Kuuyunga nemanguruko

KUUYUNGA nemanguruko ngayi ku vatera mokuninkisa vapeke va ku huguvare. Kuvhura o huguvare yininke eyi ana kukutantera muntu ogu ana kuhoreka yikara yendi ndi? Hawe, udigu unene kuyihuguvara. Yipo nye asi uyunga tupu ngwendi moomu o uyunga.

Kuuyunga nemanguruko kapisi tu ku piyaganeke nokudira kukara nosinka mombuuyungiso zoge. Udigu wondunganesoraka nokutumbagura nonkango mepuko ntani kumumika nomurungu kapi ya wapa. Twa hepa hena kunyokera po kuruganesa nonkango dokudira kuwapera. Tuna hara nkenye apa kulikida mfumwa mombuuyungiso nomonkareso zetu. Muntu ogu a uyunga nemanguruko kapi nga uyunga monkedi zokulimonekesa.

Moyirugana yokuzuvhisa. Apa o hwilire membo ndi to gwanekere nomuntu moyirugana yokuzuvhisa nositambo sokugavera umbangi, ove kulizuvha woma ndi? Sinzi setu kulizuvha woma, nye vamwe malizuvho gangoso kutwikira kupitakana wopeke. Sinka kuvhura kuninkisa ezwi li dire kuzuvhika nawa ndi li kankame, ndi kukara noutjirwe kuvhura ku lihorore kwene kupitira momaligumaguro ga hana divilisa komawoko ndi komutwe.

Muzuvhisi kuvhura a ligwanekere noudigu ou morwa nokonda dongandi. Nampo kuna kara nosinka eyi wopeke nava mu gazarera ndi nsene asi na yi mu tompoka. Yimo ya kara ngorooro kulizuvha woma, nye udigu kuhoroka nsene kuna kara nosinka sosinene kuhamena yuma eyi. Yisinke no rugana nsene kuna kulizuvha woma komeho zokuza moyirugana yokuzuvhisa? Liwapaikira nawa nokukanderera kwaJehova. (Yirug. 4:29) Gazadara ko koufenkenda waJehova wounene mokuzigida vantu va ya hafere ukanguki wokusikilira mo nomwenyo gwanarunye moParadisa. Gazadara ko kowo ono kukondjera kuvatera noyihepwa yawo mokuzuvha mbudi zongwa.

Diworoka hena asi vantu kwa kara noumanguruki wokutambura nokunyoka mbudi zetu. Eyi yiyo ya horokere apa Jesus ga zuvhisilire moIsraeli zanare. Situmbukira soge kuna kara tupu sokuzuvhisa. (Mat. 24:14) Nampili vantu va dire kukupulisira o uyunge, nye edinguro lyoge ngali gava umbangi. Ove ngano yina ku tompoka morwa ove kuna pulisire Jehova a ku ruganese mokusikisa mo mpango zendi. Ngapi omu za hepa kukara mbuuyungiso zoge nsene no gwana mpito zokuuyunga? Nsene no demenena magano goge koyihepwa yava wopeke, mbuuyungiso zoge ngazi wapa ntani ngo uyunga nemanguruko.

Nsene kuna kugavera umbangi, nokuuyunga ngamoomu o yi rugana nkenye ezuva, ngayi ninkisa vapurakeni woge va kare noumanguruki wokupurakena. Ngava vhura kutambura magano gomoMatjangwa aga ono hara kuvapa. Mevango lyokugava siuyungwa, zogera kumwe nawo. Kara nonkareso zopasiundambo. Likida elituromo mwawo, ntani purakena komalimbururo gawo. Kwama nompo domomukunda edi adi likida efumadeko kovantu. Liwapaikira kumenya-menya nkenye apa.

