Egaununo 105

Etameko lyezuva lyomulyo

APA ga tundire Jesus moJerusarema Mandaha ngurova, age kwa tengwire koBetani korwaUpumezuva pomukunkumo goNdundu zoMauzwe. Age kwa mene kuzuvhisa mazuva gavali moJerusarema. Jesus makura ta tengura hena mokukara membo lyamukwawo Rasarusa. Kutunda pena ga ka tundire koJeliko moUtano, eli kwa kere ezuva lyaune eli ga ka rere moBetani.

Ngurangura zonene moUvali momazuva 11 gaNisani, nage novarongwa vendi kwa kere hena morugendo. Eli kwa kere ezuva lyomulyo mosirugana saJesus ntani lyoyiviyauka unene. Alyo kwa kere ezuva lyokuhulilira eli ga ka monekere montembeli. Ano kwa kere hena ezuva lyokuhulilira lyokuzuvhisira moyitarameho komeho zompanguro nedipago lyendi.

Jesus novarongwa vendi kwa gendere nzira zokulifana ezi za pita poNdundu zoMauzwe zi vyuke koJerusarema. Apa va tundire moBetani, Peturusa ta nongonona sitji esi ga fingililire Jesus. Ta tanta asi: “Murongi, ko tara si nye, esi sitji soukuzu ko fingire, sina kukuta sa!”

Morwasinke ga dipagerere Jesus sitji sina? Ga yi likidire apa ga uyungire asi: “Yosili nina kumutantera asi: Nsene si mu kara nepuro, one mwa hana kusinganyeka, ngano kapisi ayi huru yeeyi yina horokere ukuzu yiyo ngomu rugana. Ngano kutantera tupu ngondundu ezi [Ndundu zoMauzwe apa va sikeme] asi, ‘Damuka po apa, o ka gwire mefuta,’ makura tayi horoka. Nayinye eyi omu hundire pokukanderera, ngomu yi gwana, nsene mu pura.”

Jesus pokufingilira sitji si kukute, age kwa rongere varongwa vendi hepero zokukara nepuro mwaKarunga. Ngomu ga tente asi: “Nayinye eyi omu hundire mekanderero, pureni asi muna yi gwana nare, nye yosili ngomu yi gwana.” Aso kwa kere sirongwa somulyo kwawo, unene morwa maheteko gomanene aga ga va ndindilire! Nye, pwa kara hena malikwatakano pokatji kekukuto lyositji soukuzu ntani nosikara sepuro.

Ngwendi sitji soukuzu, muhoko gwaIsraeli kwa kere nemoneko lyepuko. Nampili ngomu muhoko kwa kere momalikwatakano naKarunga ntani awo kwa monekere asi kusikisa mo nompango dendi, awo kapi va kere nepuro ntani kapi va yimine yiyimwa yoyiwa. Morwa kudira epuro, awo va ya nyokere MunwaKarunga! Yipo nye, pokukukutika sijti soukuzu sa hana enyango, Jesus kwa likidire yitundwamo yokuhulilira yomuhoko ogu gokudira yiyimwa nepuro.

Karuwogona tupu, Jesus novarongwa vendi tava ka sika moJerusarema, ntani ngamoomu va yi yika, tava zi montembeli, omu ga ka tamekere Jesus kuronga. Vapristeli wovanene nomasimbi goVajuda mokudiworoka eyi ga rugene Jesus vatjindji woyimaliwa, tava mu pura asi: “Yininke eyi ove nononkondo dalye ono kuyirugana? Ogu ga ku pa nonkondo edi hena yilye?”

Jesus ta limburura asi: “Name tani mu pura ko epuro limwe. Nsenesi nomu li limburura, name ngano nani mu tantera asi kwalye na di gwana nonkondo, edi nina kuruganesa nado yininke eyi. Oku lya tundire ekuho lyaJohanesa kupi? KwaKarunga ndi kovantu?”

Makura vapristeli nomasimbi tava liyongo omu nava mu limburura. “Nsenesi tu tanta asi ‘KwaKarunga,’ makura age ngano ta tu pura asi, ‘Eyi mwa dililire kupura Johanesa yisinke nye?’ Ano tu tante asi, ‘Kovantu,’ ose woma kovantu, yeeyi navenye Johanesa kumuninka asi muporofete.”

Vampitisili kapi va divire omu nava limburura. Makura tava limburura Jesus asi: “Walye.”

Makura Jesus ta va limburura asi: “Name si kapi nani mu tantera asi nononkondoke ani ruganesa yininke eyi.” Mateusa 21:19-27; Marukusa 11:19-33; Rukasa 20:1-8.

▪ Morwasinke Uvali womazuva 11 gaNisani wa karerere ezuva lyomulyo?

▪ Yirongwa musinke ga geve Jesus apa ga kukutikire sitji soukuzu?

▪ Ngapi omu ga limbwilire Jesus vena va mu pulire asi mononkondo dalye ga ruganenene yininke?