Kulikida elituromo mwava wopeke

NSENE kuna kuligavera usili woBibeli kumwe nava wopeke, twa hepa kurugana ko yoyinzi kupitakana tupu kuyitura monondunge dawo. Twa hepa kuguma mutjima. Nkedi zimwe omu natu yi rugana eyi kuna kara pokulikida elituromo movapurakeni vetu. Elituromo lyangoso kuvhura kulilikida mononkedi dokulisiga-siga.

Gazadara komutaro govapurakeni woge. Mupositoli Paurusa kwa gazadarere ko kuhamena ntundiliro nomagazaro govapurakeni vendi. Age kwa fatwilire asi: “KoVajuda ame ngwendi ni Mujuda-juda, ni kongwe Vajuda. Ano kwava va kara moVeta zoVajuda ngwendi nyame gomoVeta, asi ngani kongwere po ava va kara moVeta. Kwava va pira Veta ngwendi nyame ogu na pira Veta, ni kongwe ava va pira Veta. Eyi kapisi asi Veta zaKarunga za pira nge, hawe, ame kwa kara konhi zoVeta zaKristusa. Kwava va hana nonkondo mepuro name ngosikwawo, asi ni kongwere po ava va pira nonkondo mepuro. Navenye kuliza nawo moyikara yawo nayinye, ni kongwere po nampili vamwe tupu. Nayinye eyi ame kuyiruganena morwa Mbudi zoNgwa, ngani gwane ko name komatungiko gamo.” (1 Kol. 9:20-23) Ngapi omu ‘natu liza nawo moyikara yawo nayinye’ naina?

Nsene ngo konakona wopeke komeho tupu zokuuyunga nawo, kuvhura ngo dimburure yidiviso yoyininke eyi va hara ntani nomaukaro gawo. Kuvhura o dimburure asi yirugana musinke ava rugana ndi? Ove kuna kumona yidimbwiliso youkerelikarunga wawo ndi? Pana kara sidimbwiliso sina kulikida ukaro wemepata olyo ndi? Kuliza neyi ono kumona, kuvhura o rundurure nzogera zoge yipo va zi hafere vapurakeni woge.

Mokuninka nzogera zoge va zi hafere, wa hepa kugazadara ko omu no ka hedera vantu womomukunda gweni. Komavango gamwe, eyi kwa kwatera mo ava va tunda koyirongo nayopeke. Nsene vantu vangoso kwa tunga momukunda gweni, wa gwana nkedi zongwa zokuvaudisira ndi? Mokumona asi aso kuna kara sitambo saKarunga asi “vantu navenye va paruke, awo hena va ka sike kediwo lyousili,” litulira po sitambo mokugavera mbudi zoUhompa monkedi zongwa kwanavenye ava no ligwanekera nawo.—1 Tim. 2:4.

Purakena nawa. Nampili ngomu Jehova ga kara nevhuliko lyokudiva nayinye, age kupurakena kwava wopeke. Muporofete Mika kwa mu pere emoneko omu ga mwene Jehova kuna kukorangeda vaengeli va pwagese magano gawo kuhamena omu nava kohonona po yuma yongandi. Karunga makura ta pulisire muengeli gumwe mokusikisa mo egano eli ga geve muengeli. (1 Vah. 22:19-22) Apa Abirahamu ga pwagesere sinka sendi kuhamena epanguro eli ngava retera Sodoma, Jehova ga mu purakenene. (Gen. 18:23-33) Moyirugana yetu yokuzuvhisa, ngapi omu natu temwinina sihonena saJehova sokupurakena?

Korangeda wopeke mokupwagesa magano gawo. Pura epuro lyokuwapera, ntani pwizumuka karuwogona yipo va limburure. Purakena nawa. Elituromo lyoge ngali va korangeda mokuuyunga noumanguruki. Nsene ekumbururo lyawo kuna kuhorora yuma eyi va hara, va puragera nonondunge. Wa ha va puragera mapuro gomanzi unene kuhamena eparu lyawo, nye kondjera mokuvadiva nawa. Va pandadeka komagano gawo nsene kuvhura kuyirugana. Nampili kapi ono kukwatesa ko mutaro gwawo, nye va pandura mokupwagesa magano gawo.—Koros. 4:6.

