Gava siuyungwa monkedi zokuronga vapurakeni

MOKUGAVA siuyungwa soge monkedi zokuronga vapurakeni woge, wa hepa kurugana ko yoyinzi kupitakana tupu kuuyunga kuhamena sirongwa somulyo. Lipura nyamoge asi: Morwasinke vapurakeni ava vana hepere kuzuvha sirongwa esi? Yisinke eyi nani ka uyunga eyi nayi ka ninkisa vapurakeni va ka lizuvhe asi vana gwanene mo uwa monzogera?’

Mosikora, nsene vana ku pe ruha mokulikida omu no gavera umbangi kwagumwe, mwenya embo ta kara mupurakeni goge. Moyihorokwa yimwe, kuvhura o uyunge kombungakriste nazinye.

Eyi va diva vapurakeni woge. Lipura nyamoge,‘Yisinke va diva vapurakeni kuhamena sirongwa esi?’ Oyo ngayi ku vatera mokudiva omu no tunga siuyungwa soge. Nsene kuna kuuyunga mombungakriste omu mwa kara Vakriste wovakurona, wa ha rugurura tupu madi gousili aga sinzi sawo va diva. Tungira pomadi gousili aga. Yimo, nsene asi movapurakeni moveli wovape, wa hepa kutarurura hena yihepwa yawo.

Liwora ndi genderera kuuyunga kuliza neyi va diva vapurakeni woge. Nsene o hamesera mo monzogera zoge mauzera gamwe aga va diva sinzi sawo, ga uyunga kugenderera. Nye liwora nsene kuna kugava magano gana kara asi mape kosinzi sovapurakeni woge yipo va ga kwate nawa egano.

Eyi nayi vhura kuvaronga. Kugava siuyungwa monkedi zokuronga kapi ayi tanta asi nkenye apa o kare neyi yoyipe yokuuyunga. Vauyungi vamwe kugava mausili aga va diva nare vapurakeni monkedi zoureru ezi azi ninkisa vapurakeni wovanzi va kwate nawa-nawa egano usili sikando sokuhova.

Moyirugana yokuzuvhisa, ayo kapi tupu ya gwanena po kutumbura yininke yokombudi mokulikida asi ose kuna kuparuka pomazuva gopouhura. Ruganesa Bibeli mokulikida etanto lyoyihorokwa. Ezi nkedi zongwa zokuronga mwenya embo. Mokulifana, nsene kuna kutumbura mauzera kuhamena noveta edi adi pitisire unsitwe ndi kuhamena yimeno ndi eparu lyoyikorama, sitambo soge sa ha kara sokugava nombudi dokutetukisa dokuhamena unsitwe edi ga dira kuzuvha rumwe mwenya embo. Mevango lyoyo, sitambo soge si kare sokutura kumwe maumbangi gounsitwe nononkango domoBibeli mokulikida asi pwa kara Musiti ogu ga tu hara. Eyi ngayi vatera mwenya embo mokumona yuma monkedi zompe.

Kuzogera sirongwa esi va zuvha vapurakeni yikando yoyinzi kuvhura yi kare udigu. Nye mokukara murongi gomuwa, wa hepa kulironga omu no yi rugana eyi monkedi zongwa. Ngapi omu no yi rugana?

Kurugana epaparo ngayi ku vatera. Mevango tupu lyokutura mosiuyungwa soge mausili aga ono kudiworoka, ruganesa yiruganeso yepaparo eyi va zogera pomapenuno 33 dogoro 38. Tura megano magano vana gava gositambo esi wa hepa kukondjera kusikisa mo. Mepaparo lyoge, kuvhura o ya gwane sihorokwa simwe sanare sa dira kudivikwa unene sina lizi nosirongwa soge. Ndi kuvhura o gwane ntanto zompe mombudi ezi nazi faturura sitwa esi ono hara kukazogera.

