Egaununo 107

Sifanekeso sosipito sononkwara

KUPITIRA moyifanekeso yivali, Jesus ga tulire poruzera valirongi womatjangwa novapristeli wovanene, ano awo kwa here kumudipaga. Nye Jesus kapi ga mene kuuyunga nawo. Ta twikire hena kuvatantera ko sifanekeso simwe, pokutanta asi:

“Untungi weguru kwa lifana nahompa, ogu ga ruganenene munwendi gomugara sipito sononkwara. Makura age ta tumu vakareli vendi, va ka ta tanta-tantere vantu ava ga rekerere, asi va wize kosipito. Nye awo kapi va here kuwiza.”

Jehova Karunga yige Hompa gwina ga wapaikilire sipito sononkwara daMunwendi, Jesus Kristusa. Mufuko govagwavekwa 144 000 ngava ka lipakerera kumwe naJesus meguru. Vapangerwa vaHompa kwa kere Vaisraeli ava va retere megwanekero lyoVeta mo-1513 K.S.N., ava va ya gwene mpito zokukara “uhompa wovapristeli.” Posilika sina, awo kwa va rekerere kosipito sononkwara.

Nampili ngoso, ezigido lyokuhova lyowo va rekerere kwa li geve koyiha yehagero lyomvhura 29 S.N., apa Jesus novarongwa vendi (vakareli vahompa) va tamekere sirugana sawo sezuvhiso lyoUhompa. Nye Vaisraeli vene-vene ava va gwene ezigido eli va geve vakareli kutundilira mo-29 S.N. dogoro mo-33 S.N. kapi va here kuwiza. Makura Karunga yipo ga pere mpito zimwe komuhoko gwava va rekerere, ngamoomu ga yi simwitilire Jesus asi:

“Ta tumine ko hena vakareli vamwe, ta va tantere asi: ‘Ka tantereni varekerwa asi, Tareni, ame oku nina mana kuwapaika nondya dosipito. Nongombe noyimuna yokuneta yina pu kutoma, yininke nayinye yina zire mo. Wizeni kosipito sononkwara!’” Ezigido eli lyauvali lyokuhulilira lyovarekerwa vena kwa tamekere poPentekoste 33 S.N., apa mpepo zokupongoka va zi powomwene kovasikuli vaJesus. Ezigido eli kwa twikilire dogoro mo-36 S.N.

Nampili ngoso, konyara Vaisraeli navenye kwa nyokere ezigido eli. Jesus kwa uyungire asi: “Nye awo nombili si, tava zaaza kwayawo: gumwe kepya lyendi, ogu mukwawo koyininke yendi yondando. Ano ava vakwawo tava kwata vakareli vahompa, tava va hepeke, ntani vana kuvadipaga.” Jesus ta twikire asi: “Eyi ana ya yi zuvhu hompa, ta handuka, ta tumu vakwayita vendi, va ka dipage varudipagi owo. Sitata sawo tava si swakerere.” Eyi kwa horokere mo-70 S.N., apa Jerusarema va ya zi zonagwire po Varoma, ntani varudipagi vene kwa va dipagere.

Makura Jesus ta faturura eyi ya horokere: “Makura [hompa] ta tantere vakareli vendi asi: ‘Sipito sononkwara sene sina wapa, nye varekerwa yiwo vana dili kusiwapera. Yipo nye nomu zira ponompangwanzira, mu ka zigide nkenye ogu nomu vhura kukagwana a wize kosiptio sononkwara.’” Vakareli tava yi rugana “makura sinyanga tasi zura vagenda wosipito.”

Sirugana esi sokupongaika ava va zigidire monompangwanzira ponze zositata sovarekerwa kwa tamekere mo-36 S.N. Mupitisili govakwayita goVaroma Koroneliusa nepata lyendi va hana asi Vajuda va dilire kurugana yovamba yiwo va hovere kupongaika. Epongaiko lyava va hana asi Vajuda kwa twikililire dogoro nomosiruwo setu, mokupinganena po vena va nyokere pomuhowo ezigido.

Ano kuna kara mosiruwo setu yipo sinyanga sosipito sononkwara sina ya zura. Makura Jesus ta simwitire eyi ya horokere pokutanta asi: “Makura hompa ta hwilire a ka tare vagenda. Ta ka mona po gumwe, ogu ga dilire kudwara sikoverero sononkwara. Age ta mu ninki asi; ‘Ove hewee, ee, ngapi omu ono gendi, o wize omu, ove wa hana sikoverero sosipito sononkwara?’ Gwina teete zendi. Hompa makura ta tantere vakareli asi: ‘Mu mangeni komawoko nokomaguru, mu mu zugumine ponze mendema. Kwina yiko naku ka kara siliro nomalikwetjo gomazego.’”

Mugara ogu ga dilire kudwara sikoverero sosipito sononkwara kwa fanekesere ava ava lininkisa asi Vakriste. Karunga narumwe si ga nongonona vantu ava asi kwa kara nemoneko lyouhunga ngoVaisraeli wopampepo. Karunga kapi ga va gwavekere nompepo zokupongoka ngovapingwa woUhompa. Yipo nye awo kwa va zuguminine ponze momudema omu ngava hepera kezonauko.

Jesus ta hulisa sifanekeso sendi pokutanta asi: “Yeeyi ava va zigida vanzi, nye wovasesu tupu yiwo va horowora po.” Yimo, vanzi va zigidire momuhoko gwaIsraeli va ka kare mbunga zomufuko gwaKristusa, nye Vaisraeli vene-vene wovasesu tupu va horowere. Sinzi sava 144 000 va zigida mokukatambura mfeto zemeguru kuna kara asi kapisi Vaisraeli. Mateusa 22:1-14; Exodus 19:1-6, NW; Ehororo 14:1-3.

▪ Wolye va hovere kurekera kosipito sononkwara, ntani siruwoke va va zigidire?

▪ Siruwoke va geve ezigido lyokuhova, ntani wolye vakareli va ruganesere mokuligava?

▪ Siruwoke va geve ezigido lyauvali, ntani konyima wolye va ya zigidire?

▪ Wolye va fanekesere mugara ga dilire sikoverero sosipito?

▪ Wolye wovanzi ava va zigidire, ntani wolye wovasesu va horowora po?