Vadinkantu, kukura kweni va ku mone
“O liyomberese moyininke eyi nayinye, ove o kare mwayo, kukura koge va ku mone navenye.”—1 TIM. 4:15.
1. Yisinke ana harere Karunga vadinkantu?
HOMPA goVaisraeli gonondunge Saromo kwa tjenge asi: “Vadinkantu, lipandeni moudinkantu weni. Hafeni siruwo esi muna kara simpe vadinkantu.” (Muud. 11:9) Muretesipo gombudi ezi, Jehova Karunga, kapi tupu a na mu harere one vadinkantu mu hafe monomvhura doudinkantu nye nampili apa ngomu kara vakondi. Nampili ngoso, monomvhura doudinkantu muntu narunye kutura mapuko aga ngaga kundama meho zendi. Nampili Joba gomulimburukwi kwa liverere morwa ‘eyi ga rugene mounona wendi.’ (Joba 13:26) Monomvhura doudinkantu, mudinkantu goMukriste narunye kutura po matokoro gomanene. Pokutura po matokoro gepuko kuvhura kureta kukora kopomalizuvho ntani nomaudigu aga ngaga kundama eparu lyendi nalinye.—Muud. 11:10.
2. Ngapi omu Bibeli azi vatere vadinkantu mokunyokera kutura po mapuko gomanene?
2 Vadinkantu va hepa kukara nonondunge pokutura po matokoro. Tarurura epukururo eli ga geve mupositoli Paurusa koVakolinte. Age kwa tjenge asi: ‘Mwa ha kara sinona monondunge; . . . nye kareni sikurona.’ (1 Kol. 14:20) Pokutambura epukururo lyokugwana evhuliko lyokuvhura kugazara nokuteda ngwendi muntu gomukurona ngayi vatera mudinkantu mokunyokera kutura po mapuko gomanene.
3. Yisinke no vhura kurugana mokukura panandunge?
3 Nsene ove o mudinkantu, diworoka asi kukura panandunge pwa hepa elituromo. Paurusa kwa tanterere Timoteusa asi: ‘Walye ava ku dini morwaunona woge. Nye kara sihonena sovapuli mononkango doge nomoyikara nemeharo nemepuro nomoukuhuki woge. . . . Kovekeda ngorooro kuresa matjangwa nkenye apa, oku to korangeda nokuronga. . . . O liyomberese moyininke eyi nayinye, ove o kare mwayo, kukura koge va ku mone navenye.’ (1 Tim. 4:12-15) Vadinkantu woVakriste va hepa kutura po ezokomeho ntani nokuninka ekuro lyawo limoneke kovantu.
Yisinke kukura?
4. Yisinke ya hamena mo mokukura pampempo?
4 Kukura kutanta asi “kutura po ezokomeho ndi kutura po marunduruko gomawa.” Paurusa kwa korangedere Timoteusa mokukovekeda ngorooro yipo a ture po ezokomeho mononkango nomoyikara nemeharo nemepuro nomoukuhuki, ntani nomononkedi omu ga sikisire mo sirugana sendi sokuzuvhisa. Age ga hepere kukondja mokuninka nkareso zendi zi kare sihonena sosiwa. Yipo nye, Timoteusa ga hepere kukovekeda mokukura pampepo.
5, 6. (a) Siruwoke lya tamekere kumoneka ekuro lyaTimoteusa? (b) Kombinga zekuro, ngapi omu vadinkantu vanaina nava vhura kutemwinina Timoteusa?
5 Apa Paurusa ga tjenge epukururo eli pokatji komvhura 61 ntani 64 S.N., age Timoteusa nare kuna kara mukuronambunga ga kura pampepo. Kouhura womvhura 49 ndi ketamekero lyo-50 S.N., apa Timoteusa nampo ga kere mugara gonomvhura ngwendi 20, “womoLisitira nomoIkoniya ngava mu tangauka,” ava va mwene ekuro lyendi lyopampepo. (Yirug. 16:1-5) Posiruwo oso, Paurusa kwa pitwire Timoteusa morugendo rwendi routumwa. Konyima zokunomena ezokomeho lyendi makwedi gongandi, Paurusa kwa tumine Timoteusa koTesaronika yipo a ka korangede nokukapameka Vakriste womositata sina. (Resa 1 Vatesaronika 3:1-3, 6.) Yosili, kukura kwaTimoteusa kwa tamekere kumoneka kwanavenye apa ga kere mudinkantu.
