Zeresa magano gomulyo

YISINKE magano gomulyo gomosiuyungwa? Ago kapisi maruha gokuhafesa aga no tumbagura pangenderera. Ago kuna kara magano aga wa hepa kutamununa mokugafaturura. Ago kuna kara hena magano gokukuvatera o sikise mo sitambo soge.

Kuhorowora nokuwapaika mauzera goge nawa ngayi ku vatera mokuzeresa magano gomulyo gomosiuyungwa soge. Pokurugana epaparo kuvhura o gwane mauzera gomanzi kupitakana aga no vhura kuruganesa. Ngapi omu no vhura kudiva aga no ruganesa?

Pomuhowo, gazadara ko vapurakeni woge. Va diva ndi kapi va diva ko yuma kosirongwa soge? Sinzi sawo va pura eyi azi uyunga ko Bibeli kuhamena sirongwa oso, ndi hawe? Maudigu musinke ava ligwanekere nago apa ava kondjere kuruganesa eyi azi uyunga ko Bibeli kuhamena sirongwa oso momaparu gawo? Sauvali, divilisa asi ono diva sitambo soge seyi ono kuuyungisira mbunga ozo kuhamena sirongwa oso. Pokuruganesa nompango edi mbali, konakona mauzera gosiuyungwa soge nokusiga mo aga ono hepa mo tupu.

Nsene vana ku pe ekamo lyosiuyungwa eli lina kara nosiparatjangwa nomagano gomulyo, wa hepa kudemenena koyininke oyo. Nampili ngoso, ngo pameka mulyo gweyi ngo uyunga nsene ngo diworoka nokonda edi dina kara keguru pokutunga nkenye egano lyomulyo. Nsene kapi vana ku pe ekamo lyosiuyungwa, wa hepa kuhorowora nyamoge magano gomulyo.

Nsene ono diva nawa magano gomulyo ntani ono wapaike mauzera konhi zomagano aga, ngayi ku rerupira mokugava siuyungwa soge. Ntani hena, vapurakeni woge ngava gwanena mo uwa wounene.

Nonkedi dokulisiga omu no wapaika siuyungwa soge. Pwa kara nonkedi dokulisiga-siga edi no vhura kukwama mokuwapaika ntjima-ntjima zosiuyungwa soge. Ngomu no ka di lironga, no ka yi dimburura asi kuvhura o ruganese nonkedi dimwe kuliza nositambo soge.

Nkedi zongwa kwa hamena mo kuhangura magano goge moyirongwagona. (Nkenye egano mulyo morwa ngali gwederera kekwato egano lyovapurakeni kosirongwa oso ndi ngali vatera mokusikisa mo sitambo sosiuyungwa soge.) Ano nkedi zapeke kuna kara kuyihangura momalikwamo goyihorokwa. (Pasihonena, yihorokwa eyi ya horokere komeho zoRuhanzo kuvhura kuyikwama yininke eyi ya horokere komeho zezonaguro lyaJerusarema mo-70 S.N., ano moruhura kuvhura kuyikwama yihorokwa yomomazuva getu.) Nkedi zautatu kuna kara sihorokwa noyitundwamo. (Eyi kuvhura kuyitunga po mwankenye nkedi. Pasihonena, kuvhura o tameke noukaro owo una kara po, yitundwamo, makura likida sihorokwa.) Nkedi zaune kwa kwatera mo malisigo. (Kuvhura o tumbure malisigo pokatji kouwa noudona.) Poyiruwo yimwe mosiuyungwa kuvhura mu hamene nonkedi dokulisiga-siga.

Apa va rundilire Sitefanesa komeho zosigongi somasimbi soVajuda, age kwa geve siuyungwa sononkondo omu ga ruganesere nkedi zomalikwamo goyihorokwa. Ngomu no ka si resa moYirugana 7:2-53, koneka asi magano kwa ga horowora nositambo. Sitefanesa pomuhowo kwa simwitilire ehistoli eli va dilire kupatana vapurakeni vendi. Makura ta tanta asi nampili ngomu Josefa va mu nyokere vakuru vendi, Karunga kwa mu ruganesere mokuvazowora. Yokukwama ko, age kwa likidire asi Vajuda kapi va limburukwire kwaMosesa, ogu ga ruganesere Karunga. Age makura ta hagesa pokunkondopeka asi mpepo ezi va likidire Vajuda vanare yizo hena ezi va likidire vantu ava va dipagere Jesus Kristusa.

