Egaununo 115

Tapa horoka nomutangu

MASIKU, Jesus kwa rongere sirongwa sosiwa selinunupiko pokukuhwa nompadi dovapositoli vendi. Konyima zoyo, ta tulisa po Murarero gediworoko lyonomfa dendi edi da hederere pepi. Nampili ngoso, tapa horoka yihorokwa yokutetukisa. Vapositoli vendi tava litatanesa asi yilye munene po mokatji kawo! Edi kwa kere nompata dina da kere po muhowo da ya twikilire simpe.

Diworoka asi konyima apa Jesus ga lisitunukire kondundu, vapositoli va litatanene asi yilye munene po mokatji kawo. Mokugwederera ko, apa oJakopo naJohanesa va hundilire yipundi yoyinene po moUhompa, nayo kwa retere nomutangu mokatji kovapositoli. Ano ngesi, momasiku gokuhulilira kukara nawo, Jesus kwa guvire mokumona asi simpe kuna kulitatana hena. Yinke ga rugene?

Mevango lyokutugumukira vapositoli konkareso zawo, nelididimikiro Jesus ta va fatwilire hena asi: “Ohompa wouzuni ou kupangera nomuhoko dawo, ano vapangeli kuvatumbura asi vakwafi wovantu. Nye one mwa ha kara ngoso. . . . Munene po gogu a hingire a lye ndi, ndi gogu ana kumuruganena? Nani kapisi gogu ana hingire a lye?” Makura ta va diworokesa sihonena sendi pokutanta asi: “Nye ame pokatji keni ngwendi ni mukareli na kara.”

Nampili va kere nomapuko gawo, vapositoli kwa kere simpe kumwe naJesus momaheteko gendi. Yipo ga uyungilire asi: “Ame tani mu tumbwidire Untungi, moomu va u tumbwidira nge otate.” Egwanekero eli lyopokatji kaJesus ntani novasikuli vendi wovalimburukwi kwa va kwatakanesa kumwe nendi moupangeli. Aso kuna kara tupu sivaro sosinunu sokusika po-144 000 sava va twara megwanekero eli lyoUhompa.

Nampili ngomu vapositoli va va pere ehuguvaro eli lyokutetukisa lyokukalihameka kumwe naKristusa moupangeli woUhompa, siruwo sina awo simpe kwa fire pampepo. Jesus kwa tente asi: “Masiku ganaina one namuvenye tomu ka limbilirwa mwarwange.” Apa Jesus ga tanterere Peturusa asi ana mu kanderere po, makura ta mu korangeda asi: “Ano apa ngo tengwira kwange, ngo koreke vakweni.”

Jesus ta faturura asi: “Vanona vange, karuwogona tupu nani kara neni. Ngomu papara nge, nye moomu na tantera Vajuda asi, ‘Oku nina kuza, kapi ngomu vhura kuza ko,’ none yimo hena nina kumutantera ntaantani. Sipango sosipe nina kumupa asi, omu lihara-hare moomu na mu hara ame, yimo nomu lihara-hara none. Nsene mu lihara-hara, yipo ngava divira vantu asi one sili varongwa vange.”

Peturusa ta mu pura asi: “Hompa, oku ono kuza hena kupi ko?”

Jesus ta limburura asi: “Oku nina kuza, ove nokuvhura si kukwama nge ntaantani, nye komeho ngo ka kwama nge.”

Peturusa kwa here kudiva asi: “Yinke nani dilira kuvhura kukukwama ntaantani? Nampili di wizire nge nomfa, ove nokukusiga si.”

Jesus ta mu pura asi: “Nampili di ku wizire nomfa, ove nokusiga nge si? Yosili na kukutantera asi, aso sikondomboro sa hana kuziga, no patana nge rutatu.”

Peturusa ta mu tantere asi: “Ame nampili ngano kufa, kufa tupu noge, nokukupatana si ame.” Apa vapositoli wokuhupa ko va uyungire yokulifana, age Peturusa ta likanganga asi: “Nampili navenye va limbilirwe mwaroge, ame nampili kuna manga, asi ni limbilirwe mwaroge?”

Jesus pokutumbura posiruwo sina ga tumine vapositoli mosirugana sokuzuvhisa moGalireya va hana ndjato zoyimaliwa nezi zonondya, ta va pura asi: “Mwa hepere yuma ndi?”

Awo tava limburura asi: “Hawe, nayimwe si.”

Jesus ta va tantere asi: “Ano nye ntaantani, ogu ga kara nondjato zoyimaliva, a zi guse, nogu gwezi zomorugendo nage ngosikwawo. Ogu ya pira, a randese po sikoverero sendi, a rande rufuro. Yeeyi ame tani mu tantere asi, mwange yimo ngayi ka sikilira mo eyi va tjanga nge asi, ‘Age kwa mu varwira kovazonaguli,’ Yeeyi nayinye eyi ya hamena nge, ngayi sika mo nye.”

Jesus kwa tembe kosiruwo esi va ka mu pamparere kumwe novanamahaka ndi novazonaguli. Age kwa likidire hena asi vasikuli vendi nawo komeho ngava ligwanekera nomahepeko gomanene. Awo tava mu tantere asi: “Hompa, nomfuro mbali dedi.”

Age ta limburura asi: “Makura yi pwe.” Ngamoomu ngatu ka yi mona, mokukara kwawo nonomfuro, Jesus ga ka gwene mpito zokukavaronga sirongwa sapeke somulyo. Mateusa 26:31-35; Marukusa 14:27-31; Rukasa 22:24-38; Johanesa 13:31-38; Ehororo 14:1-3.

▪ Morwasinke elitatano lyovapositoli lya kere sininke sokutetukisa?

▪ Ngapi omu ga kohwenene po Jesus elitatano olyo?

▪ Mpito musinke lya gava egwanekero eli ga tulisire po Jesus kumwe novarongwa vendi?

▪ Sipango musinke sosipe ga geve Jesus, ntani ngapi omu sa kara nomulyo?

▪ Elipandadeko musinke ga likidire Peturusa, ntani yinke ga uyungire Jesus?

▪ Morwasinke mapukururo gaJesus kuhamena kusimba ndjato zoyimaliwa nezi zonondya ga lisigire naga ga geve pomuhowo?