6 One vadinkantu, ruganeni unene mokutunga po yikara yopampepo ngesi, yipo kukura kweni meparu lyoSikriste nemevhuliko lyeni lyokuronga usili woBibeli va ku mone. Kutundilira ponomvhura 12, Jesus kwa ‘kulire moukonentu.’ (Ruk. 2:52) Tu zeni tu konakone omu no vhura kuninka ekuro lyoge limoneke momaruha gatatu geparu: (1) nsene to ligwanekere nomaudigu (2) nsene to liwapaikire nonkwara (3) nsene to kondjere mokukara “mukereli gomuwa.”—1 Tim. 4:6.
Kugendesa maudigu “nonondunge”
7. Ngapi omu maudigu aga vhuru kukundama vadinkantu?
7 Mukriste gonomvhura 17 gedina Carol kwa tente asi: “Poyiruwo yimwe, ame kwa lizuvhire eroroko lyopamalizuvho lyopanyama neli lyopanandunge dogoro ta yi ninkisa nge ni dire kuhara kupinduka ngurangura.”a Morwasinke ga zuvhilire eroroko? Apa ga kere Carol nonomvhura murongo, vakurona vendi kwa lizumbire, makura ga hepere kukatunga nozina, ava va nyokere nompango doBibeli dokukuhuka. Ngwendi Carol, kuvhura o ligwanekere nomaudigu gomanene aga ono kumona ngwendi kapi ngapa kara po marunduruko.
8. Maukaro musinke gomadigu ga kondjere nago Timoteusa?
8 Ngomu ga tulire po ezokomeho lyopampepo, Timoteusa nage kwa kondjere nomaukaro gomadigu. Pasihonena, age kwa kere noudigu morwa ezimo lyendi ‘eli ngali kora-kora.’ (1 Tim. 5:23) Apa ga mu tumine Paurusa koKolinte mokukakohonona po maudigu gongandi aga va retesere po vantu ava va rwanesere situmbukira somupositoli Paurusa, age kwa korangedere mbungakriste mokuruganena kumwe, yipo Timoteusa a dire kukara “nowoma” mokatji kawo. (1 Kol. 4:17; 16:10, 11, hetakanesa BR.) Ayo kumoneka ngwendi asi Timoteusa kwa kere nonomuga.
9. Yisinke kukara nonondunge, ntani ngapi omu ya lisiga nompepo zowoma?
9 Mokuvatera Timoteusa, moruhura Paurusa kwa mu diworokesere asi: ‘Karunga kapi ga tu pa mpepo zowoma, nani nye kwa tu pa mpepo zononkondo nezi zeharo nezi zonondunge.’ (2 Tim. 1:7, hetakanesa NW.) Kukara ‘nonondunge’ kwa hamena mo kugazara nokuteda nawa. Ayo kwa kwatera mo evhuliko mokulididimikira nkenye ukaro ou no ligwanekera nawo. Vadinkantu vamwe ava va dira kukura pampepo kumonekesa mpepo zowoma nezi zougova mokuhetekera ko kuhenduka maudigu pokurara ndi pokutarera tivi unene nokuruganesa yikwepangwe noyikorwesa momudona nokuza nkenye apa konopati ndi kulihameka moyirugana yoruhonda. Vakriste kwa va korangeda ‘mokuzumba udinikarunga nomadowo gopauzuni ou, awo hena va kare vanandunge, va hungame, awo va kerere Karunga mouzuni ou.’—Tit. 2:12, hetekanesa NW.
10, 11. Ngapi omu kukara nonondunge ayi tu vatere tu pame pampepo?
10 Bibeli kukorangeda “vagaramati va kare nonondunge.” (Tit. 2:6, NW) Pokutambura epukururo eli twa hepa kukanderera nokuhuguvara mononkondo edi a gava Karunga apa atu ligwanekere nomaudigu. (Resa 1 Peturusa 4:7.) Makura ngatu tunga po ehuguvaro lyokomutjima ‘mononkondo edi a tu pe Karunga.’—1 Pet. 4:11.
11 Kukara nonondunge ntani nekanderero yiyo ya vaterere Carol. Age kwa tente asi: “Mokunyokera po mparukiso zokunyata zonane kwa kere sininke simwe sosidigu esi na hepere kurugana. Nye ekanderero kwa vaterere nge unene. Ame na diva asi Jehova name ana kara, yipo nye kapi nina kara hena nowoma.” Diworoka asi maudigu kuvhura kukuninkisa o kare muntu gomuwa ntani nokukunkondopeka. (Epis. 105:17-19; Mal.Gajer. 3:27) Nampili o ligwanekere nomaudigu, Karunga kapi nga ku zumba. Age nga “ku kwafa.”—Jes. 41:10.
