Kuruganesa mauzera aga vana ku pe

BIBELI kwa fanekesa mbungakriste korutu. Nkenye ruha rwa kara nomulyo, nye “maruha aga kapi aga rugana sirugana simwe tupu.” Mokuliza noyo, twa hepa kurugana nkenye situmbukira vana tu pe. Eyi ya hepa asi tu kwate egano nokurugana nawa nkenye siuyungwa vana tu pe mevango lyokugazara asi yirongwa yimwe nayi tovara kupitakana yikwawo. (Rom. 12:4-8) Mbunga zomukareli gokulimburukwa gonondunge za kara nositumbukira sokugava nondya “posiruwo sado.” (Mat. 24:45) Apa atu ruganesa evhuliko lyetu pokutunga yiuyungwa kuliza nomapukururo aga tuna gwana, ose ngoso kuna kulikida efumadeko norupandu kewapaiko olyo. Eyi kugwederera kezokomeho lyewa lyomombungakriste.

Eyi no tura mosiuyungwa soge. Nsene vana ku pe sirongwa mosikora, divilisa mokutunga sirongwa oso vana ku pe nye kapisi nayopeke. Moyihorokwa yoyinzi, ngava ku pa mauzera gosiuyungwa soge. Nsene kapi vana ku tantere asi mauzera musinke no ruganesa ngetateko lyosiuyungwa soge, kuvhura o papare mauzera konontundiliro domapukururo edi ono hara. Nampili ngoso, ngomu ono kuliwapaikira siuyungwa soge, divilisa asi siuyungwa nasinye kuna si tungu kuliza nosirongwa esi vana ku pe. Pokutokora eyi no tura mosiuyungwa soge, wa hepa hena kugazadara ko vapurakeni woge.

Tarurura nawa mauzera gosiuyungwa, nokukonakona matjangwa aga va tura mo. Makura gazadara omu no ga ruganesa nawa yipo vapurakeni va gwanene mo uwa. Horowora yitwa yivali ndi yitatu momauzera o yi ruganese ngomagano gomulyo mosiuyungwa soge. Mokulifana, horowora mo matjangwa aga ono hara kukaresa nokukazogera.

Mapukururo gokusika kupi no zogera? Gaaga tupu no vhura kugava nawa. Wa ha ncenuna nondongeseso donongwa yipo o ture mo magano gomanzi. Nsene mapukururo gamwe kapi gana lizi nositambo sosiuyungwa soge, demenena komaruha aga ngaga ku vatera o sikise mo sitambo oso. Momauzera gosiuyungwa soge, ruganesa mapukururo aga naga ronga nokuretera uwa vapurakeni woge. Sitambo sombuuyungiso ezi kapisi sokugava mapukururo gomanzi mosiuyungwa soge, nye mokuruganesa mauzera aga vana ku pe ngetateko lyosiuyungwa soge.

Siuyungwa soge kapisi si kare tupu ekwatakano lyomauzera vana ku pe. Sitambo soge si kare sokufaturura magano gongandi pokugatamununa, nokugava yifanekeso ntani nampo noyihonena omu nava ga ruganesa. Magano gokugwederera ko wa hepa kugaruganesa mokutunga magano gomulyo gokutunda momauzera gosiuyungwa mevango lyokupinganesera mo gapeke.

Vanavazinyetugara ava va kara nediwo lyokuronga poyiruwo yimwe kuvhura kuvazigida mokugava mapukururo mEpongo lyoYirugana. Awo va kwata egano mulyo gokuruganesa nawa mauzera gosiuyungwa mevango lyokupinganesera mo gapeke. Mokulifana, vanavazinyetugara ava ava gava yiuyungwa yanavenye kuvapa makamo goyiuyungwa aga nava kwama. Nampili ngomu makamo kupulisira kugwederera ko magano gamwe, ago kulikida nawa-nawa magano gomulyo aga va hepa kutunga, magano gokukwatesa ko aga nava hepa kuruganesa ntani matjangwa aga gana kugava etateko lyosiuyungwa. Kulironga omu no ronga pokuruganesa mauzera aga vana ku pe kuna kara ruha romulyo rweliwapaikiro koyitumbukira yoyiuyungwa yapeke.

Edeuro eli kuvhura hena li ku vatere mokurugana malirongo gomawa goBibeli. Ngo lironga kudemenena komapukururo aga muna kulironga mevango lyokurundurukira kosirongwa pokutumbura yuma yapeke yoyiwa nye yina dili kukara hepero mokukwata egano sirongwa oso. Yimo hena, nsene o kwata egano sitambo sombuuyungiso ezi, kapi ngo korera tupu komapukururo aga vana ku pe gelike nokudira kugava mafatururo gokugwederera ko aga ana hepa murongwa.