Egaununo 102
Kristusa ta hwilire moJerusarema pasiuhompa
EZUVA lyokukwama ko, moSondaha mazuva 9 gaNisani, Jesus kwa tundire moBetani novarongwa vendi va vyuke koJerusarema va pite poNdundu zoMauzwe. Karuwogona tupu, tava siki pepi naBetefage, kamukunda aka ka kere poNdundu zoMauzwe. Jesus ta pangere varongwa vendi vavali asi:
“Zendeni komukunda ogu guna mu kara komeho. Nomu ka sika tupu, makura tomu gwana sindongili esi vana kuminine, aso namunwaso. Ka si ditureni, mu ka si retere nge oku. Nkenye ogu na ka mu pura nkenye eyi, ka mu tantereni asi: ‘Hompa ana si hepa.’ Nage kapi na ka likwata-kwata, nage naruvali si ta ka yi siga yi wize.”
Nampili ngomu pomuhowo varongwa va dilire kukwata egano asi mapukururo aga kwa kere esikiliromo lyouporofete woBibeli, konyima va ya yi nongwenene. Muporofete Sakaliya ga pumbire asi Hompa ogu ga tumbwidira Karunga nga za moJerusarema ana rondo posindongili, yimo “komutanda gosindongili.” Apa Saromo ga zire va ka mu gwaveke ngohompa, nage kwa rondere posindongiligona.
Apa varongwa va ka sikire moBetefage ano makura tava gusa sindongiligona kumwe nazinyaso, vamwe ava va sikamene po, tava va pura asi: “Yinke muna kurugana?” Nye apa va va tantere asi kuna si hepa Hompa, makura vagara tava pulisire varongwa va yi tware kwaJesus. Ano varongwa tava zara yikoverero yawo posindongiligona nazinyaso, nye Jesus ta rondo po sindongiligona.
Apa Jesus ga vyukire koJerusarema, mbunga kwa ligwederere. Sinzi sovantu tava zara yikoverero yawo monzira, ava vamwe tava tetagura nomutayi koyitji va di zare monzira. Tava zigire asi: “Va mu pande ogu ana kuwizira medina lyaHompa! Mpora meguru, Karunga a fumane meguru-guru!”
Vafalisayi vamwe mozo mbunga kwa handukire morwa madiviso aga, makura tava tantere Jesus asi: “Murongi, nyokera varongwa woge!” Nye Jesus ta va limburura asi: “Tani mu tantere asi, nsene va mwena ava, ngano mamanya yigo naga zigira.”
Jesus apa ga hedere pepi naJerusarema, a mone sitata, ta si lilire oku ta tanta asi: “Ani ngano nye kwa diva nomoomu mezuva lyoge, yininke eyi yokukuretera mbili! Nye pwantaantani kuna yi ku horeke.” Morwa kudira kulimburukwa mowina, Jerusarema kwa hepere kuzitengeka, ngamoomu ga pumbire Jesus asi:
“Yeeyi mazuva ngaga wiza, apa ngava sima vanyengi woge [Varoma mepitisiro lyoMukwayita Titusa] ekero, li ku kunduruke, awo ngava ku umbilikide, tava ku sitilikidire mo. Awo ngava ku myonena novana woge pevhu; moge kapi ngava siga mo emanya lina kara kekwawo.” Ezonauko eli lyaJerusarema ga pumbire Jesus kwa horokere konyima zonomvhura 37, momvhura 70 S.N.
Wovanzi mombunga va mwene Jesus ta vhumbura Rasarusa. Awo tava twikire kutantera ko vapeke kuhamena sitetu esi. Apa Jesus ga ka hwililire moJerusarema, mukukumo gwendi makura tagu lihanene mwa za sitata. Tava lipura asi: “Mugarake mwene ogu?” Mbunga makura tazi limburura asi: “Yige googo Jesus, muporofete gwaNasareta zomoGalireya.” Apa Vafalisayi va yi mwene eyi, tava sivana asi kwato eyi nava tompora ko, ngomu va uyungire asi: “Tareni, uzuni mudima tau mu kwama.”
Jesus ta zi montembeli a ka ronge, ngamoomu ga yika nsene ta ya dingura Jerusarema. Montembeli yimo va mu wizilire nye vatwiku noyirema, makura ta ya va verura! Apa va yi mwene nye vapristeli wovanene novalirongi womatjangwa oyo yitetu ga rugene, novanona ava va zigilire montembeli asi: “Wee-we, MunwaNdafita!” makura tava handuka.Tava mu tantere asi: “To zuvhu tupu omu vana kutanta vena?”
Jesus ta va limburura asi: “Nhi, kapi mwa resa rumwe asi, ‘Ove kwa ronga vanona novakeke, va ku hamberere’?”
Jesus ta twikire kuronga makura ta tarurura nanyinye yomontembeli. Azo kwa kere ngurova. Ta pwaga kumwe nava 12 va tengure koBetani. Oko yiko ga ka rere Sondaha ngurova, nampo membo lyamukwawo Rasarusa. Mateusa 21:1-11, 14-17; Marukusa 11:1-11; Rukasa 19:29-44; Johanesa 12:12-19; Sakaliya 9:9.
▪ Siruwoke ntani nomonkedi musinke ga hwililire Jesus moJerusarema ngoHompa?
▪ Morwasinke ya karerere nomulyo kombunga mokuhamberera Jesus?
▪ Ngapi omu ga lizuvhire Jesus apa ga mwene Jerusarema, ntani yinke ga pumbire?
▪ Yinke ya horokere apa ga zire Jesus montembeli?