Kuuyunga moomu o uyunga

VANTU kulizuvha umanguruki nsene kuna kuzogera novakaume. Nonkango edi ava ruganesa kuwiza pwadene. Vantu vamwe kuuyunga nenyanyuko; ano vamwe kapi ava uyunga ngoso. Nampili ngoso, mbuuyungiso zawo zoumanguruki kukoka elituromo lyovantu.

Nsene kuna kuuyunga nomugeni, ayo kapi ya wapa kuuyunga monkedi zopaundambo unene. Monompo dimwe, pokuzogera kumwe novageni wa hepa kutameka nzogera kuliza nompo ozo. Konyima zokulikida efumadeko, nampo kuvhura o ruganese mbuuyungiso zopaundambo nonondunge.

Nsene kuna kugava siuyungwa kositantara, wa hepa hena kutakamesa. Kuuyunga monkedi zopaundambo unene kudonganesa mfumwa zepongo lyoSikriste ntani nomulyo gweyi ono kuuyunga. Momaraka gamwe, wa hepa kuruganesa nontumbwiso dimwe nsene kuna kuuyunga nomukurona ndi murongi ndi munekuto. (Koneka nontumbwiso edi va ruganesa moYirugana 7:2 ntani 13:16.) Nontumbwiso dapeke kudiruganesa nsene kuna kuuyungisa mulikwali goge ndi kaume koge gomunene. Nampili ngomu asi mbuuyungiso zetu nazi dira kukara zopaundambo unene nsene kuna kugava siuyungwa, nye za hepa kukara zefumadeko.

Nampili ngoso, pwa kara yininke yimwe eyi ayi ninkisa mbuuyungiso zomuntu zi digope. Sininke simwe kuna kara muzaro gononkango ndi gonontanto. Udigu kuhoroka apa muuyungi a hetekere ko kurugurura kutumbura nonkango ngamoomu dina kara mosimbapiratjangwa. Nkedi omu atu tjanga kwa lisiga nomu atu uyunga. Mokuliwapaikira siuyungwa kuvhura o papare magano mweyi va tjanga moyimbapiratjangwa. Ndi nampo magano va ga tjanga mekamo lyosiuyungwa. Nye nsene ngo pwagesa magano monkedi omu va ga tjanga ndi o ga rese kuvyukilira kutundilira mekamo lyosiuyungwa, mbuuyungiso zoge kapi ngazi kara ngwendi moomu o uyunga pokuzogera novakweni. Mokukandana po udigu owo, pwagesa magano goge mononkango danyamoge ntani nyokera po kuruganesa muzaro gonontanto goudigu.

Mbuuyungiso kuvhura zi digope hena nsene o pwizumuka posiruwo sokulifana pokutumbura nonkango, nokudira kugenderera ndi kuliwora kuuyunga. Nye monzogera zankenye apa, kwa hamena mo erunduruko mosinano pokutumbagura nonkango ntani nelisigo mokupwizumuka poyinano yokulisiga-siga.

Nsene kuna kuuyungisa mbunga zonene, uyunga moomu o uyunga kumwe nomuhagaro gokugwanena po nomalizuvho ntani nelituromo yipo va ku purakene.

Mokuninka asi o uyunge nemanguruko moyirugana yokuzuvhisa, wa hepa kuliyomberesa kuuyunga nawa nkenye ezuva. Eyi kapi yina kutanta nye asi wa hepa kugwana erongo lyokuzeruka. Nye ya wapa kutunga po mbuuyungiso ezi ngazi ninkisa wopeke va purakene nefumadeko kweyi ono kuuyunga. Negano olyo, tarurura nsene ono hepa kuwapukurura poyitwa eyi yina kukwama ko mononzogera doge dankenye ezuva.

1. Nyokera po kuruganesa nonkango edi adi zonagura ndunganesoraka ndi edi nadi ku ninkisa o fane ngwendi vantu ava ava paruka eparu eli lya lilimba nonompango doBibeli. Kuliza nepukururo lyomoVakorosi 3:8, nyokera po mbuuyungiso zondona ndi zokunyata. Ruganesa mbuuyungiso ezi ava ruganesa vantu womomukunda zokuliza nondunganesoraka.

2. Nyokera po kurugurura nonkango ndi nontanto dokulifana mokupwagesa nkenye egano ono kara nalyo. Lironga kuruganesa nonkango edi adi pwagesa eyi ono tamba.

3. Nyokera po kurugurura nkenye apa eyi ko uyunga muhowo, tanko diva eyi ono hara kuuyunga; makura tameka nye kuuyunga.

4. Nyokera po kufoferesa magano gomulyo nononkango dononzi. Liyomberesa kutumbura montanto zoureru egano eli ono hara vapurakeni woge va diworoke.

5. Uyunga monkedi ezi nazi likida efumadeko kwava wopeke.