Kuuyunga nonkango dousili

MORWASINKE nampo Mukriste na uyungira nonkango da hana asi usili? Kuvhura nampo a rugurure yuma yongandi eyi ka zuvhire, ga hana kugwana mauzera. Ndi kuvhura a gwede unene kegano morwa kuna resa mauzera mepuko ga hana kuyidivira. Apa atu kara nosinka kuhamena kuhungika nampili moyuma yoyinunu, vapurakeni vetu ngava tura ehuguvaro mombudi zetu.

Moyirugana yokuzuvhisa. Pokudimburura asi awo simpe yinzi va hepa kulironga, wovanzi kulizuvha woma mokutameka kuzuvhisa. Nampili ngoso, konyima zosiruwo awo kuyayinongonona asi kuvhura va gavere umbangi wouwa, nampili ngomu va kara tupu nediwo lyesesu lyousili. Ngapi? Pokuliwapaikira nawa.

Komeho zokuza moyirugana yokuzuvhisa, diva nawa sirongwa esi ono hara kukazogera. Hetekera ko mokugazarera mapuro aga nava vhura kukakupura vapurakeni woge. Papara malimbururo gokuhafesa gokutundilira moBibeli. Eyi ngayi ku vatera mokukagava malimbururo gouhunga monkedi zokulitura. Ove kuna kukarugana elirongo lyoBibeli ndi? Rugurura mosimbapiratjangwa selirongo. Divilisa asi ono kwata nawa egano Matjangwa aga gana kukwatesa ko malimbururo komapuro gomosimbapiratjangwa oso.

Ngapi nsene mwenya embo ndi murugani mukweni na pura epuro eli ono dili kuliwapaikira kulimburura? Nsene kapi ono diva nawa mausili, wa ha singanyekera mauzera. “Vantu wovawa kuhova tanko kugazara, ntani ana kulimburura.” (Yis. 15:28) Kuvhura o gwane evatero eli ono hepa mobuke Reasoning From the Scriptures ndi mo “Yirongwa yoBibeli yeliyongo” nsene mwa kara naso meraka lyeni. Nsene kapi ono kara nado, pura mokukarugana epaparo ntani nokutwengwira ko. Nsene ogu ana pura epuro ana kara neharo, age nga ndindira elimbururo lyouhunga. Elinunupiko lyoge kuvhura ngali mu kundame monaruwa.

Kurugana kumwe moyirugana yokuzuvhisa novazuvhisi wokuwapera kuvhura yi ku vatere mokukara noudivi wokutoona nawa Nonkango daKarunga. Nomena asi matjangwa musinke vana kuruganesa ntani nomu vana kugafaturura. Nelinunupiko, tambura nkenye magano ndi mavyukiso vana kukupa. Murongwa gomupampi Aporo kwa gwanene mo uwa mevatero eli ga gwene kwava wopeke. Rukasa kwa singwenene Aporo asi “ga diva kuuyunga,” “kwa divire matjangwa,” ntani “mpepo zendi kwa hwamukire,” ‘nomokusanseka Jesus, oku ta rongo nawa-nawa yokumuhamena.’ Nampili ngoso, kapi ga kere nawa nekwatogano lyene-lyene. Apa va yi dimbwilire oPilisikira naAkura, “tava mu gusa va mu fwatwire nawa-nawa nzira zaKarunga.”—Yirug. 18:24-28.

“Kukwaterera kononkango dokuvhura kuhuguvara.” Yiuyungwa yetu komapongo ya hepa kulikida efumadeko lyenene kosirugana sombungakriste ‘ngongundi nedi lyousili.’ (1 Tim. 3:15) Mokuninka asi tu kwaterere ko usili, ya kara nomulyo kukwata egano matjangwa aga tuna hara kukaruganesa. Gazadara ko moukaro omu vana ga ruganesa ntani nositambo.

Eyi no uyunga mepongo lyomombungakriste kuvhura va ka yi rugurure. Yimo, “ose natuvenye kupuka popanzi.” (Jak. 3:2) Nye ngo gwanena mo uwa pokutunga po nkareso ezi ngazi ku vatera mokuuyunga youhunga. Vanavazinyetugara wovanzi ava va litjangesa moSikora zoUkareli ngava kara vakuronambunga komeho. ‘Ngava hepa ko yoyinzi’ kowo ava pe situmbukira sangoso. (Ruk. 12:48) Nsene mukuronambunga a gava mapukururo gepuko, ayo ngayi reta maudigu gomanene kwava womombungakriste, ano eyi ngayi ninkisa Karunga a dire kumuhafera. (Mat. 12:36, 37) Yipo nye, munazinyetugara ogu ana wapere kukara mukuronambunga ga hepa kudiva ‘kuudisa nonkango dokuvhura kuhuguvara, edi da liza nerongo eli va mu ronga.’—Tit. 1:9.

