendi moomu va here kuyirugana apa ga kere moJerusarema poPaska zomomvhura 31 S.N.
Azo kwa kere Paska zomomvhura 32 S.N. Mokuliza noVeta zaKarunga, Jesus kwa zire koPaska moJerusarema. Nye nampili ngoso, age kwa rungararere morwa eparu lyendi kwa kere mosiponga. Konyima ga ka tengwire koGalireya.
Nampo Jesus kwa kere moKaperenaumu apa Vafalisayi novalirongi womatjangwa womoJerusarema va wizire kwendi. Awo kwa paparere nompito omu nava vhura kumurundira kuhamena etezo po lyoveta zoukarelikarunga. Awo tava mu pura asi: “Ava varongwa woge, eyi ava tagurukire mpo zozinyakurwetu hena yisinke? Yeeyi apa ava li nondya, kapi ava likuhu komawoko.” Yininke eyi kapisi hepero kwaKarunga, nye Vafalisayi kwa yi tere asi nzo zonene nsene o dira kusikisa mo mpo ezi, ezi za kwaterere mo kulikuhwa komawoko dogoro mononkokona.
Mevango lyokulimburura erundiro lyawo, Jesus kwa likidire konkareso zawo zokuteza po Veta zaKarunga mowina. Ta va pura asi: “One po nye, yisinke omu tagurukire sipango saKarunga morwanompo deni? Karunga amesi kwa panga asi, ‘O fumadeke guho nanyoko,’ hena asi, ‘Ogu a tuku guhwe ndi zina, yige kufa.’ Nye one yimo omu tanta asi, ‘Nkenye ogu a tantere guhwe ndi zina asi, Eyi ya mu tumbukira yiyo nina kugava kwaKarunga, gwangesi asi kapi hena ga hepa kupakera guhwe nazina mbili.’”
Vafalisayi ngava rongo asi yimaliwa noyiweka ndi nkenye eyi va gava ngosigava kwaKarunga kwa hamena kontembeli ntani nokuyiruganesa si kwankenye sirugana. Nye nampili ngoso, muntu ogu nga gava sigava va mu pulisilire mokusiruganesa dogoro ponomfa dendi. Monkedi zangesi, muntu pokutanta asi yimaliwa ndi yiweka yendi kuna kara “korobani,” kuninka asi sigava kwaKarunga ndi kontembeli, kwa mu mangwilire kositumbukiro mokuyiruganesa mokupakera mbili vakurona vendi ava nampo vana kuhepa.
Nehandu lyouhunga koVafalisayi ava va pirwire Veta zaKarunga, Jesus ta tanta asi: “Yimo nye omu pepura nkango zaKarunga morwanompo deni. Kwa yi lipaka mwa yi lipaka! Epumbo lyaJesaya nyone tupu lya tamba pokutanta asi: ‘Ame Karunga muhoko ogu komarungu kwelike agu fumadeke nge, nye nomutjima dawo ure name. Neisi ayi va kwafa pokufumadeka nge, morwa awo kuronga Veta zosintu ngwendi asi zaKarunga!’”
Nampo mbunga kwa ligorere ko mokupulisira Vafalisayi va puragere Jesus. Nye apa Vafalisayi va dilire kudiva yokumulimburura, Jesus ta zigida mbunga zi hedere pepi. Age ta tanta asi: “Purakeneni nge namuvenye oku tomu zuvhu nawa. Kutupu seyi asi tundu ponze si hwilire momuntu asi si mu nyateke. Ano nye yininke eyi ayi pwaga mo momuntu, yiyo ayi mu nyateke.”
Konyima, apa va ya hwililire monzugo, varongwa vendi tava mu pura asi: “Ono diva tupu asi Vafalisayi, apa vana zuvhu nkango ozo, kuna va koro?”
Jesus ta limburura asi: “Nkenye sikunwa, esi ga dira kukuna Tate gemeguru, ngava si dura mo. Va sigeni tupu: awo kwa twika, yiyo hena ava pitisire vatwiku.”
Nampo Jesus ya mu tetukisire apa Peturusa ga mu pulire a va fatwilire kuhamena eyi ayi nyateke muntu. Jesus ta va limburura asi: “Nani none si simpe mutupu egano? Simpe nokuyikwata si asi, eyi ayi zi mokana, mezimo tanko ayi zi, ntani nye vana kuyipwagesa mo. Nye eyi ayi tundu mokana, komutjima ayi tundu, eyi yiyo nye ayi nyateke muntu. Yeeyi momutjima yimo amu tundu magazaro gomadona nedipago noruhonda nederengo nowidi, noyimpempa nokuswaura Karunga. Eyi yiyo ayi nyateke muntu. Ano nye eyi yokulya nomawoko aga vana dili kukuhwa, kapisi yiyo ayi nyateke muntu.”
Apa Jesus kapi ga nyokesere ukanguki. Age hena kapi ga korangedere muntu asi kapisi hepero kukuhwa mawoko gendi komeho zokuwapaika ndi zokulya nondya. Nye Jesus kwa nyokerere uyilipaki wovampitisili womaukarelikarunga ava va hetekerere ko kupepura noveta daKarunga douhunga pokutura po nompo dopasintu. Yimo, ayo kuna kara yirugana yoyidona eyi ayi nyateke muntu, ntani Jesus kwa yi likidire asi yininke eyi momutjima gomuntu ayi tundilire. Johanesa 7:1; Deuteronomium 16:16; Mateusa 15:1-20; Marukusa 7:1-23; Exodus 20:12; 21:17; Jesaya 29:13.
▪ Marwaneso musinke ga ligwanekerere nago Jesus?
▪ Erundiro musinke va tulire po Vafalisayi, ntani kuliza naJesus, ngapi omu Vafalisayi va tezere po Veta zaKarunga mowina?
▪ Yisinke ga likidire Jesus kuhamena eyi ayi nyateke muntu?