Kuliwapaikira yiuyungwa yomombungakriste

ELIKWAMO lyoSikora zoUkareli kwa li wapaikira yipo mbungakriste nazinye zi gwanene mo uwa. Nombudi domulyo kudigava hena komapongo gapeke gomombungakriste ntani nokoyigongi. Nsene vana ku pe ruha mwalimwe lyomalikwamo aga, ove kuna ku pe situmbukira sosinene. Mupositoli Paurusa kwa korangedere mutareli Timoteusa mokutakamesa erongo lyendi. (1 Tim. 4:16) Owo ava kara komapongo goSikriste kulitulira po siruwo somulyo, ntani vamwe kukondja yipo va ya kare mo momapongo mokuyapurakena komapukururo gokuhamena elikwatakano lyawo naKarunga. Kugava mapukururo gangoso yosili kuna kara situmbukira sosinene! Ngapi omu no vhura kusikisa mo nawa situmbukira sangoso?

Magano gomulyo gemEreso lyoBibeli

Ruha oru rosikora kwa demenena kereso lyoBibeli lyomosivike. Nkondopeka konkedi omu matjangwa aga tu kundama. Ngamoomu va yi likida mwaNehemiya 8:8, Esira novakwawo kwa reserere mbunga Nonkango daKarunga ‘nokudifaturura,’ makura mbunga tazi zuvhu ko nawa. Pokurugana magano gomulyo goBibeli ngayi ku pa mpito mokuyirugana oyo nove.

Ngapi omu wa hepa kuliwapaikira siuyungwa sangoso? Nsene kuvhura, resa ruha rwereso lyoBibeli sivike simwe ndi kupitakana opo komeho zosiruwo. Makura gazadara ko kuhamena mbungakriste zeni ntani noyihepwa yazo. Kanderera kuhamena yuma oyo. Mapukururo noyihonena nonompango musinke domoruha oru roNonkango daKarunga dina kusikisa mo yihepwa oyo?

Kurugana epaparo mulyo unene. Mwa kara noIndeksi zoRuhungu zomvhura nazinye meraka lyeni ndi? Nsene mwa kara nazo, zi ruganesa nawa. Pokurugana epaparo mweyi va nduruka nare kuhamena novelise edi ono horowora kudemenena po, kuvhura o gwane mauzera gosirongwa oso nomafatururo gesikiliromo lyomauporofete nomakonakono geyi ga horora matjangwa gamwe kuhamena Jehova, ndi nonzogera kuhamena nompango dongandi. Wa ha ruganesa mauzera gomanzi. Demenena tupu konovelise dongandi. Ya wapa mokutarurura novelise dononsesu nokudifaturura nawa.

Siuyungwa soge kuvhura hena si hepe elihamekomo lyovapurakeni kuhamena omu kava gwanenene mo uwa mereso lyoBibeli lyosivike. Yininke musinke vana gwana mo eyi nayi va retera uwa melirongo lyopwanyamwawo neli lyepata ndi moyirugana yawo yokuzuvhisa ndi momparukiso zawo? Yikara musinke ga likidire Jehova meruganeno lyendi kumwe novantu nonomuhoko? Yininke musinke vana lirongo mo vapurakeni eyi yina nkondopeke epuro lyawo nokutunga rupandu rwawo kwaJehova? Wa ha demenena koyitwa youdigu unene. Nkondopeka etanto ntani nomulyo goyitwa eyi ono horowora.

Epongo lyoYirugana

Nsene kuna kugava siuyungwa sina tundu moYirugana yetu yoUhompa, wa hepa kugava mauzera nagenye gana kara mo. Vatera vapurakeni mokugazadara ko komatjangwa aga gana kukwatesa ko mapukururo. (Tit. 1:9) Siruwo sisupi, ano ayo kapi ayi pulisire mokureta mo magano gokugwederera ko.

Ano poyiruwo yimwe, kuvhura va ku pe siuyungwa somoYirugana yetu yoUhompa nye mauzera kuna kara mosimbapiratjangwa nasopeke. Kuvhura va ku likide komauzera gomosirongwa somoRuhungu, ndi siuyungwa soge kuvhura si kare nomauzera gomasesu tupu. Ngomurongi wa hepa kugazadara ko koyihepwa yombungakriste kuliza nosiuyungwa esi vana ku pe. Kuvhura o ruganese sifanekeso sosisupi, ndi o simwitire silimonena sina lizi. Diworoka asi siuyungwa soge kapisi sokuuyunga tupu kuhamena sirongwa oso nye mokusigava monkedi omu no vhura kuvatera mbungakriste zi sikise mo sirugana esi da tura po Nonkango daKarunga ntani nomokugwana ruhafo mokuyirugana.—Yirug. 20:20, 21.

Ngomu ono kuliwapaikira siuyungwa soge, gazadara ko komaukaro gava va kara mombungakriste. Va pandadeka kweyi vana kurugana ngesi. Ngapi omu kuruganesa mapukururo aga gana kara mosiuyungwa nayi gwederera kevhuliko noruhafo rwawo moyirugana yokuzuvhisa?