Wa ha ruganesa magano gomulyo gomanzi. Ayo kwa hepa tupu magano gomasesu mokutunga nkenye siparatjangwa. Moyihorokwa yoyinzi, kapi ga hepa kupitakana pwagatano. Eyi usili, yi kare asi ove kuna kugava siuyungwa sonominute 5 ndi 10 ndi 30 ndi nampili kupitakana opo. Wa ha heteka kuzeresa magano gomanzi. Vapurakeni woge kuvhura tupu kukwata egano magano gongandi gomasesu mosiuyungwa simwe. Ngomu siuyungwa sina kukara sosire, yimo hena no nkondopeka unene nokufaturura nawa magano gomulyo.

Yi kare asi magano gangapi ono kuruganesa, divilisa asi o tunge nkenye egano momunene. Ruganesa siruwo sokugwanena po mokukonakona nkenye egano lyomulyo yipo vapurakeni va ga kwate nawa egano.

Siuyungwa soge sa hepa kurerupa. Eyi kapi ya korera kounzi nousesu womapukururo aga ono kugava. Nsene magano goge ono ga wapaike nawa konhi zoyiparatjangwagona yoyisesu ntani nokugatunga limwe posikando, siuyungwa ngasi kara ureru mokusikwama ntani ngayi kara ureru kusidiworoka.

Zeresa magano goge gomulyo. Nsene mauzera goge kuna ga wapaike nawa, kapi ngayi ku digopera mokunkondopeka magano goge gomulyo apa no gava siuyungwa soge.

Nkedi zongwa po mokuzeresa egano lyomulyo kuna kara pokugava maumbangi nomatjangwa ntani nomauzera gamwe aga gana kukwatesa ko kegano olyo nokulinkondopeka. Mauzera gapeke ga hepa kuzeresa nokulikida ndi nokunkondopeka egano lyomulyo. Wa ha gwederera mo magano ga hana hepero morwa yeeyi mawa. Ngomu ono kutunga po mauzera gapeke, likida omu gana kukwatesa ko egano lyomulyo. Wa ha gazara asi vapurakeni woge nava yi kwata tupu egano. Ekwatakaneso eli kuvhura kulilikida pokurugurura nonkango edi dina kupwagesa egano lyomulyo ndi pokurugurura etanto lyegano lyomulyo poyiruwo noyiruwo mosiuyungwa soge.

Vauyungi vamwe kudidilika magano gomulyo pokugatumbagura mononomora. Nampili ngomu ya kara asi nazo nkedi zimwe zokudidilika magano gomulyo, za ha pinganena po nkedi zokuhorowora nawa ntani nokutunga mauzera monkedi zongwa.

Kuvhura o horowore mokutumbura egano lyomulyo ketameko komeho zokugava mauzera gokukwatesa ko. Eyi ngayi vatera vapurakeni mokuhafera mulyo gweyi nayi kwama ko, ntani hena ngayi nkondopeka egano olyo lyomulyo. Kuvhura o nkondopeke egano pokulikwatakana konyima zokulitunga momunene.

Moyirugana yokuzuvhisa. Nompango edi vana zogere keguru kapi adi rugana tupu koyiuyungwa yelike nye hena nokononzogera edi o kara nado moyirugana yokuzuvhisa. Nsene kuna kuliwapaikira, gazadara ko nkenye ukaro wounene ou una kara momagano govantu womomukunda. Horowora siparatjangwa esi nasi ku pulisira mokulikida omu ehuguvaro eli azi gava Bibeli ngali ka gusa po ukaro owo. Nampo kuvhura o horowore magano gavali gomulyo mokutunga siparatjangwa oso. Tokora asi matjangwa musinke no ka ruganesa mokugakwatesa ko. Makura gazadara ko omu no ka tameka nzogera zoge. Eliwapaikiro lyangoso ngali ku pulisira o ture po marunduruko monzogera zoge nsene hepero. Ayo ngayi ku vatera hena mokutumbura yuma eyi nga diworoka mwenya embo.