Tunga siparatjangwa soge

VAUYUNGI wokuwapera va diva mulyo gokukara nosiparatjagwa. Nsene tava liwapaikire siuyungwa, siparatjangwa kuvavatera va demenene konombudi dongandi ntani nokugazadara ko momunene. Yipo nye, mevango lyokuruganesa magano gomanzi mongenderera, awo kutunga siuyungwa sawo monkedi ezi nava vhura vapurakeni kugwanena mo uwa. Nsene nkenye egano lyomulyo kuna likwatakana nosiparatjangwa ntani nokuvatera kusitunga, ngayi vatera vapurakeni mokudiworoka magano ogo ntani mokukwata egano eyi gana kutanta.

Nampili ngomu kuvhura kuyiuyunga asi siparatjangwa soge yiso sirongwa esi no ka zogera, ngo yi nongonona asi mulyo goyiuyungwa yoge ngagu wapa nsene ngo dimburura asi siparatjangwa soge kuna kara mutaro gomagano oku ono tungu sirongwa soge. Uhompa noBibeli ntani nevhumbuko kuna kara yirongwa yoyinene. Yiparatjangwa yokulisiga-siga kuvhura kuyitungira koyirongwa eyi. Apa kuna kara po yihonena yimwe: “Uhompa kuna kara epangero lyosili,” “Uhompa waKarunga ngau ninka evhu li kare Paradisa,” “Bibeli kwa zi retesa po mpepo zaKarunga,” “Bibeli kuvhura kutupitisira momazuva getu,” “Evhumbuko kugava ehuguvaro kwava wokuguva,” ntani “Ehuguvaro lyevhumbuko kutuvatera tu kare tuna koro nsene kuna kuligwanekera nomahepeko.” Yiparatjangwa nayinye eyi kuhepa kuyitunga po mononkedi dokulisiga-siga.

Kuliza nosiparatjangwa soBibeli, sirugana sokuzuvhisa esi nga rugana Jesus Kristusa apa ga kere pevhu aso kwa kere nosiparatjangwa asi: “Uhompa waKarunga pepi una kara!” (Mat. 4:17, NW) Ngapi omu ga tungire siparatjangwa oso? MoMavangeli gane, Uhompa kwa u tumbura mo yikando yokupitakana 110. Nye Jesus kwa rugene ko yoyinzi kupitakana tupu kurugurura kutumbura nkango “uhompa”. Kupitira mweyi nga rongo ntani nomoyitetu eyi nga rugana, Jesus kwa yi likidire asi age kwa kere MunwaKarunga, Mesiyasa, ogu Jehova nga pa Uhompa. Jesus hena ga yi likidire asi kupitira mwendi, mpito kwa zegurukilire wopeke mokukalihameka moUhompa owo. Age ga tumbwire yikara eyi va hepa kulikida owo ngava gwana situmbukira oso. Kupitira merongo lyendi nomoyitetu eyi nga rugana, age kwa likidire nawa eyi ngau tanta Uhompa waKarunga momaparu govantu ntani ga tente asi etjido lyendi nompepo donondona nevatero lyompepo zaKarunga kwa likidire asi ‘Untungi waKarunga wa wizilire’ vapurakeni vendi. (Ruk. 11:20) Age kwa pere mpangera kovasikuli vendi va udise kuhamena Uhompa owo.—Mat. 10:7; 24:14.

Kuruganesa siparatjangwa sokuwapera. Kapi vana kukutantera mokutunga po siparatjangwa ngwendi moomu ya kara moBibeli, nye kukara nosiparatjangwa sokuwapera kwa kara nomulyo.

Nsene kuna ku pura o horowore siparatjangwa sanyamoge, pomuhowo gazadara kositambo sosiuyungwa soge. Makura ngomu ono kuhorowora magano gomulyo gemekamo lyosiuyungwa soge, divilisa asi ago sili kuna kukwatesa ko siparatjangwa esi ono horowora.

Nsene siparatjangwa kuna si ku pe, si konakona nawa kuhamena nkedi omu no tunga po siuyungwa soge. Pwa hepa elituromo mokukwata egano mulyo gosiparatjangwa sangoso. Nsene kuna kuhorowora mauzera aga no ruganesa mokutunga siparatjangwa esi vana ku pe, ga horowora nawa yipo ga lize nosiparatjangwa soge. Nsene mauzera vana ga ku pe, simpe wa hepa kukonakona omu no ga ruganesa yipo ga lize nosiparatjangwa. Wa hepa hena kutarurura eyi mauzera ogo gana karere nomulyo kovapurakeni woge ntani sitambo seyi no ga gavera. Eyi ngayi ku vatera mokutokora eyi wa hepa kunkondopeka apa no si gava.

Omu no nkondopeka siparatjangwa. Mokuninka asi o gave enkondopeko lyokuwapera kosiparatjangwa, wa hepa kutunga po etateko apa no horowora nokuwapaika siuyungwa soge. Nsene no ruganesa tupu eyi yina kukwatesa ko siparatjangwa soge ntani nokukwama nompango edi da hamena mo mokuwapaika ekamo lyosiuyungwa, ove ngano ngo vhura kunkondopeka siparatjangwa.

Kurugurura kuvhura kuvatera mokunkondopeka siparatjangwa. Tu guseni sihonena sorusumo rweharo. Morusumo narunye, mudimbi ta nkondopeke siparatjangwa, kuhamena eharo eli ga kara nalyo komuntu ogu ga hara unene. Age kuvhura a rugurure siparatjangwa esi mononkedi dokulisiga-siga. Kuvhura a ruganese nonkango dapeke mokukwatera mo nkango “eharo.” Mokugwederera ko, age kuvhura a ruganese malifanonkango nonontumbwisofano nononkango dokutangauka ndi yifanekeso yapeke. Nye rusumo simpe kuna hamene kosiparatjangwa sokulifana. Nosiparatjangwa sosiuyungwa naso yimo sa hepa kukara. Kuruganesa nkedi zangoso ngayi ninkisa vapurakeni woge va diworoke siparatjangwa soge.

Nompango edi kapi tupu adi rugana pokugava yiuyungwa kositantara nye hena nsene moyirugana yokuzuvhisa ono kara. Nzogera zonsupi kuvhura kuzidiworoka paureru nsene siparatjangwa si zera. Mapukururo aga ava gava pelirongo lyoBibeli kuvhura kugadiworoka noureru nsene siparatjangwa kuna si nkondopeke. Elituromo lyoge lyokuhorowora nokutunga po yiparatjangwa yokuwapera ngayi ku vatera mokukara muuyungi nomurongi gomuwa goNonkango daKarunga.