Nampili ngoso, twa hepa kutakamesa asi elituromo lyetu movantu kapisi li pitakanene. Kukara nosinka sava wopeke kapi ayi tanta asi twa hepa kudiva mahoramo gemeparu lyawo. (1 Pet. 4:15) Twa hepa kutakamesa asi mukadi ndi mugara ogu tuna kuuyungisa kapisi a kare negano lyepuko kuhamena elituromo eli tuna kumulikida. Mokumona asi kulikida eharo ndi elituromo mwava wopeke kwa lisiga tunda sirongo zende sirongo ndi tunda muntu zende muntu, twa hepa kukara nonondunge mokuyirugana oyo.—Ruk. 6:31.

Eliwapaikiro kuvatera mokukara mupurakeni gomuwa. Nsene tu kwata mbudi zetu momutwe, ngayi tu vatera tu liture ntani nomokupurakena kwava wopeke monkedi zongwa. Eyi kuvaninkisa va lizuvhe umanguruki nokuhara kuzogera nose.

Ose kulikida efumadeko kwava wopeke pokuvapurakena nsene tava uyunga. (Rom. 12:10) Ayo kulikida asi tuna hafere magano nomalizuvho gawo. Kuvhura yi va ninkise va purakene nawa kweyi tuna kuuyunga. Yipo nye Nonkango daKarunga kutupukurura asi ‘nkenye muntu a genderere kuzuvha, nye mokuuyunga ta liwora.’—Jak. 1:19.

Vatera wopeke va ture po ezokomeho. Kukara nosinka kwava wopeke ngayi tu ninkisa tu gazadare ko kowo ava likida elituromo nokukatengwira ko tu ya zogere nawo mausili goBibeli aga va hepa. Nsene kuna kugazadara kukatengwira ko, tarurura eyi wa dimbwilire kuvahamena sikando sokuhova. Liwapaikira sirongwa esi vana kara naso nosinka. Va vatera va dimburure omu nava yi tura pasirugana nokugwanena mo uwa mweyi vana kulironga.—Jes. 48:17.

Nsene muntu ogo ta pwagesa ukaro ndi udigu ou una kumurorora, ruganesa mpito ezi mokuligavera mbudi zongwa kumwe nendi. Kwama sihonena saJesus, ogu nga hengwagwida nkenye apa wokudompa nomutjima. (Mar. 6:31-34) Wa ha genderera kugava ekohononopo lyousimbu tupu. Eyi kuvhura yi ninkise muntu a lizuvhe asi ove kapi ono kulikida elituromo. Mevango lyoyo, likida malizuvho gokumuzuvhira kukora koudigu wendi. (1 Pet. 3:8) Makura rugana epaparo moyimbapiratjangwa yoBibeli, ntani mu fatwilira nombudi dokutunga edi nadi mu vatera mokulididimikira udigu owo. Yimo, kukara nosinka komuntu ogo ngayi ku ninkisa mokudira kuhorora mahoramo gendi kwava wopeke ntudi kuna kara po konda zongwa zokuyirugana ngoso.—Yis. 25:9.

Unene po twa hepa kulikida elituromo lyenene mwava atu lirongo nawo Bibeli. Kanderera kuhamena yihepwa yankenye murongwa, ntani liwapaikira elirongo lyeni oku ono tura yihepwa yendi momagano. Lipura nyamoge asi: ‘Yisinke ga hepa kurugana yipo a ture po ezokomeho lyopampepo?’ Vatera murongwa goge neharo mokulikida rupandu kweyi azi tanta Bibeli noyimbapiratjangwa ‘yomukareli gokulimburukwa gonondunge’ kuhamena yuma oyo. (Mat. 24:45) Momaukaro gamwe, kugava tupu efatururo kapi ya gwanena po. Kuvhura o hepe kumulikida omu na tura pasirugana mpango zongandi zomoBibeli, ano ya wapa kurugana yuma yongandi kumwe nendi eyi nayi likida omu ava zi tura pasirugana.—Joh. 13:1-15.

