Egaununo 73

Musamaliya gonkenda

JESUS nampo kwa kere pepi naBetani, mukunda gwa kere nokilometa 3 kutunda koJerusarema. Mulirongi gumwe ga divire nawa Veta zaMosesa kwa pulire Jesus asi: “Murongi, yinke eyi nani vhura kurugana, nkumwe ngani gwanene po mwenyo gwanarunye?”

Jesus ga yi nongwenene asi mulirongi ogu gomatjangwa kapi ga pulilire asi a dive usili nye kwa here kumuheteka. Sitambo sendi kwa here asi Jesus a limburure monkedi ezi ngano za handukisire malizuvho goVajuda. Jesus makura ta ninki mulirongi ogu a li limburure mwene pokumupura asi: “MoVeta yinke eyi va tjanga mo? Omu o resa mo ngapi?”

Mulirongi ta limburura nonondunge pokutemwinina noveta daKarunga edi da kara mwaDeuteronomium 6:5 ntani mwaLevitikus 19:18, ta tanta asi: “O hare Hompa Karunga goge nomutjima goge nagunye nomwenyo goge nagunye nononkondo doge nadinye nonondunge doge nadinye, o hare hena mukweni ngwendi moomu wa lihara nyamoge.”

Jesus ta limburura asi: “Ono hungike kulimburura! O yi rugane ngo kare nomwenyo.”

Nampili ngoso, mulirongi kapi ya mu gwanenene po. Elimbururo lyaJesus kapi lya mu zererere. Age kwa here umbangi wokutunda kwaJesus asi magano gendi ga vyuka ntani asi age ga hungama monkedi omu a tekura vapeke. Makura ta pura asi: “Mwene ogo mukwetu yilye?”

Mekwatogano lyawo lyaLevitikus 19:18, Vajuda awo kwa pulire asi “mukwetu” kwa tembe tupu koVajuda vakwawo. Konyima nampili mupositoli Peturusa ga ya uyungire asi: “None mwa yi diva tupu asi, kapi va yi pulisira asi Mujuda a ligendere nomupagani ndi asi a ze kwendi.” Yipo nye, mulirongi gomatjangwa ntani nampo varongwa vaJesus va pulire asi awo va hungikire nsene va tekura tupu Vajuda vakwawo monkedi zongwa, morwa awo kwa tere ava va hana asi Vajuda asi kapisi vakwawo.

Yinke ga rugene Jesus mokuvyukisa magano govapurakeni vendi ga hana kuvahandukisa? Ta va simwitire esimwititi eli nampo lya horokere sili. Jesus kwa tente asi: “[Mujuda] gumwe kwa tundire koJerusarema, a ze koJeliko. Makura ta ka litwa movamahaka. Awo kwa mana tupu kumuhutura, tava mu toona, makura tava mu sigi, age kamwenyogona mo.”

Jesus ta twikire asi: “Pana kuninka tapa ya piti mupristeli gumwe, ta ka mu mona, makura ta ka mu zapuka ta ka za. Murevhi gumwe nage ta wiza po opo pevega, ana kumumona, ta zapuka ta ka pita. Ano Musamaliya gumwe nage ga gendere nzira ozo, ta ya mu gwana. Ano apa ga mu mwene, ta mu retere nkenda.”

Sinzi sovapristeli noVarevhi ava ngava vatere pontembeli moJerusarema kwa tungire moJeliko. Nzira zokugurumuka koJeliko kwa kere nzira zosiponga zonokilometa dokusika po-23. Mupristeli noMurevhi ngano va vaterere Mujuda mukwawo ogu ga kere moudigu. Nye kapi va yi rugene. Musamaliya yige ga mu vaterere. Vajuda kwa nyengere unene Vasamaliya, yiyo ya va ninkisire va swaure Jesus pokumutumbura asi “Musamaliya.”

Yinke ga rugene Musamaliya mokuvatera Mujuda? Jesus kwa tente asi: “Ta mu zire, makura ta dingi yironda yendi oku ta tjire po magadi novhinyu. Makura ta mu rondeke ponkutira zamwene, ta mu twara kohotera, ta ka mu veda. Kuna kusa, makura ta gusa mo tumaliva tuvali tosisiliveli [mfuto zomazuva gavali], a tu pe mwenyahotera, ta mu tantere asi: ‘Mu pakera mbili. Nsene ngaku kamba hena yimwe, ngani ya yi futa apa ngani tengura.’”

Apa ga mene kusimwitira Jesus, ta pura mulirongi gomatjangwa asi: “Koge ove omu ono kugazara, pwava vatatu, yilye po mukwawo zogo va rwadekere vamahaka?”

Morwa kudira kuhara kupa mfumwa Musamaliya, mulirongi kwa limburura tupu asi: “Googu ga mu fililire nkenda.”

Jesus kwa hulisa asi: “Zende, nove o ka yi rugane.”

Jesus ngano ga vyukilire kutantera mulirongi gomatjangwa asi ava va hana si Vajuda nawo kwa kere vakwawo, age ngano kapi ga yi tambwire. Hena sinzi sovapurakeni ngano va kwatesere ko mulirongi monzogera kumwe naJesus. Nampili ngoso, esimwititi eli kwa yi zeresere nawa asi vakwetu kuna kwatere mo vantu ava va hana asi worudi ndi womvharerwa zetu. Jesus kwa kere nondongeseso zokutetukisa! Rukasa 10:25-37; Yirugana 10:28; Johanesa 4:9; 8:48.

▪ Mapuro musinke ga pulire mulirongi gomatjangwa Jesus, nye sitambo sendi musinke sa kere?

▪ Wolye va tere Vajuda asi yiwo vakwawo, ntani yinke ayi likida asi nampili varongwa vaJesus kwa kere negano lyokulifana?

▪ Ngapi omu ga geve Jesus egano lyokuvyuka yipo mulirongi gomatjangwa a dire kulipatana?