Kuuyunga kudira kuhaka-haka

APA o resa kuziguruka, ove kukudigopera nonkango dimwe ndi? Ndi apa o zi komeho zovapurakeni mokukagava siuyungwa, kukudigopera kudiworoka nonkango douhunga ndi? Nsene yimo ngoso, nampo ove kuuyunga kuhaka-haka. Muuyungi gomuwa kuresa nokuuyunga monkedi omu na pwagesa nonkango nomagano paureru. Eyi kapi yina kutanta asi age kuuyunga nkenye apa kugenderera, ndi kuuyunga ga hana kugazara. Mbuuyungiso zendi ngwa. Kuuyunga kudira kuhaka-haka kukukonakona unene moSikora zoUkareli.

Yininke yimwe kuvhura kukuninkisa o haka-hake. Tarurura yuma eyi yina kukwama ko. (1) Nsene kuna kuresera wopeke, kudira kudiva nonkango dimwe kuvhura kukuninkisa o haka-hake. (2) Kupwizumuka pomavango gomanzi kuvhura kuninkisa o uyunge kuhaka-haka. (3) Kudira kuliwapaikira kuvhura kugwederera koudigu ou. (4) Pokuuyunga komeho zombunga, kudira kuwapaika siuyungwa mompompa kuvhura kukuninkisa o haka-hake. (5) Kudiva nonkango dononsesu kuvhura kuninkisa muntu a singanyeke ngomu ana kupapatera nonkango douhunga. (6) Kunkondopeka nonkango dononzi, kuvhura kukundama siuyungwa soge momudona. (7) Kudira kudiva nawa ndunganesoraka kuvhura kugwederera koudigu ou.

Nsene o haka-haka, vapurakeni moSinyanga soUhompa kuvhura kuvaninkisa va gazare yapeke. Ngoyitundwamo, eyi no uyunga kuvhura va yi zumbanese.

Nampili ngoso, wa hepa kutakamesa asi mbuuyungiso zoge za ha zuvhika ngwendi kuna kulimonekesa ndi zi fise vapurakeni woge nomuga nye zi kare zongwa ntani zokutumangeda. Morwa ntundiliro zoge, vantu kuvhura va tare mbuuyungiso zoge monkedi zokulinenepeka ndi zokudira kulikida efumadeko, ano eyi ngayi lilimba nositambo soge. Mupositoli Paurusa, nampili ngomu ga kere muuyungi gomuwa, age kwa uyungisire Vakolinte “moupiranonkondo nomoutjirwe nemekankamo lyenene” yipo a dire kuliretera mwene mfumwa za hana hepero.—1 Kol. 2:3.

Eyi no nyokera po. Vantu wovanzi kwa kara nonkareso zokuruganesa nonkango ngwendi asi “ntani aa” ndi “ninke” “hambara” ndi “asi” ndi “tatu mono asi” ndi “kutanta asi” mwankenye eyi vana kuuyunga. Nampo kapi wa dimburura asi rukando rungapi o ruganesa nonkango odo. Kuvhura o heteke kuliyomberesa ano gumwe a ku purakene ntani a ruguruke nonkango odo nkenye apa no di ruganesa. Ayo kuvhura yi ku teture.

Vantu vamwe kutameka kuuyunga ndi kuresa ntanto makura tava hagekere sikatji ntani nokuruguruka eyi vana uyunga nare.

Ano vamwe kutameka negano limwe va hana kulimana nare tava rundurukire kegano nalyopeke. Nampili nonkango di pwage nawa, kurundurura usimbu magano kuvhura kukuninkisa o haka-hake.

Omu no wapukurura. Nsene udigu woge kuna kara asi ove narunye kupapatera nonkango douhunga, wa hepa kulitura mo unene o gwederere ko kediwo lyoge lyononkango. Didilika nonkango edi wa dira kudiva dina kara moyifo yoRuhungu ntani moyimbapiratjangwa yimwe eyi o resa. Lironga matanto nonontumbwiso dado ntani di gwederera kediwo lyoge lyononkango. Nsene kapi wa kara nobuke zononkango, pura gumwe ogu ga diva nawa eraka.

Nsene o resa kuziguruka nkenye apa ngayi ku vatera o ture po marunduruko. Didilika nonkango doudigu, ntani ziguruka kuditumbura yikando yongandi.