Kuliwapaikira nonkwara dokuwapera
12. Morwasinke Mukriste ogu ana hara kukwara na ruganesera mpango ezi za kara moYisewe 20:25?
12 Vadinkantu vamwe kwa genderera mononkwara, awo kugazara asi kuvhura kugusa po eguwo nomukuma nomaudigu gekembo. Nampili ngoso, matumbwidiro gomononkwara mulyo unene. Vamwe mosiruwo sanare kwa gendererere kutura po etumbwidiro awo va hana kukonakona nawa eyi ya hamenene mo. (Resa Yisewe 20:25.) Poyiruwo yimwe, vadinkantu kapi ava gazadara ko nawa eyi ya hepa po mokuninka nonkwara di wapere. Konyima, awo kuyayinongonona asi yinzi ya hamena mo kupitakana omu va yi gazarere.
13. Mapuro musinke nava konakona ava vana kugazadara kulivandekera, ntani nombudi musinke domulyo nadi va vatera?
13 Komeho zokutura po elivandekero, lipura nyamoge asi: ‘Morwasinke nina harere kukwara? Yisinke nina kundindira mo mononkwara? Ogu yige mulikwali gouhunga kwange ndi? Ame sili nina liwapaikire mokukasikisa mo situmbukira sange ngomulikwali ndi?’ Mokukuvatera o likonakone nawa, “mukareli gokulimburukwa gonondunge” kwa nduruka nombudi dokuhamena yuma eyi.b (Mat. 24:45-47) Tara nombudi odo ngomapukururo aga ana kukupa Jehova. Teda ko nawa kweyi vana tumbura mo nokuyitura pasirugana. Kapisi o li sigilire nyamoge mokukara ‘egova ngwendi nkambe ndi nsino.’ (Epis. 32:8, 9) Kara sikurona monondunge o dive eyi ya hepa mo mononkwara. Nsene kuna kulizuvha asi ono liwapaikire mokuvandekera, narunye diworoka mokukara ‘sihonena moukuhuki.’—1 Tim. 4:12.
14. Ngapi omu kukura pampepo na kukuvatera nsene ono kwara?
14 Kukura pampepo nayo kureta etompoko konyima zokukwara. Mukriste ogu ga kura kukondjera a “sike mo moukurona wene-wene, ou au tundu kwaKristusa.” (Efe. 4:11-14) Age kurugana unene mokutunga po yikara ngwendi yaKristusa. Ngosihonena setu, ‘Kristusa kapi ga lipakerere mwene mbili.’ (Rom. 15:3) Nsene nkenye mulikwali a kondjera uwa wamukwawo, awo ngava lizuvha mbili negameno mononkwara dawo. (1 Kol. 10:24) Mugara nga likida eharo lyokulizambera, ano mukadi nga tokomena mokukara noulimburukwi kwayendi ngamoomu Jesus a limburukwa komupangeli gwendi.—1 Kol. 11:3; Efe. 5:25.
‘Sikisa mo sirugana soge’
15, 16. Ngapi omu no ninka ekuro lyoge lyopampepo limoneke moyirugana yokuzuvhisa?
15 Mokulikida mulyo gosirugana saTimoteusa, Paurusa kwa tjenge asi: “Tani ku ganesa kosipara saKarunga nesi saJesus Kristusa, . . . O udise nonkango, o kovekede.” Age ta gwederere ko asi: “To rugana sirugana somuudisi goMbudi zoNgwa, to sikisa mo sirugana soge.” (2 Tim. 4:1, 2, 5) Mokusikisa mo sirugana esi, Timoteusa ga hepere ‘kulirera nononkango depuro.’—Resa 1 Timoteusa 4:6.
16 Ngapi omu no vhura ‘kulirera nononkango depuro’? Paurusa kwa tjenge asi: ‘Kovekeda ngorooro kuresa matjangwa nkenye apa, oku to korangeda nokuronga. O liyomberese moyininke eyi nayinye, ove o kare mwayo.’ (1 Tim. 4:13, 15) Ezokomeho kwa hepa po elituromo melirongo lyopwanyamoge. Nkango “o kare mwayo” kugava egano lyokulitura mo unene mosirugana. Ngapi omu lya kara elikwamo lyelirongo lyoge? Ove kukonakona yininke ‘yaKarunga yokonhiinhi’ ndi? (1 Kol. 2:10) Ndi ove kulitura mo tupu kanunu? Kuteda ko kweyi ono kulironga ngayi kutumangeda.—Resa Yisewe 2:1-5.
17, 18. (a) Evhuliko musinke wa hepa kukondjera kutunga po? (b) Ngapi omu kutunga po yikara yokufana ngwendi yeeyi ga kere nayo Timoteusa ngayi ku vatera moyirugana yokuzuvhisa?