Nsene kositantara ono kara. Nsene kuna kuuyunga komeho zombunga, gava siuyungwa nemanguruko nokuuyunga moomu o uyunga. Yimo, nsene mbunga nene, wa hepa kuziguruka. Nsene no heteka kukwata siuyungwa soge momutwe ndi nsene madidiliko goge manzi, ove ngoso kuna kara nosinka sosinene kuhamena nonkango edi no ruganesa, kapi ngo vhura kuuyunga nemanguruko. Magano goge wa hepa kugagazara nawa komeho zosiruwo, nye unene po demenena komagano, kapisi kononkango edi ngo ruganesa.

Ayo ya lifana hena nsene kuna kukupuragera kepongo. Liwapaikira nawa, nye wa ha resa ndi o kwate momutwe malimbururo goge. Uyunga nemanguruko yipo malimbururo goge ga zuvhike monkedi zongwa.

Nsene no pitakanesa kuruganesa mbuuyungiso zongwa, vapurakeni woge kuvhura va gazare asi kapi ono manguruka. Pasihonena, mulyo kutumbura nonkango mouhunga nye kapisi o yi rugane monkedi zokulimonekesa. Maligumaguro gorutu gokusingonona ndi gokunkondopeka kuvhura kutovareka siuyungwa soge, nye eligumaguro lyorutu lyokupitakanena kuvhura kudonganesa eyi ono kuuyunga. Ruganesa ezwi lyokugwanena po nye wa ha ziguruka unene. Ayo ya wapa poyiruwo yimwe kuuyunga nelituromo, nye wa ha uyunga monkedi zelinenepeko. Muhagaro gezwi gokuwapera, nokuuyunga nomalizuvho nayinye ya hepa kuyiruganesa monkedi ezi nazi dira kukuninkisa o liretere nyamoge mfumwa ndi yi ninkise vapurakeni woge va dire kulizuvha nawa.

Sininke somulyo po kuna kara asi wa hepa kuuyunga nawa nkenye ezuva ntani nokukara nonkareso zoSikriste zefumadeko. Makura apa ngo kara kositantara, ove ngo vhura kuuyunga nemanguruko ngamoomu o uyunga.

Nsene kuna kuresa mombunga. Kuuyunga nemanguruko nsene to resere mbunga pwa hepa elituromo. Mokuyisikisa mo, dimburura magano gomulyo gana kara mobuke ndi mosifo esi ono kukaresa, ntani koneka omu vana ga tungu. Yangesi wa hepa kuyitura megano; nsene kapisi ngoso, ngano ngo resa tupu nonkango. Tara omu ava tumbura nonkango edi wa dira kudiva. Liyomberesa kuresa kuziguruka yipo o dive nkedi zouhunga kutumbura nonkango ntani nepongeko lyado yipo di pwagese nawa magano. Ruguruka kuyirugana dogoro o rese nawa. Diva nawa buke ndi sifo esi no ka resa yipo ereso lyoge li zuvhike ngwendi moomu o uyunga. Oko kuna kara nye kuuyunga nemanguruko.

Yosili, sinzi seyi atu resa kutundilira moyimbapiratjangwa yetu yoBibeli. Kugusa ko kuresa moSikora zoUkareli, ose kuresa matjangwa moyirugana yokuzuvhisa ntani nsene kuna kugava yiuyungwa kositantara. Vanavazinyetugara kuvapa va rese yifo eyi atu ruganesa melirongo lyoRuhungu ntani nemElirongo lyoBibeli lyoMbunga. Vanavazinyetugara vamwe wokuwapera kuvapa situmbukira sokukaresa yiuyungwa yereso posigongi. Yi kare asi ove kuna kuresa moBibeli ndi moyimbapiratjangwa yapeke, resa ruha oru runa kara momatemwinino monkedi omu nayi tovara nawa. Nsene kuna temwinine mo vauyungi wongandi, tjindja ezwi lyoge kuliza nankenye muuyungi ono kutemwinina. Koneka: Wa ha resa yi zuvhike ngwendi kuna kudanauka, nye ya hepa kuzuvhika monkedi zenyanyuko ntani zongwa.

Kuresa nemanguruko kutovareka ruha oru ono kuresa. Kapi ayi zuvhika ngwendi kuna kutemwinina muntu gongandi nye kutumangeda.