Ngomu ono kukonakona sirongwa, lipura mapuro ngwendi gaga: yisinke? morwasinke? siruwoke? kupi? yilye? ntani ngapi? Pasihonena: Morwasinke eyi yina karere usili? Ngapi omu nani vhura kuyilikida? Mapuliro musinke ga divikwa aga aga digopekesere vamwe mokukwata egano ou usili woBibeli? Morwasinke ya karera nomulyo? Ngapi omu eyi nayi vhura kukundama eparu lyomuntu? Yihonena musinke ayi likida uwa wokuruganesa mapukururo aga? Yisinke ou usili woBibeli au horora kuhamena yikara yaJehova? Kuliza nomauzera aga ono kuzogera, kuvhura o lipure asi: Siruwoke eyi ya horokere? Ngapi omu natu ruganesa mapukururo aga mosiruwo setu? Kuvhura hena o tovareke nkedi zoge zokugava siuyungwa pokupura ntani nokulimburura gamwe gomapuro ogo apa no gava siuyungwa.

Siuyungwa soge kuvhura si hepe o ruganese matjangwa aga va diva vapurakeni woge. Yisinke no rugana mokuyirugana eyi monkedi zokuronga? Wa ha ga resa tupu; nye hena ga faturura.

Pokuzogera etjangwa eli va diva nawa, hangura maruha aga gana lizi nosiparatjangwa sosiuyungwa soge ntani nokugafaturura. Pasihonena, tarurura etjangwa lyaMika 6:8. Yisinke “youhunga”? Mpango zalye zeyi youhunga vana kuuyunga? Ngapi omu no fanekesa eyi ayi tanta ‘kurugana youhunga’? Ndi kukara “neharo lyanarunye”? Yisinke elinunupiko? Ngapi omu no fatwilira mapukururo aga mukurona? Yosili, mapukururo aga no ka ruganesa ga hepa kukorera koyuma ngwendi siparatjangwa soge nositambo soge novapurakeni, ntani nounzi wosiruwo esi ono kara naso.

Kufaturura nonkango monkedi zoureru narunye kuvatera. Vantu vamwe, kuvatetura mokulironga etanto ‘lyoUhompa’ ou va tumbura mwaMateusa 6:10. Kudiworokesa etanto kuvhura kuvatera nampili Mukriste ogu ga kara siruwo sosire mousili mokukwata nawa unene egano eyi ali uyunga etjangwa. Eyi ya zere nsene tu resa 2 Peturusa 1:5-8 ntani nokufaturura maruha vana tumbagura monovelise odo: Epuro nouwa nediwo nelipangero nedidimiko netjirokarunga neharo lyosiumbya, ntani eharo lyanavenye. Nsene kuna kuruganesa nonkango edi da kara nentanto lyokulifana mosireswa simwe, efatururo lyoge kuvhura li vatere mokuhangura nkango zimwe konkwawo. Oyo usili kuhamena nonkango dimwe ngwendi unongo nediwo nonondunge ntani ekwato egano, edi va ruganesa moYisewe 2:1-6.

Kuvhura o ronge vapurakeni woge pokufaturura tupu etjangwa. Vantu wovanzi kuvatetura pokulironga asi uzuni ou ngau zonauka po va tumbura mwa-1 Johanesa 2:17 kwa tamba ezonaguro lyovadinikarunga; unene po apa hena ava resa Episarome 104:5 ezi za uyunga asi ‘uzuni awo kapi ngava u rundurura.’