Wa hepa kudivilisa asi efatururo lyoge lina lizi kumwe ‘nononkango donongwa’ edi da kara moMatjangwa gousili. (2 Tim. 1:13) Nye eyi ya ha ku tjilisa. Nampo kapi wa mana kuresa Bibeli nazinye. Twikira ngorooro mokuyirugana. Nye posiruwo esi, koneka omu magano gana kukwama ko naga vhura kukuvatera mokukonakona mauzera aga ono kugazara kukaruganesa mokukaronga.

Pomuhowo lipura nyamoge asi: ‘Aga mauzera gana lizi neyi na lironga nare moBibeli ndi? Ago kuvhura kukokera vapurakeni kwaJehova, ndi ago kwa kunkondopeka unongo wouzuni ou nokukorangeda vantu u va pitisire?’ Jesus kwa tente asi: “Nonkango doge yido usili.” (Joh. 17:17; Deut. 13:1-5; 1 Kol. 1:19-21) Makura ruganesa nawa yiruganeso yelirongo eyi ga gava mukareli gokulimburukwa gonondunge. Eyi ngayi ku vatera mokukwata nawa egano matjangwa ntani nokugaruganesa nawa nehetakano ntani nonondunge. Nsene o hamesera siuyungwa soge ‘kononkango donongwa’ nokuhuguvara mewapaiko lyaJehova apa ono kufaturura nokuruganesa matjangwa, nonkango doge ngadi kara dousili.

Kukonakona usili wonombudi dokuruganesa. Yihorokwa yantaantani nomatemwinino, ntani noyilimonena kuvhura kuvatera nsene kuna kufaturura ntani nokuruganesa yitwa yimwe yongandi. Ngapi omu no divilisa asi ayo uhunga? Nkedi zimwe kuna kara pokugusa mauzera gangoso konontundiliro dokuhuguvara. Diworoka mokutara asi mauzera ogo kuna kara gomape. Mauzera gamwe kuyadira mulyo; eyi va gwana vadivi unsitwe kurunduruka; ntani ngomu vantu vana kukulika ekwatogano lyawo lyehistoli ntani nomaraka ganare, mausili gokuhamena ediwo lyawo lyanare kuliwapukurura. Wa hepa kutakamesa unene nsene kuna kugazara kuruganesa nombudi domonosaitunga nomotivi nomoradio nomokompuita ndi koInterneta. Yisewe 14:15 kwa pukurura asi: “Mugova kupura nkenye eyi, nye vanandunge kutakamesa nontambo dawo.” Lipura nyamoge asi: ‘Oku zina tundilire mbudi ozo, kuvhura kuhuguvara ko ndi? Kogeli mauzera gamwe ga kwatesa ko nombudi odo ndi?’ Nsene kuna kusinganyeka mausili kuhamena nombudi odo, wa ha di ruganesa.

Mokugwederera ko kuhamena kutara ntundiliro zomauzera ogo, konakona nawa omu ono hara kukagaruganesa. Divilisa asi eruganeso lyoge lyomatemwinino ntani mauzera yina lizi nosirongwa omu ono ga gusa. Nsene kuna kunkondopeka sitwa, takamesa asi yuma omu muna hamene “vantu vamwe” kapisi o yi tamunune mu kwatere “sinzi sovantu,” ntani nkango “vantu wovanzi” za ha kara “nkenye gumwe,” ntani nkango “moyihorokwa yimwe” za ha kara “nkenye apa.” Kugwederera ko konombudi omu muna hamene nonomora, ndi unene wosuma ndi mulyo, kuvhura kuninkisa vapurakeni woge va dire kukuhuguvara.

Nsene ove nkenye apa kuuyunga youhunga, ove ngava ku diva asi muntu wa fumadeka usili. Eyi ngayi gava edina lyewa koNombangi daJehova. Somulyo po unene, ayo kuyererepeka “Jehova Karunga gousili.”—Epis. 31:5, NW.