Kukorangeda eruganeso lyoBibeli

SITAMBO setu kuna kara sokuvyukisa vantu navenye koNonkango daKarunga, Bibeli. Buke ezi zokupongoka yizo ntundiliro zombudi ezi atu zuvhisa, ntani tuna hara vantu va dimburure asi eyi atu uyunga kapisi yanyamwetu, nye yokutundilira kwaKarunga. Vantu va hepa kuhuguvara moBibeli.

Moyirugana yokuzuvhisa. Nsene kuna kuliwapaikira moyirugana yokuzuvhisa, horowora nkenye apa etjangwa limwe ndi gongandi aga no ka ligavera novantu ava vana hara kupurakena. Nampili kuna kugavera yimbapiratjangwa, ayo ya wapa kuresa ko etjangwa limwe lyoBibeli lyokuwapera. Bibeli za kara nononkondo dokurundurura vantu wonomutjima donongwa kupitakana nkenye eyi natu vhura kuuyunga nyamwetu. Nsene kapi yina ku vhulika kuresa moBibeli, kuvhura o temwinine etjangwa lyongandi. Mouye wokuhova, kapisi navenye va kere nomatjangururo gonobukegango doMatjangwa. Nampili ngoso, Jesus novapositoli vendi ngava temwinine nkenye apa kutundilira moMatjangwa. Nose twa hepa kulitulira po sitambo sokukwata matjangwa momutwe ntani nokugaruganesa nawa moyirugana yokuzuvhisa, ano poyiruwo yimwe kuvhura kugatemwinina.

Nsene yina ku vhulika mokuresa moBibeli, zi kwaterera nawa yipo mwenya embo a vhure kukwama ngomu ono kuresa. Nsene mwenya embo kuna kukwama moBibeli zamwene, eyi ana kuresa kuvhura yi mu kundame unene.

Nampili ngoso, wa hepa kukoneka asi vatoroki vamwe woBibeli kapi va likida efumadeko koNonkango daKarunga. Etoroko lyawo pamwe kapi lya liza kumwe neyi ya kara momaraka omu va tjenge Bibeli. Matoroko gamwe gantaantani kwa gusa mo edina lyaKarunga, nokupiyaganeka eyi ga uyunga Matjangwa meraka omu va tjenge Bibeli kuhamena mukaro govafe, ntani nokuhoreka eyi za uyunga ko Bibeli kuhamena sitambo saKarunga kevhu. Mokuninka asi o yi likide muntu, kuvhura o hepe kuhetakanesa matjangwa gomulyo moNobibeli dokulisiga. Kuhamena yirongwa yongandi, buke Reasoning From the Scriptures kuhetakanesa omu matoroko gokulisiga-siga ga ruganesa nonkango domulyo monovelise edi ava ruganesa nkenye apa. Nkenye ogu ga hara usili nga hafera kudiva mausili ogo.

Momapongo gombungakriste. Navenye va hepa kuvakorangeda va ruganese Nobibeli dawo momapongo gomombungakriste. Eyi kureta uwa mononkedi dononzi. Ayo kuvatera vapurakeni va purakene kweyi vana kuzogera mepongo. Ayo kuvatera vapurakeni va mone nokuzuvha mapukururo aga ana kugava muuyungi. Ntani kukundama wovape mombunga va dimburure asi Bibeli sili kuna kara etateko lyepuliro lyetu.

Mokuninka asi vapurakeni woge va kwame moNobibeli davene ngomu ono kuresa Matjangwa, kwa korera mekorangedo eli ono kuvapa. Nkedi zimwe zongwa kuna kara pokuvapura kuvyukilira.

Aso kuna kara situmbukira soge ove muuyungi mokutokora asi matjangwa musinke ono harere vapurakeni woge va rese. Ayo ya wapa kuresa matjangwa aga ngaga ku vatera o tunge magano goge gomulyo. Makura, ngomu sina kuyipulisira siruwo, gwederera ko gamwe aga naga kwatesa ko nzogera zoge.

Ayo kapi tupu ya gwanena po mokutumbura matjangwa, ndi kukorangeda vapurakeni woge va ga rese. Nsene o resa etjangwa limwe nokurundurukira kweli lyapeke awo vapurakeni woge simpe kapi vana gwana lyokuhova, ngayi va gusa mukumo ntani ngava hageka kukwama moNobibeli davene apa ngo resa. Wa hepa kunomena. Nsene sinzi sawo vana gwana etjangwa, li resa.

Konyima zokutumbura etjangwa kuvhura o pwagesa magano gongandi komeho zokukaliresa. Eyi ngayi popera siruwo soge sokundindira dogoro vapurakeni va gwane etjangwa. Nampili ngomu no hepa kuzogera yoyisesu morwa kupa siruwo vapurakeni mokugwana matjangwa, ayo ngayi reta mauwa gomanzi.