17 Mupioniri gomudinkantu gedina Michelle kwa tente asi: “Elikwamo lyewa lyelirongo lyanyamwange ntani nokukara nkenye apa momapongo ya ninkisa nge ni wapere moyirugana yokuzuvhisa. Ngoyitundwamo, ame kuna kutwikira kukura pampepo.” Kukara mupioniri ngayi kuvatera mokuwapukurura evhuliko lyoge mokuruganesa Bibeli moyirugana yokuzuvhisa ntani nokukuninka o kure pampepo. Kondjera mokukara muresi gomuwa ntani nokugava malimbururo gomulyo komapongo goSikriste. Ngomudinkantu ga kura pampepo, mokulikida ekuro lyoge mousili wa hepa kuliwapaikira yiuyungwa yoyiwa moSikora zoUkareli woUkarunga, nokukwaterera unene konombudi domosiuyungwa.
18 ‘Kurugana sirugana somuudisi gombudi zongwa’ kutanta asi wa hepa kulitura mo unene mosirugana soge nokuvatera vapeke mokugwana eparuro. Eyi kwa hepa kutunga po ‘erongo lyounandunge.’ (2 Tim. 4:2, hetakanesa NW.) Pokurugana kumwe nowo va kara noudivi mosirugana esi sokuzuvhisa, ngo vhura kulirongera ko kondongeseso zawo, ngamoomu Timoteusa ga lirongerere ko mokurugana kumwe naPaurusa. (1 Kol. 4:17) Pokutumbura ava ga vaterere, Paurusa kwa tente asi age kapi tupu ga ligaverere nawo mbudi zongwa nye hena ga va ‘fililire,’ ndi ga ruganesere eparu lyendi mokuvavatera, morwa kwa va here. (1 Tes. 2:8) Mokukwama sihonena saPaurusa moyirugana yokuzuvhisa wa hepa kukara noyikara yokufana ngwendi yeeyi ga kere nayo Timoteusa, ogu sili ga pakerere mbili wopeke ntani nokutwara komeho ‘mbudi zongwa.’ (Resa Vafilipi 2:19-23.) Nove kulikida nkareso ezi zokulizambera moyirugana yokuzuvhisa ndi?
Kukura pampepo kureta ruhafo rosili
19, 20. Morwasinke kukura pampepo aku retere ruhafo?
19 Kukura pampepo kwa hepa elituromo. Nye pokutunga po erongo lyoge lyounandunge, ove ngo kara nositumbukira ‘sokungawopeka wovanzi’ pampepo, ntani awo ngava ‘kufumanekesa.’ (2 Kol. 6:10, hetakanesa NW; 1 Tes. 2:19) Mukareli goyirugana yoUhompa yosiruwo nasinye gedina Fred kwa fatwilire asi: “Kupita pwanare, ame kuna kuruganesa siruwo sange mokuvatera vapeke. Ayo usili asi kugava kwa kara nerago, kwa pitakana kutambura.”
20 Mupioniri gedina Daphne kwa tente kuhamena ruhafo oru ga limonene mokukura pampepo asi: “Ngomu na lirongere yoyinzi kuhamena Jehova, ame na tulire po elikwatakano lyenene kumwe nendi. Nsene o hafesa Jehova paapa wa hulira, ove to lizuvhu ruhafo rosili!” Nampili ngomu vantu narunye ava dili kunongonona ekuro lyopampepo, Jehova kulitara asi mulyo. (Heb. 4:13) Yosili, none vadinkantu woVakriste kuvhura kuretera efumano neyererepeko Guhyetu gemeguru. Twikireni kuhafesa mutjima gwaJehova ngomu sili muna kuninka ekuro lyeni limoneke.—Yis. 27:11.
[Nonkango dokonhi]
a Madina gamwe kwa ga rundumuna.
b “Ogu yige mulikwali gouhunga kwange ndi?” mobuke Questions Young People Ask—Answers That Work, Ruha 2; “Mapukururo gaKarunga mokuhorowora mulikwali,” moRuhungu romazuva 15 rwaKudumonkuru 2001; ntani “Ya wapa mokukwara ove simpe mudinkantu ndi?” moAwake! zomazuva 22 zaSitarara 1983.
Yisinke ono lirongere ko?
• Yisinke ya hamena mo mokukura pampepo?
• Ngapi omu no vhura ku ninka ekuro lyoge limoneke . . .
nsene to ligwanekere nomaudigu?
nsene to liwapaikire nonkwara?
moyirugana yokuzuvhisa?
[Efano pepenuno 18]
Ekanderero kuvhura li ku vatere mokulididimikira maudigu
[Efano pepenuno 20]
Ngapi omu vazuvhisi wovadinkantu nava tunga po nondongeseso donongwa?