Twikira mokutura po ezokomeho

APA wa tamekere kuruganesa nompango doBibeli, ove kwa tamekere kanunu-kanunu kutura po marunduruko momagazaro nomombuuyungiso nomononkedi doge. Sinzi sago kwa ga tulire po komeho o litjangese moSikora zoUkareli. Ano ngesi nampo ono tura po ezokomeho mokuligava kwaJehova. Eyi kuna kutanta nye asi to hageke kutura po ezokomeho ndi? Hawe. Ekuho lyoge kuna kara etameko tupu.

Murongwa Timoteusa kwa kere mukuronambunga apa ga mu tanterere Paurusa ‘a liyomberese’ momapukururo nomoyitumbukira eyi va mu pere, ‘nokukara mwayo’ yipo ‘kukura kwendi va ku mone navenye.’ (1 Tim. 4:12-15) Yi kare asi ntaantani tupu ko tamekere kukwama nzira zousili ndi wa kara noudivi meparu lyoSikriste, ove ngano o kare neharo lyokutura po ezokomeho.

Ediwo nerunduruko

MoVaefeso 3:14-19, tatu resa asi mupositoli Paurusa kwa kanderere ngano asi vapuli vakwawo va “gwane nonkondo dokudiva unene nounaure nomusika nosinko” sousili. Morwa eyi, Jesus yipo ga geve mauhwi morupe rovantu va ronge nokuvyukisa nokutunga mbungakriste. Kuteda ko nkenye apa koNonkango daKarunga kumwe nevyukiso lyovarongi ava va kara noudivi wokuronga nawa, kuvhura yi tu vatere “tu kure” pampepo.—Efe. 4:11-15.

Ekuro olyo kwa kwatera mo ‘kusitununa mutjima nompepo zoge zi kare zompe.’ Eyi kwa kwatera mo kutunga po magazaro gokupama gokuliza naga gaKarunga naKristusa. Ayo kwa hepa nkenye apa kutarurura magazaro gawo, yipo tu ture ko ‘muntu gomupe.’ (Efe. 4:23, 24) Apa o resa Mavangeli, ove kutara matjango aga gokuhamena eparu lyaKristusa ngosihonena esi no vhura kukwama ndi? Ove kuhetekera ko kudimburura yikara eyi ga likidire Jesus nokukondja kuyihonena meparu lyoge ndi?—1 Pet. 2:21.

Eyi o tura mononzogera doge kuvhura kukara silikidiso asi ezokomeho lyokusika kupi ono tura po. Owo va tura ko muntu gomupe kapi ava lihameke mombuuyungiso zoyimpempa ndi zonyanya ndi zokunyata ndi zondona. Mevango lyoyo, mbuuyungiso zawo kukara ‘zongwa, ezi za fira kupurakena.’ (Efe. 4:25, 26, 29, 31; 5:3, 4; Juda 16) Eyi ava uyunga novakwawo ntani nokomapongo gomombungakriste kuhorora asi usili kuna kurundurura maparu gawo.

Nsene kapi hena ‘gana kukuyeragura mankumpi, ndi mpepo zomarongo govantu woyimpempa,’ eyi nayo kuna kara umbangi wekuro lyopampepo. (Efe. 4:14) Pasihonena, ngapi omu o tara magano gomape ndi marupe goyilihafeso au ku retere uzuni? Nove kukuzeda mokugusa siruwo koyitumbukira yopampepo nokusiruganesa koyininke yangoso ndi? Kurugana ngoso kuvhura kudonganesa ezokomeho lyoge lyopampepo. Ee, omu tupu ya wapa mokulirandera siruwo sokukondjera yininke yopampepo!—Efe. 5:15, 16.

Monkedi omu o ruganene kumwe novantu vapeke kuvhura hena kukara silikido sekuro lyopampepo. Wa lironga ‘kufira nkenda, nokudongwenena po’ vanavanyoko ndi?—Efe. 4:32.

Ekuro lyoge mokurugana yininke monkedi ezi a tambura Jehova lya hepa kulilikida nakunye kombungakriste nekembo. Lya hepa hena kumoneka kosure nokoyirugana yoge ntani nokomavango ganavenye. (Efe. 5:21–6:9) Nsene ove kuna kulikida nkenye apa yikara yoSikriste momaukaro nagenye aga, ekuro lyoge ngesi kuna kulilikida lyene.

Ruganesa uhwi woge

Jehova kwa pa nkenye gumwe gwetu evhuliko noudivi. Age kuna kundindira kwetu mokuyiruganesa mokuvatera vapeke monkedi ezi asi kupitira mwetu a vhure kuvalikida ufenkenda wendi. Kuhamena uhwi ou mupositoli Peturusa kwa tjenge asi: “One kwa gwana nkenye ogu uhwi wendi wompepo. Omu yi ruganese mokulikwafa-kwafa ngovagendesi wovawa wonkenda zaKarunga.” (1 Pet. 4:10) Ngapi omu ono kuruganesa ugendesi woge?

Peturusa ta twikire ko asi: “Ogu ana kuuyunga, a uyunge panonkango daKarunga.” (1 Pet. 4:11) Velise ezi kunkondopeka situmbukira sokuuyunga kuliza noNonkango daKarunga, yipo Karunga va mu yererepekere po. Monkedi omu atu uyunga ya hepa hena kuyererepekesa ko Jehova. Edeuro eli ava gava moSikora zoUkareli kuvhura kukuvatera mokuruganesa uhwi woge monkedi zangoso, pokuyererepeka Karunga monkedi ezi o vatere wopeke. Nositambo sangoso, ngapi omu no dimburura ezokomeho lyoge mosikora?