Mokuninka asi o rese wa hana kuhaka-haka, ya kara nomulyo kukwata egano omu nonkango adi rugana kumwe montanto. Nonkango dimwe da hepa kudiresa kumwe yipo di pwagese egano eli ana kugava mutjangi. Didilika epongeko eli lyononkango. Sitambo soge kapisi sokuresa tupu nonkango mouhunga nye hena mokupwagesa nawa magano. Konyima zokukonakona ntanto zimwe, rundurukira konkwawo dogoro o mane kutarurura paragarafu nazinye. Koneka nawa omu gana kulikwama magano. Makura liyomberesa kuresa kuziguruka. Ruguruka kuresa paragarafu dogoro o yi rugane wa hana kuhaka-haka ntani wa hana kupwizumuka pomavango gepuko. Makura rundurukira konoparagarafu dokukwama ko.

Yokukwama ko, gwederera ko kuresa kugenderera. Nsene no kwata egano omu nonkango domontanto adi rugana kumwe, ove ngo vhura kumona nonkango dononzi posiruwo ntani nokundindira edi ngano nadi vhura kukwama ko. Eyi ngayi ku vatera unene mokuresa nawa.

Kuresa nkenye apa kuziguruka wa hana kuliwapaikira kuvhura kukara eliyombereso lyewa. Pasihonena, wa hana kuliwapaikira komeho zosiruwo, resa etjangwa lyezuva nomagano gemetjangwa olyo kuziguruka; yi rugana nkenye ezuva. Yikisa meho goge mokutara nonkango edi dina kupwagesa egano lyokuzulilira mevango lyokutara konkango zimwe tupu posikando.

Monzogera, kuuyunga wa hana kuhaka-haka kwa hepa asi o gazare komeho zokuuyunga. Liyomberesa kuyirugana nkenye ezuva. Tokora asi magano musinke ono hara kupwagesa ntani monkedi omu ono hara kugapwagesa; makura tameka kuuyunga. Wa ha genderera kuuyunga. Kondjera mokupwagesa egano lyokuzura wa hana kuhaka-haka ndi o tjindje egano wa hana kulimana. Nayi wapa kuruganesa nontanto dononsupi doureru.

Nonkango kupwaga noureru nsene ono diva eyi ono hara kuuyunga. Kapi ya kara hepero kuhorowora nonkango edi no ka ruganesa. Pokuliyomberesa, ya wapa mokudiva tanko nawa magano goge ntani nokugazadara ko nonkango edi no ruganesa ngomu ono kuuyunga. Nsene ngo yi rugana ngoso ntani nokutura nondunge doge komagano mevango lyokudemenena kononkango edi ono kuuyunga, nonkango ngadi wiza paureru ntani magano goge ngo ga uyunga kutundilira komutjima. Nye nsene tupu no gazara nonkango mevango lyokugazara magano, mbuuyungiso zoge kuvhura zi tameke kuhaka-haka. Nsene o liyomberesa, ngayi ku tompoka mokuuyunga wa hana kuhaka-haka, sikara somulyo mokutunga po yipo o uyunge nokuresa nawa.

Apa Moses ga mu pere Jehova situmbukira mokukamuuyungira po komuhoko goVaisraeli ntani kwaFarawo, hompa goVaegipite, Mosesa kwa lizuvhire asi kapi ta ka yi sikisa mo. Morwasinke? Kapi ga kere muuyungi gomuwa; age kwa kere noudigu wombuuyungiso. (Ex. 4:10; 6:12) Mosesa kwa lipoperere nonokonda dongandi, nye kwato ezi ga tambwire po Karunga. Jehova kwa tumine Arona ngomuuyungilipo, nye hena ga vaterere Mosesa mokuuyunga. Mosesa ya mu tompokere yikando yoyinzi mokuuyungisa vantu notumbunga, ntani hena nomuhoko nagunye. (Deut. 1:1-3; 5:1; 29:2; 31:1, 2, 30; 33:1) Nsene ngo kondja paapa wa hulira nokuhuguvara mwaJehova, nove kuvhura kuruganesa mbuuyungiso zoge mokufumadekesa ko Karunga.