Egaununo 83
Jesus ta ka lya noMufalisayi
JESUS kwa kere simpe membo lyoMufalisayi gekuto ntani age ga mene kuverura mugara gouvera womafulira. Ano Jesus eyi ga mona vamwe ava va zigidire tava lihorowere mavega gokomeho, ta va rongo sirongwa soulinunupiki.
Jesus ta tanta asi: “Nsene vana ku zigida kekwareko, wa ha ka hingira posipundi sokomeho. Nani mpamwe pweli ogu ga ku pita mekuto vana zigida ko hena. Ano nturagumbo ogu ana mu zigida nove nendi, ta wiza koge a tante asi, ‘Pa muntu ogu evega.’ Makura ove o tengure nye kevega lyokonyima nonomuga doge.”
Jesus ta va pukurura asi: “Ano nsene vana ku zigida, zende o ka hingire kosipundi sokonyima, asi ogu ana ku zigida, a ku tantere asi, ‘Hewa, heda oku!’ Ngoso ntani o gwana ekuto kwava muna hingire nawo kosiliro.” Mokuhulisa, Jesus ta uyunga asi: ‘Yeeyi nkenye ogu a linenepeke mwene, ngava mu nunupika, ano ogu a linunupike mwene, ngava mu nenepeka.’
Makura Jesus ta uyungisa Mufalisayi ogu ga mu zigidire ntani nokumusingwenena asi omu na gava muzuhwa ogu gwa kara nomulyo kwaKarunga. “Nsene to gava mulihako ndi muzuhwa, walye o zigida vakweni ndi vakuru woge ndi vamumbya woge ndi ekoro lyoge ndi vamaparambo woge wonongawo, neisi mpamwe ngava ku zigida nove, ngo gwanene po mfuto zoge. Nye nsene ono rugana sipito, o zigide vahepwe noyirema noyirema yomondambo novatwiku, makura ngo ragope, morwa awo kutupu eyi yokukurugwidira kuwoko.”
Kugava mulihako ndi muzuhwa kovahepwe kureta ruhafo komugavi, yeeyi Jesus kwa tanterere ogu ga mu zigidire asi: “Ngo gwana mfuto zayo kwaKarunga pevhumbuko lyovahungami.” Esingonono lyaJesus kuhamena murarero gomuwa kwa diworokesere mugenda kuhamena murarero gwapeke. Mugenda ogu kwa tente asi: “Munerago ogu nga ka kara kosiliro moUntungi waKarunga.” Nye, ngamoomu ga yi likidire Jesus kupitira mosifanekeso, kapisi navenye va hafera meho ozo.
“Mugara gumwe kwa rugene sipito sosinene, makura ta zigida vantu wovanzi. . . . Makura ta tumu mukareli gwendi, a ka tanta-tantere ava va rekerere asi, ‘Zendeni, morwa nayinye yina pu kuwapaika!’ Navenye makura tava tameke kunyoka, nkenye ogu pwarwendi. Gomuhowo ta tanta asi, ‘Ame kuna randa epya, nye na hepa kuza ni ka li tare. Na kanderere, ame kuna pagama.’ Gumwe hena ta tanta asi, ‘Ame kuna randa nohove donondjoko ntano, tani zi ni ka di heteke. Na kanderere, ame na pagama.’ Gumwe hena ta tanta asi, ‘Ame kuna gombora, yipo nye asi ame nokuvhura si kuwiza.’”
Ago kwa kere maliguso-guso mo gokudira mulyo! Epya ndi yimuna narunye kuyikonakona komeho o ka yi rande, ngano kapi pwa kere ngenderera zokukayikonakona hena konyima. Mokulifana, nonkwara ngano kapi tadi vhuru kukondera muntu mokutambura ezigido lyangoso. Apa ga yi zuvhire eyi nturagumbo makura ta handuka, ta tantere mukareli asi:
“‘Zende usimbu mononzira nopomaharango gositata, makura o ka rete vahepwe noyirema novatwiku noyirema yomondambo!’ Mukareli ta tengura, ta tanta asi: ‘Hekurwange, eyi komu tanta yina pu kurugana, nye evega simpe polili.’ Hekurwendi ta mu tantere hena asi, ‘Zende mwa za nonzira nopomaharango, o ka va sininike va wize, embo lyange kumwe li ya zure. . . . Vena kani rekere nagumwe si na huma nondya dosipito sange!’”
Ukaro musinke sina kusingonona sifanekeso esi? ‘Hekurwa,’ ogu ga wapaikire sipito kwa fanekesa Jehova Karunga; “mukareli” ogu ana kuzigida vantu, kuna kara Jesus Kristusa; ano “sipito sosinene,” kuna kara nompito dokuza moUhompa weguru.
Ava va hovere kugwana ezigido lyokuza moUhompa, kwa kere vampitisili womaukarelikarunga goVajuda womomazuva gaJesus. Nampili ngoso, awo va nyokere ezigido. Yipo nye, kutamekera poPentekoste mo-33 S.N., ezigido lyauvali kwa li geve kovantu womomuhoko goVajuda ava ngava hepeke ntani wokulinunupika. Nye kapisi wovanzi va tambwire ezigido mokuzwida sivaro so-144 000 moUhompa waKarunga wemeguru. Makura, konyima zonomvhura ntatu noukahe, mo-36 S.N., ezigido lyautatu lyokuhulilira kwa li geve kwava va hana si Vajuda ava va dilire kurugana yovamba, ntani epongaiko lyawo kwa twikira dogoro nanaina. Rukasa 14:1-24.
▪ Sirongwa musinke ga rongere Jesus kuhamena elinunupiko?
▪ Ngapi omu mutambuli vagenda na gava muzuhwa ogu gwa kara nomulyo kwaKarunga, ntani morwasinke nayi mu retera ruhafo?
▪ Morwasinke maliguso-guso mo govena va zigidire ga karere gokudira mulyo?
▪ Yisinke ya fanekesere sifanekeso saJesus sokuhamena “sipito sosinene”?