Mevango lyokugazara asi maruha gokusika kupi ono rugana poforoma zomapukururo gombuuyungiso ndi rupe royiuyungwa eyi vana ku pe, koneka erunduruko lyombuuyungiso eli lya wiza po kupitira medeuro eli. Sikora kutuwapaika yi tu tompoke moyirugana yokuzuvhisa. Yipo nye lipura nyamoge asi: ‘Ame sili kuliwapaikira eyi nani ka uyunga moyirugana yokuzuvhisa ndi? Ame na lironga kulikida elituromo movantu ava ani udisire ndi? Ame kutura po etateko lyomatengwiropo pokusigira vantu epuro eli ngatu ya zogera sikando sokukwama ko ndi? Nsene ame kuna kulironga Bibeli nagumwe, ame kuna kukondja mokukara murongi ogu a gumu nomutjima dovantu ndi?’

Wa ha tara ezokomeho olyo morupe royitumbukira eyi ava ku pe. Ezokomeho lyoge kapi ali monekere mosiuyungwa, nye mweyi o rugana nosiuyungwa oso. Nsene kuna ku pe siuyungwa omu muna hamene kuronga, lipura nyamoge asi: ‘Ame sili kuna ruganesa udivi wokuronga nawa ndi? Ame kuna gava siuyungwa monkedi omu sina vhuru kutura po marunduruko momaparu govapurakeni ndi?’

Ekorangedo eli lyokuruganesa nawa uhwi woge kuna tamba kurugana ko yuma. Nove kupura vapeke mokurugana kumwe nawo moyirugana yokuzuvhisa ndi? Nove kupapara nompito mokuvatera ava va kara mombungakriste zeni, va kare asi vape ndi vanona ndi ava va kara noudigu woukanguki ndi? Nove kulizambera mokukazeresa koSinyanga soUhompa ndi mokuvatera mononkedi dapeke koyigongi ndi? Kuvhura o kare muzuvhisi gokuvatera poyiruwo noyiruwo ndi? Kuvhura o kare muzuvhisi gokukarerera ndi o vatere mombungakriste omu muna kara hepero zonene ndi? Nsene o munazinyetugara, ove kuna kukondja mokusikisa mo yihepwa yoPatjangwa youkwafimbunga ndi youkuronambunga ndi? Eharo lyoge lyokuhara kuvatera ntani nokutambura yitumbukira kuna kara sidiviso sekuro.—Epis. 110:3.

Sirugana soudivi

Nsene ove kuna kulizuvha asi kapi wa kara noudivi wounzi meparu lyoSikriste, lididimika. Nonkango daKarunga kuvhura kugava “nondunge kovantu vangoso-ngoso.” (Epis. 19:7; 119:130; Yis. 1:1-4) Kuruganesa mapukururo goBibeli kutuninkisa tu gwanene ko uwa kounongo waJehova wokusikilira mo, ou wa kara nomulyo kupitakana nkenye elirongo eli atu gwana moudivi mwelike. Ngomu tuna kutura po ezokomeho moyirugana yaJehova, ose kugwana udivi womulyo po. Ngapi omu natu vhura kuuruganesa nawa?

Morwa kuligwanekera nomaukaro gokulisiga-siga meparu, muntu kuvhura a tante asi: ‘Nare na ligwanekera noukaro wangesi. Nina diva eyi nani vhura kurugana.’ Ou ngesi kuna kara unongo wouwa ndi? Yisewe 3:7 kwa rondora asi: “Nokanunu si o ligazare asi ove o munongo nye unene.” Udivi kutamununa mutaro gwetu goyininke eyi natu vhura kutarurura nsene kuna kuligwanekera nomaukaro meparu. Nye nsene ose kuna kutura po ezokomeho lyopampepo, udivi wetu wa hepa hena kutumangenda nondunge nonomutjima detu di kwate egano asi twa hepa matungiko gaJehova mokuninka asi yi tu tompoke. Yipo nye, kapi atu likida ezokomeho lyetu pokukohonona po maukaro mokulihuguvara nyamwetu, nye pokuhuguvara mwaJehova mokutupitisira momaparu getu. Awo kuulikida pokuhuguvara asi kwato eyi nayi vhura kuhoroka nsene kapi ana yi pulisire ntani pokutunga po ehuguvaro nelikwatakano lyeharo kumwe naGuhyetu gemeguru.

Twikira kukondjera yokomeho

Nampili ngomu ga kere mupositoli Paurusa Mukriste gomugwavekwa ogu ga kura pampepo, ga yi dimbwilire asi age ga hepere kutwikira “kukondjera yokomeho” mokukagwana mwenyo gwanarunye. (Fil. 3:13-16) Nove wa kara nomutaro gwangoso ndi?

Ezokomeho lyokusika kupi wa tura po? Konakona ekuro lyoge kuliza nomu o tura ko muntu gomupe nomu o kwatesa ko upangeli waJehova ntani nomu ono kuruganesa mauhwi goge mokufumadekesa ko Jehova. Ngomu ono kugwanena mo uwa melirongo lyoSikora zoUkareli, yikara eyi va likida moNonkango daKarunga ya hepa kutwikira kumoneka monkedi zoge zokuuyunga nokuronga. Twikira kudemenena kekuro lyomaruha aga. Yimo, ga hafera, ano ekuro lyoge ngali moneka.