Apo pwa hepa nondunge nsene kuna kuvatera wopeke va rundurure maparu gawo va paruke kuliza nonompango daJehova. Vantu kwa kara nonontundiliro nevhuliko lyokulisiga, ntani awo kutura po marunduruko mononkedi dokulisiga. Likida nkenda ntani wa ha ndindira ko yoyinzi kupitakana eyi nava vhura. (Fil. 4:5) Wa ha va sininika mokutura po marunduruko momaparu gawo. Pulisira Nonkango daKarunga ntani nompepo zendi zi va tumangede. Jehova kuna hara vantu va mu karere kutundilira komutjima, nye kapisi komusininiko. (Epis. 110:3) Nyokera po mokugava magano ganyamoge kuhamena matokoro aga va hepa kutura po, ntani nampili wopeke va ku pure o yi rugane ngoso, takamesa mokudira kuvatokwera po.—Gar. 6:5.

Va vatera pokurugana ko yuma. Nampili ngomu Jesus ga kere nosinka sosinene kuhamena upampepo wovapurakeni vendi, ga kere hena nosinka koyihepwa yawo yapeke. (Mat. 15:32) Nampili kapi twa kara noyuma yoyinzi, nye pwa kara nonkedi dononzi doparugano omu natu vhura kuvatera wopeke.

Kulikida elituromo mwava wopeke ngayi tu tumangeda tu gazare ko wopeke. Pasihonena, nsene mukaro mpepo kuna kuninkisa vapurakeni woge va dire kupurakena nawa, rundurukireni kevango lyewa ndi tura po ewapaiko mokuyatwikira nzogera posiruwo nasopeke. Nsene kuna ya mu dingura posiruwo sokudira kuwapera, kuvhura o ka tengwire ko konyima. Nsene musinda ndi gumwe ogu ga likidire elituromo kuna kuvera ndi mweli mosipangero, likida sinka soge pokukamudingura ko. Nsene kuvhura, kuvhura hena o mu twarere ko nondya ndi kumuruganena ko yuma yongandi.

Ngomu varongwa vana kutura po ezokomeho, kuvhura va lizuvhe mukuma morwa kudira kukara novakaume vawo vanare. Kara ukaume kumwe nawo. Litulira po siruwo mokuuyunga nawo konyima zelirongo lyoBibeli ntani poyiruwo yimwe yapeke. Va korangeda mokutulisa po vakaume wovawa. (Yis. 13:20) Va vatera mokuwiza komapongo goSikriste. Hingira kumwe nawo komapongo, ntani va vatera novanona vawo yipo navenye va gwanene mo uwa wounene melikwamo.

Likida elituromo lyokutundilira komutjima. Kulikida elituromo movantu kapisi sininke esi natu vhura kulironga, nye kuna kara ukaro womutjima. Kulikida elituromo mwava wopeke kulilikida mononkedi dononzi. Monkedi omu atu purakene ntani nomu atu uyunga. Monkedi omu atu likida nkenda kwava wopeke. Nampili tu dire kuuyunga ndi kurugana yuma yongandi, alyo kulilikida kupitira monkareso nokosipara setu. Nsene sili twa kara nosinka sosinene kuhamena wopeke, ngava yi dimburura.

Konda zomulyo po zeyi atu likidire elituromo mwava wopeke kuna kara asi apa atu yi rugana, ose kuna kuhonena eharo nonkenda zaGuhyetu gemeguru. Eyi kuvatera mokukokera vapurakeni vetu kwaJehova ntani nokombudi ezi ga tu pa tu hanese. Ngomu ono kuhanesa mbudi zongwa, kondjera po mokudira ‘kulipakera mbili nyamoge nyovelike, nye o pakere hena novakweneni mbili.’—Fil. 2:4.