Siuyungwa soge kuna kwatere mo elikido ndi epuragero? Nsene yimo, wa hepa kusiliwapaikira komeho zosiruwo. Pamwe kuvhura tu hare kupura gumwe a tu wapaikire elikido ndi epuragero, nye oyo kapi ayi reta yitundwamo yoyiwa. Nsene kuvhura, liyombereseni elikido ndi epuragero olyo komeho zezuva lyepongo. Divilisa asi maruha aga gosiuyungwa soge kuna kugarugana monkedi omu naga nkondopeka mapukururo gomosiuyungwa soge.

Yigongi

Vanavazinyetu wovagara ava ava tungu po yikara yopampepo yoyiwa ntani ava ava kara vauyungi novarongi wovawa kuvhura kuvapa yiuyungwa koyigongi. Eyi sili kuna kara yilika yokulikarera yelirongo lyeyi yopampepo. Yiuyungwa yangoso kuvhura kukara morupe rosiuyungwa sokuresa ndi sekamo ndi somapukururo gomosidanauka somoBibeli momparukiso zomomazuva getu ndi paragarafu zomapukururo. Nsene kuna ku pe situmbukira pelikwamo lyosigongi, konakona nawa siuyungwa soge. Si liwapaikira nawa dogoro o nongonone mulyo gwaso.

Owo ava pe siuyungwa sokuresa va hepa kusiresa moomu sina kara. Kapi ava rundurura nonkango ndi va ture mo malitjindjo. Awo kusilironga va kwate nawa egano magano gomulyo nomu vana ga tungu po. Awo kuliyomberesa kuresa kuziguruka dogoro va vhure kugava siuyungwa oso pokutumbagura nawa nonkango odo nononkondo nomalizuvho nelituromo ntani nomukumo, yimo tupu hena nezwi lyokuzera eli nali zuvhika kombunga zonene zovapurakeni.

Vanavazinyetu wovagara ava ava pe siuyungwa sekamo kukara nositumbukira sokutunga siuyungwa monkedi omu sa hepa kudemenena kekamo olyo vana va pe. Mevango lyokuresa mekamo ndi lyokusiliwapaikira morupe rosiuyungwa sokuresa, muuyungi ga hepa kusigava nemanguruko kutundilira komutjima. Ayo ya kara nomulyo mokukwaterera kosiruwo esi vana likida mekamo lyosiuyungwa yipo o gave nawa nkenye egano lyomulyo. Muuyungi ga hepa kuruganesa nawa magano nomatjangwa aga vana likida konhi zomagano gomulyo. Ga ha reta mo magano gokugwederera ko aga ngaga vhura kumuninkisa a pempuke kweyi yina kara mekamo lyosiuyungwa. Etateko lyomapukururo kuna kara Nonkango daKarunga. Situmbukira sovakuronambunga kuna kara ‘sokuudisa nonkango.’ (2 Tim. 4:1, 2) Yipo nye muuyungi ga hepa kudemenena komatjangwa gemekamo lyosiuyungwa, nokugateda ko nokulikida omu nava vhura kugatura pasirugana.

Wa ha liranga

Ove kwa kara mombungakriste omu mwa kara nompito dononzi dokugava yiuuyunga ndi? Ngapi omu no vhura kuruganesa siruwo sokugwanena po mokuliwapaikira yiuyungwa nayinye? Wa ha liranga kuliwapaikira yiuyungwa yoge.

Yiuyungwa eyi sili ayi retere uwa mbungakriste ya hepa kuyiliwapaikira komeho zosiruwo. Yipo nye, kara nonkareso zokuresa mo paapa tupu no gwana nkenye siuyungwa. Eyi ngayi ku pa mpito mokugazadara ko unene ngomu ono kurugana hena yirugana nayopeke. Momazuva ndi moyivike komeho zokukagava siuyungwa soge, kuvhura ngo zuvhe magano aga ngaga ku vatera mokudimburura omu no ruganesa nawa mapukururo ogo. Kuvhura pa horoke maukaro aga naga likida asi mapukururo ogo kuna kara parugano sili. Kuresa nokugazadara ko kosiuyungwa soge konyima tupu zokusigwana kugusa siruwo, nye ayo ya wapa. Apa ngo rugana ekamo lyosiuyungwa soge, ngo gwanena mo uwa morwa ono gazadara ko komeho zosiruwo. Kuliwapaikira yiuyungwa monkedi zangesi ngayi ku vatera mokusesupika sinka nomokugava yiuyungwa yoge monkedi zoparugano ntani nokuguma nomutjima dava womombungakriste.

Nsene ono kara norupandu kouhwi ou va ku pa melikwamo lyaJehova lyokuronga vantu vendi, ngo mu fumadeka ntani ngo kara ngetungiko kowo va mu hara.—Jes. 54:13; Rom. 12:6-8.