Poyiruwo yimwe ya wapa mokutumbura mauzera kuhamena etjangwa nomaukaro aga ga horokere apa va li tjenge ntani muuyungi ndi vapurakeni. Vafalisayi kwa divire nawa Episarome 110. Nampili ngoso, Jesus kwa va likidire mauzera gomulyo aga ga kara movelise zokuhova. Age kwa va pulire asi: “‘Ngapi omu omu gazara one Kristusa, asi munwalye?’ Vena tava mu limburura asi: ‘MunwaNdafita sa.’ Age ta va pura asi: ‘Ndafita ngapi nye za mu tumbwisisire Mpepo zaKarunga asi “Hompa”? Yeeyi Ndafita ga tente asi: “Hompa kwa tanterere Hompa gwange asi: Hingira korulyo rwange dogoro noku ngani ninka nonkore doge, di kare ulyatero wonompadi doge.” ‘Ano nye nsenesi Ndafita kumutumbura asi “Hompa”, ngapi nye omu na kara-kara Mesiyasa hena munwendi?’” (Mat. 22:41-45) Nsene o teda koMatjangwa ngamoomu ga yi rugene Jesus, ngo vatera vantu mokuresa Nonkango daKarunga nelituromo lyenene.

Nsene muuyungi a tumbura siruwo esi va tjenge buke zomoBibeli ndi siruwo apa sihorokwa songandi sa horokere, ga hepa hena kufaturura maukaro aga ga horokere posiruwo oso. Monkedi zangoso, vapurakeni ngava kwata nawa egano mulyo gobuke ndi gosihorokwa.

Kuruganesa ehetakaneso kuvhura kuvatera mokuronga. Kuvhura o hetakanese mutaro govantu wovanzi neyi azi uyunga ko Bibeli kositwa sokulifana. Ndi kuvhura o hetakanese yihorokwa yivali yomoBibeli yokulifana. Pwa kara malisigo ndi? Morwasinke? Yisinke natu lirongera ko kwago? Kurugana ngesi kuvhura kuninkisa vapurakeni woge va kare nomutaro gomupe kosirongwa oso.

Nsene kuna ku pe o ka zogere maruha gamwe gosirugana sokuzuvhisa soVakriste, kuvhura o tovareke nzogera zoge pokuvareka nekamo. Zogera eyi va hepa kurugana, neyi va hepera kuyirugana ntani nomu ya likwatakana noyitambo yetu ngoNombangi daJehova. Makura faturura asi kupi nosiruwoke ntani nomu nava yi rugana.

Ngapi nsene asi siuyungwa soge kuna kuzogera yuma ‘yomagazaro gaKarunga aga ga horama konhiinhi’? (1 Kol. 2:10) Nsene o tameka kutumbagura ntani nokufaturura yitwa yomulyo yosirongwa, mauzera ngava ga kwata noureru egano. Ntani nsene o hulisa pokukama mapukururo goge momusupi, vapurakeni woge ngava lizuvha asi vana lirongo yuma yomulyo.

Mapukururo kuhamena eparu lyoSikriste. Vapurakeni woge ngava gwanena mo uwa unene po nsene o va vatera mokudimburura omu nombudi dina kara mosiuyungwa soge dina kundama maparu gawo. Ngomu ono kukonakona matjangwa mosiuyungwa soge, lipura nyamoge asi, ‘Morwasinke nombudi edi va di pungwira moMatjangwa dogoro mosiruwo setu?’ (Rom. 15:4; 1Cor. 10:11) Gazadara ko kuhamena maukaro gemeparu aga vana kuligwanekera nago vapurakeni woge. Tarurura maukaro ogo kuliza nomavyukiso nonompango domoMatjangwa. Mosiuyungwa soge, faturura Matjangwa o likide omu naga vatera muntu a kohonone po nawa maukaro gangoso. Vyukilira kutumbura nkareso noyirugana, wa ha fofera magano.

Pokutameka, ruganesa egano limwe ndi gavali aga vana tumbura mosiuyungwa esi ono kuliwapaikira. Ngomu ono kukara noudivi, ruganesa gomanzi. Ngomu sina kuza siruwo vapurakeni ngava ndindira unene yiuyungwa yoge, nokukara nehuguvaro asi tava ka zuvha yuma eyi nayi va retera uwa.